Domowina je spočatk apryla we Wulkich Zdźarach rěčny projekt DOMOJ zahajiła. To je intensiwny kurs serbšćiny, kotryž dźewjeć měsacow traje. Dohromady dwanaće wobdźělnikow wuknje zhromadnje w tak mjenowanym rěčnym hnězdźe. Woni so w našim wječorniku předstajeja. Toni Bufé chce sej zakłady za serbske konwersacije přiswojić, kotrež tež na dźěle trjebaš.

„Wosobinska změna žiwjenskeje situacije a wabjenski lětak za intensiwny kurs Domoj dadźa mje dźensa najrjeńše serbske spěwy spěwać.“ Štó sym? Moje mjeno je Toni Bufé. Sym žiwy a skutkuju w Budyšinje a wokolinje. Wotrostł sym w kónčinje wokoło Malešec. Kaž mnozy druzy Łužičenjo mam tež ja mały podźěl serbskich korjenjow, wšako generacija prastarši rěč hišće wužiwaše (pradźěd a prawowka).