Policija (27.03.26)
Žonam tobołku pokradnyli
Wojerecy. Hnydom třom žonam su njeznaći srjedu we Wojerecach jich ručnu tobołku pokradnyli, jako běchu wone nakupować. Tak su skućićeljo připołdnju na Šulskej tobołku 64lětneje žony spakosćili. W njej bě něhdźe 70 eurow. Dalši pad sta so pozdźišo w kupnicy na industrijnišću, hdźež 88lětna žona nakupowaše. Wokomik, jako wona swoju tobołku skrótka z wočow pušći, paduši wužichu a ju hrabnychu. Škoda wučinja w tymle padźe 250 eurow. A skónčnje so 70lětna na Łužiskim naměsće z woporom paduchow stała, jako so jeje tobołka z něhdźe 60 eurami zhubi.
Jězor jako žórło ćopłoty?
Hamor (AK/SN). Drježdźanska techniska uniwersita přepytuje tuchwilu Bjerwałdski jězor na móžne termiske wužiwanje w přichodźe. We wobłuku slědźerskeho projekta THETA (Termiske wužiwanje bywšich brunicowych jamow) wědomostnicy wot nalěća 2026 hač do lěća 2027 přeslědźa, kak so termiske wužiwanje jězora na lokalne prudźenja, temperaturu wody a na dalše wobłuki wuskutkuje. „Za to nastanje na sewjernym pobrjohu pospytna připrawa. Nimo toho wodu jězora wobstajnje kontrolujemy“, rozłoži dr. Johannes Feldbauer z Drježdźanskeho instituta za hydrobiologiju na zašłym posedźenju Hamorskeje gmejnskeje rady. Projekt financuja ze srědkow Swobodneho stata Sakskeje a Europskeje unije.
Aktualne wudaće němskeho časopisa SuperIllu wěnuje so serbskej ...
Krótkopowěsće (27.03.26)
Tarifowy konflikt rozrisałoj
Drježdźany. Tarifowy konflikt w sakskim zjawnym bliskowobchadźe je rozrisany. Dźěłarnistwo Verdi je so z komunalnym zwjazkom dźěłodawarjow na nowe tarifowe zrěčenje dojednało. Mjez druhim su přistajeni štyri lěta před wupowědźenjom škitani a dóstanu wo 20 proc. wyšu lětnu přiražku. Tež přiražki za nócne dźěło maja stupać. Ze swojim žadanjom 35hodźinskeho dźěłoweho tydźenja z połnej mzdu so dźěłarnistwo přesadźiło njeje.
Pasionska hra online přistupna
Chrósćicy/Budyšin. Nahrawanje loni předstajeneje pasionskeje hry „Sćěhuj mje!“ je wot dźensnišeho na platformje YouTube přistupne, a to na kanalu studija Lucija, kotryž je produkciju zwoprawdźił. Zajimcam bjez znajomosćow serbšćiny poskićeja podtitule w sydom rěčach, mjez druhim w pólšćinje, jendźelšćinje, italšćinje a francošćinje.
Nowa wěža po 120 lětach
Kamelije posledni raz widźeć
Ochranow a Wochozy
Wochozy. Na přednošk pod hesłom „Ochranowska bratrowska wosada a Serbja“ přeprošuje sobotu, 28. měrca, towarstwo Šwjelic bróžnje we Wochozach. Započatk budźe we 18 hodź. Historikarka dr. Lubina Malinkowa, wědomostna sobudźěłaćerka Serbskeho instituta, chce w swojim přednošku tež Wochožansku perspektiwu zapřijeć.
Wukubłaja wodźerjow po měsće
Budyšin. Lětsa wotměje so zaso kurs ludoweje uniwersity w kooperaciji z Budyskej turistiskej informaciju za wšitkich zajimcow, kotřiž chcyli so z wodźerjom po sprjewinym měsće stać. Dokładny termin njeje hišće znaty. Teoretiske wukubłanje ma so hač do kónca lěta wotměć, praksa ma hač do meje 2027 trać. Zajimcy móža so hižo nětko přizjewić, a to e-mailnje pod abo pod telefonowym čisłom 03591 42016.
Přednošuje wo mjetelach
Łaz. Na přednošk wo mjetelach w Šwicarskej a Južnym Tirolu přeprošuje tamniše spěchowanske towarstwo jutře, 27. měrca, do Domu Zejlerja a Smolerja we Łazu. Započatk je we 18 hodź. Přednošować budźe Mario Trampenau, ranger w biosferowym rezerwaće Hornjołužiska hola a haty.
Policija (26.03.26)
Praskotak awće wobškodźił
Budyšin. Z luteje rozwólnosće su njeznaći w nocy na wutoru na Budyskej Gagarinowej tójšto wěcneje škody naparali. Woni zapalichu silwesterski praskotak a ćisnychu jón pod parkowacy Citroen. Při tym su tutón kaž tež pódla stejacy Seat wobškodźištej. Cyłkownu škodu trochuje policija na něhdźe 3 000 eurow.
Nowe ideje za bywši zawod
Na terenje něhdyšeje lijernje Perfecty maja přichodnje bydlenja nastać
Budyšin (UM/SN). Časowa doba, w kotrejž njeje město Budyšin ležownosć něhdyšeje fabriki Perfecta mjez Jordanowej a Jägerowej wužiwać směło, je w lěće 2025 wotběžała. Industrijowe twarjenja w juhowuchodnym dźělu Budyšina běchu w lěće 2010 zwottorhali a teren zrumowali. Za wottorhanje bě město spěchowanske srědki dóstało. Zo njeby je wróćić trjebało, njesmědźeše tam 15 lět ničo twarić. Nětko pak móže město za płoninu blisko dwórnišća plany do přichoda wuwiwać. Na zašłym posedźenju přirady za měšćanske wuwiće su wotpowědne ideje předstajili.
Z pólskimi přećelemi sportowali
Pólska partnerska šula Radworskeje zakładneje šule „Dr. Marja Grólmusec“ bě srjedu, 18. měrca, z hosćom pola nas w Radworju. 22 dźěći a tři wučerki zakładneje šule ze wsy Rząsiny su z busom na zhromadny sportowy dźeń přijěli.
Po słódnej snědani započachu so prěnje wubědźowanja w našej rjanej wulkej sportowni „Slavia“. W prěnim dźělu wojowachu dźěći 2. a 3. lětnika zhromadnje z pólskimi dźěćimi w staflowych hrach wo dypki. Po wobjedźe sej wšitcy zhromadnje wjesele na šulskim dworje hrajkachu. Tam hižo prěnje přećelstwa nawjazachu. Starše dźěći spytachu so z pomocu jendźelskeje a serbskeje rěče kaž tež z někotrymi pólskimi wokablemi dorozumić a so jara wjeselachu, jako so to poradźi. Při slědowacej hrě z bulom wojowachu zaso měšane teamy wo dobyće. Na kóncu hrajachu dźěći kopańcu. Tež při tym bě poprawom wšojedne, štó dobudźe, dołhož mějachu wšitcy wjele wjesela.
