Worklecy. Na Worklečanskej kupje je njedźelu na dnju dźěsća wosebje čiłe žiwjenje knježiło. Hišće prjedy hač dźěćacy swjedźeń oficialnje wotewrěchu, wonješe hižo za čerstwje napječenymi waflemi a maćerje samopječene tykancy při­njesechu. Christina Hozyna a předsyda wjesneho towarstwa Carsten Schneider wšo trěbne přihotowaštaj.

Što by so lěpje hodźało, hač na kupje komunikacije, kreatiwity a kultury „Michał Hórnik“ přewjesć dźěćacy swjedźeń. Hižo bórze so z dźěćimi mjerwješe a jich smjeće po wšej zelenej idylce klinčeše. Wjeršk bě zahorjacy koncert šulskeho chóra Worklečanskeje zakładneje šule, kotryž bu wot młodych instrumentalistow podpěrany a z mócnym přikleskom mytowany.