Nowu Rownjansku pěstowarnju w nošerstwje gmejny bórze wužiwaja

Rowno (AK/SN). Nowa Rownjanska Witaj-pěstowarnja „Milenka“, kotrejež nošer je Slepjanska gmejna, je nimale dotwarjena. Tole zdźěli wjesnjanosta Jörg Funda (CDU) na wčerawšim posedźenju gmejnskeje rady. Molerjo, elektrikarjo a fachowcy za přewětrjenje wukonjeja poslednje dźěła. „Kuchnja a wšitke meble su natwarjene. W sanitarnym wobłuku so nuzniki, myjadła a dalše wuhotowanje wudospołnjeja. 10. junija budźe kontrola pitneje wody“, tak Funda.

Přichodne dny zatwarja system za zamkanje. Srjedź meje je Nišćanski twarski dohladowanski zarjad nowu pěstowarnju wohnjoškita dla přepruwował. To je po słowach wjesnjanosty jedne z wuměnjenjow, zo smědźa pěstowarnju ­wužiwać. Přepruwowali su w meji ži­widłowu hygienu. Předewšěm nastupaše to wobłuk, hdźež w kuchni jědź rozdźě­leja. Njedostatki žane zwěsćili njejsu. ­Dalšej přepruwowani přewjedźetej krajny młodźinski zarjad a strowotniski zarjad kónc junija.