Budyšin (CS/SN). Wjedro minjeneho kónca tydźenja, jako sprjewine město swoje Budyske nalěćo swjećeše, bě na kóncu tola hišće lěpše hač připowědźene. Předewšěm sobota bě słónčna a skićeše dobre wuměnjenja za dźeń towarstwow. Te předstajachu šěroku paletu towarstwoweho žiwjenja w měsće. Při oficialnym wotewrjenju bě sobotu prěni raz žonopowa kralowna Vivien Lenz pódla. Samsny dźeń podpisachu wopismo wo dalšim zhromadnym dźěle z městom Wormsom. Partnerstwo wobsteji mjeztym 35 lět. Tohodla běchu tež kožowi rejwarjo přijěli, kiž prezentowachu ze swojim wustupom tradiciju zhotowjenja kože we Wormsu. Tež z tamnych partnerskich městow běchu hosćo přijěli. Přećeljo z Jabloneca běchu na přikład z předawanišćom suweněrow zastupjeni.