We Wěteńcy 800. róčnicu prěnjeho naspomnjenja wsy swjećili

Wěteńca (AH/SN). Před tydźenjomaj je město Kamjenc swój 800. jubilej woswjećił, za dwě njedźeli změja wulki swjedźeń w Chrósćicach a zašły kónc tydźenja je tež mała wjeska Wěteńca na swoje prěnje naspomnjenje před 800 lětami z wjesnym swjedźenjom spominała. Pjatk wječor zetkachu so wjesnjenjo na sportnišću. Tam wubědźowachu so swójby we wosebitej formje kickera: Kóždy bě takrjec figura we wulkej kickerowej hrě. Wjeselo a napjatosć běštej garantowanej. Z widejom wo jubilejnym swjedźenju před 25 lětami wulećachu sej zhromadnje do zašłosće a zrodźichu při tym mysličku, zo móhli pozabyte swjedźenje kaž wjesne póstnicy zaso wozrodźić.