Medicinske zastaranje za Hamorsku gmejnu dale wažne

Hamor (AK/SN). We wobłuku strukturneje změny chce Hamorska gmejna projekt lěkarskeho domu dale zwoprawdźić. Wo nowym strowotniskim centrumje su so njedawno wospjet ze statnym zawodom Sakski imobilijowy a twarski ma­nagement wothłosowali. „Při tym dźěše wo někotre dypki doskónčneho stejnišća. Přichodne tydźenje su hišće změny w planach předwidźane“, rjekny Hamorski wjesnjanosta Hendryk Balko (Hamorske wolerske zjednoćenstwo) na zašłym posedźenju gmejnskeje rady.

Tak ma na přikład schodźišćo trochu mjeńše być hač bě dotal planowane. Dalša změna nastupa městnje za wotpad­kowe sudobja a za kolesa. Wobě žanu třěchu njezmějetej. Tež koncept za zasta­ranje z ćopłotu změnja. Dom njepřizamknu k dalnoćopłoće, ale zatwarja do njeho ćopłotnu klumpu. Wo tym su so tež z architektom dorozumić dyrbjeli, dokelž so wšitke změny na wudawki za plano­wanje wuskutkuja. Po słowach wjesnjanosty so nadźijeja, zo Sakska natwarna banka spěchowanje přizwoli. „Bjez spěchowanja lěkarski dom twarić njemó­žemy“, praji Hendryk Balko.