Budyšin (SN). Tuchwilu eksistuje w Němskej wjace hač 50 tak mjenowanych nuzowych zwjazkow, w kotrychž so regionalne archiwy, biblioteki a muzeje zhromadnje na nuzowe situacije přihotuja. Woni wuměnjeja prawidłownje swoje nazhonjenja w zwisku z prewenciju tutych a w konkretnym padźe podpěruja so wzajomnje z personalom a materialom.
W lěće 2013 je biblioteka Wyšeje šule Žitawa/Zhorjelc Nuzowy zwjazk Hornja Łužica iniciěrowała, kotremuž přisłuša dźensa dohromady 16 zarjadnišćow w Budyšinje, Biskopicach, Zhorjelcu, Ochranowje, Kamjencu, Königshainje, Lubiju a Žitawje. Město Budyšin běše so najprjedy rozsudźiło, zo zwjazkej njepřistupi, dokelž njeběše tehdy w swójskich zarjadnišćach hišće dosć škitnych naprawow wudźěłało. To su zamołwići w poslednich lětach w kooperaciji z Budyskej wohnjowej woboru konsekwentnje změnili a tak zakład za čłonstwo w Nuzowym zwjazku Hornja Łužica połožili.
