Budyšin. Pod hesłom „Złote zynki“ wuhotowaše Serbski ludowy ansambl mi­njenu njedźelu swój 2. sinfoniski koncert aktualneje hrajneje doby. Něhdźe 60 zajimcam předstaji Serbska komorna fil­harmonija na žurli SLA wuwaženy, rozdźělne hudźbne doby zwjazowacy program. Zazběh tworješe uwertira opery „Cosi fan tutte ossia La scuola degli amanti“. Kruch słuša do kompozicijow, kajkež (byrgarske) kubłane wucho spěšnje spóznawa, byrnjež snano njewědźało, zo je z pjera Wolfganga Amadeusa Mozarta. Hudźbnicy interpretowachu jón pod nawodom Kathariny Dickopf cyle tak, kaž sej lubowarjo Wienskeje klasiki komisku operu přeja: lochce a tola zaměrnje. Slědowacy „Concerto saxofonico“ słuša do kompozicijow, kotrež bychu sej wjetšu kedźbnosć zasłužili. Twórba Ulricha Pogody cituje serbsku ludowu hudźbu runje tak kaž francosku awantgardu pózdnjeho 19. lětstotka, jako sej twórcy hudźby wuwědomichu, zo eksistuja tež zwonka kwintoweho kružidła zajimawe stupnicy resp. skale a zo so tež njeschowane disonancy hodźa jako tworićelski srědk.