50 Budyskich wikowarjow sobotu nakupowansku nóc organizowało

Budyšin (CS/SN). Poměrnje njejapcy běše Budyske nutřkoměšćanske towarstwo nakupowansku nóc „Romantica“ před něšto tydźenjemi wotprajiło. Jako přičiny mjenowachu zamołwići towarstwa mjez druhim špatnu kooperaciju a komuni­kaciju mjez wažnymi partnerami a nošerjemi a ćeže w zwisku z financowanjom kaž tež wysoke zarjadniske předpisy.

Nazymski ewent z mjeztym wjace hač 20lětnej tradiciju je mjez wopytowarjemi zbliska a zdaloka jara woblubowany. ­Nimo toho zaruča wón lokalnym wikowarjam přidatne dochody a je za nich zdobom dobra přiležnosć, w jónkrótnej přijomnej atmosferje tróšku dlěje z kupcami pobjesadować. 50 Budyskich wikowarjow w nutřkownym měsće nochcyše nazymu bjez „Romantici“ akceptować a je so zjednoćiło, zo by swójsku naku­powansku nóc zwoprawdźiło. Sobotu wječor potom tak daloko běše. Mnozy wopytowarjo hač do pózdnich hodźin po nutřkownym měsće flaněrowachu, štož bě najlěpši wuraz toho, zo běchu so wikowarjo prawje rozsudźili.