Nowy hort njenastanje w starej pěstowarni, ale na hinašim městnje

Róžant (JK/SN). Prašenje, kak so wulkoprojekt gmejny Ralbicy-Róžant, mjenujcy nowa pěstowarnja a hort w Ralbicach rozrisa, je dóstało na wčerawšim posedźenju tamnišeje gmejnskeje rady zwjeselacu a spokojacu wotmołwu. Po nowotwarje pěstowarnje, kotraž je něhdźe milion eurow wjace płaćiła hač planowane, zwosta gmejnje hišće 2,7 milionow eurow za přetwar dotalneje pěstowarnje na hort. Hižo nětko pak by tele předewzaće 900 000 eurow wjace płaćiło hač předwidźane. Tohodla pytachu za alternatiwu k přetwarej. Wuslědk su wčera delanskim gmejnskim radźićelam na jich posedźenju předpołožili.