Wojerecy (KD/SN). ). Kóždej dwě lěće organizuje Wojerowska Kulturna fabrika wuměłstwowy projekt „Kunstlandstrich“. W starym a nowym měsće kaž tež na mnohich dalšich městnach spřistupnjeja wuměłcy zajimcam swoje ateljeje a towarstwa swoje rumnosće. W Małej Ny­deji su Pečikecy hižo tójšto lět z hosći­ćelom tohole dnja. Tak su tež minjenu njedźelu pola sebje wuměłske rjanosće a rjemjeslniske móžnosće srjedźeneje Łužicy předstajili.

Wot lěta 2013 Frank Pečik swój wjace hač 300 lět stary statok a jeho stawizny we wobłuku zarjadowanja „Kunstlandstrich“ prezentuje. Lětsa pokazachu tam, kak so wowča wołma předźěłuje. Za to přeprosychu sej Steffi Metting z jeje kołwrótom a Birgit Schmidt z transportabelnym krosnom. Nimo toho je Marie Sonntag přijěła, kotraž rubiška a kachlowe lapki hóčkuje. Woblekła bě sej wona swjedźensku drastu z Noweje Łuki. Narodnu drastu wobsedźi jeje swójba hižo dlěje hač sto lět.