Je z rjanej tradiciju, zo zarjaduje Budyska župa „Jan Arnošt Smoler“ započatk septembra kubłansku jězbu. Minjenu sobotu wulećachu sej Serbja z Budyšina, Worcyna, Rakec a wokolnych wsow do Choćebuza a Drjenowa, zo bychu tam Delnjoserbow zetkali a z nimi hłubje do rozmołwy přišli. Najprjedy pozastachmy při bywšim hrodźišću w Choćebuzu. Tam powita nas Werner Měškank a pokaza nam dźěle Choćebuza, kotrež maja něšto ze Serbstwom činić. Jemu připosłuchać bě jara zajimawe, wšako rozprawješe nam angažowany Serb wo stajnym a zmužitym wosobinskim boju wo prawa Serbow w tutym měsće. Při tym njezaby wón swojich swěrnych serbskich sobuwojowarjow pomjenować. Dźak wšitkim tež z našeje strony!
Werner Měškank powědaše wo dobytych sudniskich jednanjach abo wótrych a chutnych rozestajenjach z jednotliwymi zamołwitymi města, kotřiž mějachu w poslednich pjeć lětdźesatkach poprawom zamołwitosć za runoprawosć Serbow, z njej pak zwjetša liwko wobchadźachu. Zwjeselace je, zo móžachmy přiwšěm wjacore serbske wuměłske dźěła Jana Buka, Jürgena von Woyskeho a druhich wobdźiwać.
