Při rjanym słónčnym wjedrje podachu so wuměnkarjo Serbskeho šulskeho towarstwa a jeho přećeljo njedawno na wuprawu do Błótow. Błóta su lěsny a wodowy paradiz z wosebje bohatej floru a fawnu. Serbske šulske towarstwo bě dźeń z tójšto programowymi dypkami pjelniło.

Hnydom dopołdnja wobhladachmy sej ewangelsku cyrkej w Tšupcu. Hižo zdaloka nam njewšědnej dwójnej wěži cyrkwje napadnyštej. Cyrkej njeje najwjetša w Błótach, ale je swojorazna. ­Wona je po planach Karla Friedricha Schinkela w lětach 1828 do 1832 nastała. Twary znateho twarskeho mištra wšak najhusćišo w stolicy namakaš.

Připołdnju su nas do Tšupčanskeho wětrnika přeprosyli. Tam přihladowachmy, kak tam len mlěja. Wětrnik je posledni w Europje, kotryž produkuje wolij, mlěje zorno a so jako rězak wužiwa. 1850 zhotowjene twarjenje su w poslednich lětach dospołnje restawrowany. Lany ­wolij produkuja tu hišće kaž před 100 ­lětami. Mnozy wužichu składnosć a sej słódny wolij kupichu.