Krajny rada na rozmołwne koło z wobydlerjemi do Njebjelčic přeprosył

Njebjelčicy (SN/MWj). Po wjace hač 30 městach a gmejnach, hdźež je Budyski krajny rada Udo Witschas (CDU) hižo na wobydlersku rozmołwu přeprosył, běchu wčera Njebjelčicy dalša stacija. Zajim ludźi pak bě tu přewidny. Jenož něhdźe dźesać hosći je na gmejnsku žurlu přišło. Spočatnje jim Witschas dobru powěsć zdźěli, zo ma so hišće lětsa dróha wot kružneho­ wobchada pola Serbskich Pazlic­ přez Miłoćicy hač k statnej dróze S 100 wutwarić započeć. Prěni wotrězk wopřijima dźěl wot kružneho wobchada hač do Miłoćic. Dalši wotrězk powjedźe wot S 100 hač do Miłoćic a skónčnje chcedźa puć we wsy samej wutwarić. Po słowach přirjadowaneje wokrjesa dr. Romy Reinisch pak budźe ćežko, w Miłoćicach dosć šěroke chódniki zawěsćić.