Krótkopowěsće (27.08.25)
Brechowa dźiwadło wopytała
Budyšin. Społnomócnjena sakskeho statneho knježerstwa za naležnosće Serbow Franziska Brechowa je wčera Němsko-Serbske ludowe dźiwadło wopytała. Intendant Lutz Hillmann a zarjadniski direktor Ronald Kohrs jej dźiwadło předstajištaj a mjez druhim zhromadne dźěło ze serbskimi institucijemi a financne naležnosće dźiwadła wuswětlištaj.
Liča z wjace nadpadami wjelkow
Drježdźany. Fachowcy za wjelki liča z tym, zo w přichodnych tydźenjach nadpady rubježnych zwěrjatow na domjacy skót přiběraja. Přičina toho je biologija wjelkow, wšako maja w nalěću a lěću młodźata. W pózdnim lěću a nazymje trjebaja dale a wjac picy, čehoždla potom tež nadpady na domjacy skót přiběraja. Krajny zarjad za wobswět, geologiju a ratarstwo tuž plahowarjow skotu namołwjeja, zo wěstotne naprawy za škit dodźerža.
Europske spěchowanske srědki
Policija (26.08.25)
Fake-powěsće policije w medijach
Zhorjelc. Zastojnicy policajskeje direkcije w Zhorjelcu su zwěsćili, zo rozšěrjeja so tuchwilu w socialnych medijach falšowane zdźělenki policije, kotrež wěrnosći njewotpowěduja. Wjacore facebook-skupiny rozprawjeja wo zhubjenej sydomlětnej Lizy Vogel w Budyšinje, za kotrejž policija z psami a helikopterami pyta. Powěsć je „fake“ – njewěrna. Wobšudźerjo tajke zdźělenki wužiwaja, zo bychu sensibelne daty wužiwarjow dóstali. We wobłuku wopačneho přinoška běchu čitarjow mjez druhim namołwjeli, zo swoje facebookowe daty zapodadźa. Policija naležnje namołwja, zo čitarjo wopačnu powěsć njedźěla a swoje daty njezapodadźa.
Jubilej města sobu woswjećić
Běła Woda. Město Běła Woda woswjeći štwórtk, 28. awgusta, swój 90. jubilej spožčenja měšćanskeho prawa a přeprosy wšitkich zajimcow wot 15 hodź. na oficialny dźěl swjedźenja na tamniše torhošćo. W 19 hodź. předstaja w sociokulturnym centrumje Telux inscenaciju dźiwadłoweho krucha Shakespeara „Othello“ we wobłuku Łužiskeho festiwala. Zastupne lisćiki předawaja online pod: .
Informuja wo Krabaće
Wojerecy. We Wojerowskim Łužiskim centeru, napřećo Brězanec kofejowni, wotewri Krabatowe towarstwo zhromadnje z projektom ZARI – syću za serbsku rěč a identitu Krabatowu stwu. W tutym zwisku přeprošujetej projektna koordinatorka Krabatoweho towarstwa Simona Kurthec a rěčna motiwatorka projekta ZARI Marija Šołćic swójby z dźěćimi na čitanje z knihi „KRABAT und das Geheimnis der Schwarzen Mühle“ a to štwórtk, 28. awgusta, w 14 hodź. Nimo toho poskićuja tam dalše interaktiwne hry z postawami serbskich bajow kaž tež zhromadne paslenje. Wobdźělenje je darmotne.
Lětni koncert chóra Meja
Miłočenjo zhromadnje swjećili
Poradźena kubłanska jězba župy
Běše to jara poradźena a informatiwna kubłanska jězba, kotruž je Wojerowska župa minjenu sobotu organizowała. 44 wosobow je so na zhromadnej wuprawje wobdźěliło. Najprjedy podachmy so do Njechornja, do Domu Měrćina-Nowaka-Njechorńskeho. Tu wočakowaštaj nas Budyska županka Leńka Thomasowa a čłon Budyskeho župneho předsydstwa Florian Kießlich. Wonaj wodźeštaj nas w dwěmaj skupinomaj po domje najwuznamnišeho serbskeho ludoweho molerja. To staj wobaj jara zabawnje a nazornje zdokonjałoj.
Tysac hosći w Budyskej klinice
Prěnja „Běła nóc mediciny“ wočakowanja organizatorow přetrjechiła
Budyšin (CS/SN). Minjeny pjatk su Budyske Hornjołužiske kliniki (OLK) wšitkich zajimcow prěni raz na zarjadowanje „Běła nóc mediciny“ přeprosyli. Organizatorojo wšak běchu so dobreho wothłosa nadźijeli, wjace hač 1 000 wopytowarjow pak je jich wočakowanja wulce přetrjechiło.
W zašłych měsacach su w Budyskej chorowni wjele nowostkow zawjedli. Na „Běłej nocy mediciny“ je zamołwići zjawnosći bliže předstajichu. Tak su pjatk dopołdnja nowy operaciski roboter swjatočnje poswjećili. Wosebity highlight za hosći běše dalši, kubłanski model robotera, na kotrymž móžachu so sami wuspytać.
Za kulisy su wopytowarjo tež w laborje za katetry wutroby, w centrumje za schorjenje hrudźe abo w geriatriskim centrumje pohladnyli. We wšitkich mjenowanych wotrjadach je w poslednim lěće tójšto nowych lěkarjow swoju słužbu nastupiło. Woni su tu mjez druhim někotrežkuli ponowjenje nastorčili. Z prawom je jednaćel OLK Jörg Scharfenberg hordy na tele změny, kotrež su wobstatk tak mjenowaneho „medicinskeho koncepta 2030“.
Ze serbskimi temami so hižo wjele lěta zaběra (2)
Domowina je spočatk apryla we Wulkich Zdźarach rěčny projekt DOMOJ zahajiła. To je intensiwny kurs serbšćiny, kotryž dźewjeć měsacow traje. Dohromady jědnaće wobdźělnikow wuknje zhromadnje w tak mjenowanym rěčnym hnězdźe. W přichodnych tydźenjach jich w našim wječorniku předstajimy. Ronny Böhme měni, zo dyrbi serbskosć widźomniša być.
Jako dźěćo, kotrež je w małej wjesce „Schwosdorf/Šwobice“ při Via Regiji a Jakubowym puću wotrostło, sym so serbšćiny jenož mało dótknył. Ze swojim dźědom podach so w prózdninach dwójce wob tydźeń z busom do „wulkeho města“, do Kamjenca. Tam „zetkach“ serbsku rěč kaž tež narodnu drastu. Přiwšěm pak bě mi serbska rěč tehdy hišće njeznata. Wažne tehdy mjenujcy njebě, zo našu regionalnu rěč w šulach wučimy a wuknjemy. Wažniše bě, zo wšitke dźěći rěč našich pozdatnych komunistiskich „přećelow“ rěča. Kaž wěmy, bě to jenož statny plan ze srěnim wuspěchom. A čehodla přiwšěm runje serbsce?
Krótkopowěsće (26.08.25)
NSLDź sezonu zahajiło
Budyšin. Němsko-Serbske ludowe dźiwadło je wčera hrajnu dobu 2025/2026 oficialnje zahajiło. Prěnje předstajenje noweje sezony za dorosćenych budźe pjatk na dźiwadłowej zahrodźe ze sceniskim čitanjom „Die Känguruh-Chroniken“, zestajane z popularneho rjadu romanow Marca-Uwe Klinga. Za dźěći pokazaja na samsnym městnje wot dźensnišeho klankodźiwadło „So war das! Nein, so! Nein, so!“ po knize Kathrin Schärer.
Ralbičanska šula 50 lět
Ralbicy. Lětsa je tomu 50 lět, zo su w Ralbicach nowu šulu natwarili. Kaž nawodnica tamnišeje wyšeje šule Milenka Koberowa zdźěli, chcedźa jubilej w septembrje na wšelake wašnje woswjećić. Skupinka šulerjow a wučerjow poby wčera w Drježdźanach, hdźež nahrawachu w studiju Ballroom za jubilej spisany spěw. Twórbu z pjera Marhaty Cyžec-Korjeńkoweje na tekst Milenki Koberoweje a Jana Rjedy předstaja na šulskim swjedźenju 26. septembra 2025 prěni raz zjawnje.
Twarja nowy rozdźělak
Policija (25.08.25)
Z awtom na třěchu so zwróćiła
Rěčicy. 19lětna młodostna je sobotu wječor na zwjazkowej dróze B115 w Rěčicach (Rietschen) znjezbožiła. Po puću do směra Stanojšća (Stannewisch) zhubi wona w křiwicy kontrolu nad swojim jězdźidłom a zjědźe z jězdnje. Awto so přewali a wosta na třěše ležo. Šoferka so jenož lochce zrani. Wěcna škoda wučinja něhdźe 10 000 eurow.
Twarske graty pokradnyli
Połčnica. Njeznaći su so kónc tydźenja na twarnišćo při Dr. Wilhelma Külzowej dróze w Połčnicy zadobyli. Skućićeljo pokradnychu w bydlenjach a pincach nowotwara twarske graty a dalše nastroje w cyłkownej hódnoće 1 500 eurow. Kriminalna słužba Kamjenskeho policajskeho rewěra podawk přepytuje.
Młodostny z motorskim znjezbožił
Jenkecy. Młodostny běše sobotu dopołdnja ze swojim motorskim marki Suzuki na zwjazkowej dróze B 6 w Jenkecach po puću dele. Jako před nim jěducy 33lětny šofer ze swojim wosobowym awtom marki VW njejapcy horu dele zaborzdźi, zrazy 19lětny ze swojim motorskim do awta. Při tym so lochce zrani. Chorobna słužba jeho do chorownje dowjeze. Wěcna škoda wučinja něhdźe 3 000 eurow.
Pomnik za zasłužbnych Zejičanow wotkryli
Zejicy (SN/MiP). Sy-li wčera popołdnju na Kamjenskej dróze přez Zejicy jěł, sy na jednym boku tamnišeho křižowanišća połne parkowanišćo a na tamnym boku při wjesnym křižu syłu ludźi wuhladał. Tam běchu Zejičenjo zhromadnje z Maćicu Serbskej a Towarstwom Cyrila a Metoda (TCM) na wosebitu swjatočnosć přeprosyli: Wotkryće a poswjećenje pomnika za třoch zasłužbnych prjedownikow, kotřiž běchu so w Zejicach narodźili. Su to prelat a čestny kanonik Jakub Buk a kanonikaj Michał Buk a Jakub Šuba.
