Wojerecy (AK/SN). Energetiske saněrowanje wulkeje sportownje Zastaranskich zawodow Wojerecy (VBH-arena) su tamniši měšćanscy radźićeljo tydźenja wutoru na swojim rjadnym posedźenju schwalili. Sportowy klub Wojerecy z.t. a město Wojerecy stej w tutym zwisku zrěčenje podpisałoj. Towarstwo je twarski knjez wšitkich planowanych naprawow runje tak kaž próstwystajer wo spěchowanske srědki.

Cyłkowne kóšty saněrowanskeje ­naprawy wučinjeja něhdźe 2,3 miliony eurow. 75 procentow tuteje sumy fi­nancuja ze spěchowanskimi srědkami Europskeho fondsa za regionalne wu­wiće (EFRE). Město Wojerecy ma dźesać procentow swójskeho podźěla – to je dohromady 235 000 eurow. Zbywace 15 procentow zaručeja ze spěchowanskimi srědkami sakskeho programa za naslědne ponowjenje měšćanskich štwórćow.

Za tři lěta móhło so pjeć 160 metrow wysokich wětrnikow w Bóšicach wjerćeć

Wětrow/Bóšicy (SN/MiR). Park wětrnikow w Bóščanskej gmejnje wobsteji wot lěta 2001. Poprawom běše wobhospodarjenje na dwaceći lět wobmjezowane. Mějićeljo su so w tym času wjace króć měnili, dokelž su park jedyn druhemu předali. Nětčiši mějićel, Mnichowska firma, je wo podlěšenje zrěčenja wo pjeć lěta prosyła. Mjeztym pak zrěčenje mjez gmejnu a mějićelom parka bórze wuběži. Hač park wětrnikow perspektiwu změje, to tuchwilu jasne njeje, byrnjež wjesnjanosta lětsa w nalěću gmejnsku radu wo tym informował, zo je za park wětrnikow nowych idejow. Mějićel běše připowědźił, zo chce tuchwilnych dźesać wětr­nikow zwottorhać a za to pjeć nowych natwarić. Te maja 160 metrow wysoke być a porno dźensnišim nimale dwójce tak wulku kapacitu měć. Wobstejace fundamenty starych wětrnikow wužiwać nochcedźa, přiwšěm pak postaja je w Bóščanskim parku wětrnikow. Nowe wětrniki dyrbjeli w lěće 2028 nastajene być a najpozdźišo wot lěta 2029 dźěłać. ­„Aktualnje pak njejsmy hižo dlěje wo připowědźenych planach Mnichowčanow słyšeli.

Žadyn zawodny swjedźeń lětsa

Budyšin. Lětuši zawodny swjedźeń sobudźěłaćerjow města Budyšin wupadnje. Za organizaciju zamołwity team je event wčera wotprajił. Hladajo na zjawne wobchadźenje z pedagogiskim personalom nječuja so hižo kmani swjećić. Z tym wočiwidnje přećiwo wuprajenjam wyšeho měšćanosty Karstena Vogta (CDU) protestuja, kiž sej w konflikće z financnym měšćanostu dr. Robertom Böhmerom wot­twar personala w pěstowarnjach žada.

Wokrjes prawnisce pruwuje

Budyšin. Hač do kónca septembra je krajna direkcija Budyskemu wokrjesej lětsa 395 dalšich Ukrainjanow připokazała – wjele wjac hač wšěm druhim wokrjesam (na přikład Rudne horiny 146, Šwikawa 25). Krajnoradny zarjad chce to prawnisce pruwować, wšako maja dosć dźěła z přiwzaćom tež tych ćěkancow, kotřiž we wokrjesu njewostanu.

Zapósłanča šulu wopytała

Njeswačidło. Šwišk (Hausrotschwanz) – ptačk našeje domizny – je Ptačk lěta 2025. Štóž chce wjace wo nim zhonić, njech poda so sobotu, 8. nowembra, na fachowe zarjadowanje do Njeswačanskeje přirodoškitneje stacije. W času wot 9.30 do 16.30 hodź. přeradźa fachowcy tójšto zajimawych faktow wo spěwatym ptačku. Zamołwići proša wo přizjewjenje pod abo telefonisce pod čo. 035933 179862. Wobdźělenje je darmotne, wo pjenježny dar so prosy.

Radšo muzej wopytać

Budyšin. Na Budyskim nakupowanskim wječoru sobotu, 8. nowembra, tež měšćanski muzej w času mjez 16 hodź. a 20 hodź. swoje durje wotewrje a přeprošuje na darmotny wopyt trajneje ­wustajeńcy, noweje wosebiteje wusta­jeńcy „Budyšin fascinuje – napohlady ­na město wot 1620 do 1900“ kaž tež ­kabinetneje wustajeńcy z fotami Budyskeho fotoweho chronista Rolfa Dvora­ceka. Za małych a wulkich zajimcow su zamołwići muzeja tež staciju z klankodźiwadłom přihotowali. Tu móža so ze zhotowjenjom klankow zaběrać a dožiwja nimo toho krótke sceny z klankami. Wonka před muzejom budźe mały ­woheń, w kotrymž móžeš sej chlěb na ­kiju spjec.