Drježdźany (NH/SN). Błóćanych pućow dla je planowane pućowanje Drježdźanskich serbskich swójbow po Drježdźanskej holi minjenu njedźelu wupadnyć dyrbjało. Jako narunanje poskićichu zajimcam samsny dźeń móžnosć zetkanja na znatej plantaži při „Jahodowej kofejowni“ w Moritzburgu. Poskitk wuži jeno mała horstka. Třo dorosćeni a pjeć dźěći da sej najprjedy lód, kofej a tykanc zesłodźeć. Byrnjež so sčasami dešćowało, mějachu dźěći na hrajkanišću wjele wjesela. Znajachu dźě so ze skupiny serbskeje dnjoweje maćerje w Drježdźanach kaž tež wot zašłych zeńdźenjow dźěćaceho kružka. Přichodne zetkanje kružka je za awgust planowane.

Kino při Sprjewi

Budyšin. Při tak mjenowanym kolenje Sprjewje w Budyšinje pokazuje tudyši Kamjentny dom srjedu, 16. julija, španiski historiski drama „Der Lehrer, der uns das Meer versprach“. Film jedna wo idealistiskim wučerju, kiž w španiskej wsy přećiwo konserwatiwnym mocam wojuje. Zastup je wot 20 hodź. Film započnje so při ćmičkanju mjez 21 a 22 hodź. Zastup płaći wosom eurow.

Dalša rěčna swětłownja

Rěku zanjerodźili

Budyšin. Dźakowano pokiwej swědka je policija njedźelu wječor zwěsćiła, zo je Sprjewja w Budyšinje při Mosće swjateho ducha zanjerodźena. Na wodźe płuwaše módra so błyšćata maćizna, při kotrejž so po wšěm zdaću wo lak jednaše. Alarmowana wohnjowa wobora je proby z rěki wzała. Pozdźišo tež zwěsćichu, hdźe je so maćizna do rěki dóstała. Kriminalna policija pad dale přepytuje.

Spytaja wobšudźić

Budyšin. Wot měrca tohole lěta dóstawaja wobydlerjo a firmy w Budyskim a Zhorjelskim wokrjesu mailki abo listy, kotrychž wotpósłar je pječa Němska zakonska zawěsćernja za njezboža (DGUV). W nich připowědźa so nowy digitalny model prewencije, za kotryž měli adresaća pjenjezy na španiske konto přepokazać. Před tym policija wuraznje warnuje. Štóž je tajku mailku dóstał, njech to policiji zdźěli, zo móhli zastojnicy za woprawdźitym wotpósłarjom slědźić.

Hamorska gmejna nadawki planowanja přepodała

Wochozy (AK/SN). Turistisku a hospodarsku infrastrukturu Wochožanskeho Parka błudźenkow chce Hamorska gmejna dale rozšěrjeć. To chcedźa ze srědkami strukturneje změny docpěć. Za to je Hamorska gmejnska rada wčera wjacore planowanske nadawki rozdźěliła.

Zo bychu so ludźo před wohenjemi škitali, su před něhdźe połdra lětstotkom tež w Hornjej Łužicy wohnjowe wobory załožeć započeli. W našej lětnjej seriji chcemy někotre z nich předstajić a jich stawizny rozłožić. (5)

Hišće derje w pomjatku mamy wobrazy swjedźenskeho ćaha składnostnje 800. róčnicy Chrósćic. W nim běchu tež tamniši wohnjowi wobornicy ze swojim nawodu Benom Hojerom widźeć. Na čole Chróšćanskeje gmejnskeje wohnjoweje wobory steji hłowny hašenski mišter Měrćin Jakšt. Prjedy hač je 40lětny swoju dźensnišu funkciju přewzał, nawjedowaše wón wot lěta 2011 tři lěta Chróšćansku wjesnu woboru.