Lejno (AK/SN). Gmejna Halštrowska Hola chce turistisku infrastrukturu při Lejnjanskim jězoru dale wutwarjeć. Na to su so čłonojo gmejnskeje rady na swojim zašłym posedźenju dojednali. Za přistawnišćo a dalše płuwace chěže při hotelu „Swětłownja“ ma so twarski plan nastajić.

Próstwu za to je jednaćelka hotela Heike Struthoff zapodała. Twarić ma so na něhdźe hektar wulkej płoninje. Přistawne městna maja koncept gastronomije a hotela dale wudospołnjeć. Z tym reaguje hotal na naprašowanja wopytowarjow, kotřiž chcyli ze swojim čołmom rady bjezposrědnje při nim zastać. Gmejna wotzamknje z hotelom dołhodobne wotnajenske zrěčenje, tak zo móža na dlěši čas planować. Wona tež wšitke wudawki za posudki a planowanja zapłaći.