Serbske powěsćowe postawy bórze we Łužiskim centeru widźeć
Wojerecy (KD/SN). Nutřkowne Łužiskeho centera we Wojerecach so tele dny přeměnja. Bórze wuhladaja hosćo tam wšelake motiwy z łužiskich a serbskich powědkow. Z tym zwoprawdźa managerka centera Madeleine Matschke předewzaće, z kotrymž je so hižo dlěši čas nosyła. Slepjanski tworjacy wuměłc Jörg Tausch wuhotuje tuchwilu štyri sćěny tak mjenowaneho swětłoweho dwora při hosćencu „Mysticus“ z motiwomaj lutkow a hadźaceho krala, ze scenu z powěsće wo Krabaće a ze stacijemi ze žiwjenja chorwatskeho obrista Janka Šajatowića, kotryž bě zakład za figuru dušneho kuzłarja Krabata.
