Na swojim turněrje konjaceho sporta je Njeswačanske jěchanske ...
Při křižowanišću korčmarili
We łužiskich wsach běchu stajnje hižo najwšelakoriše rjemjesła zakótwjene a su so zdźěla lětstotki zachowali. Dźensa je so wulki dźěl z tychle rjemjesłow bohužel pozhubił. W našej lětnjej seriji chcemy wobswětlić, hdźe běchu kotre rjemjesła doma a kotre wosebitosće su so při tym wobkedźbowali. (5)
Jěducy po dróze z Chrósćic do Delan, wuhladaš w Lejpoldźe hižo znazdala tykowany dom za wulkej lipu. Twarjenje ma zajimawe stawizny.
Krótkopowěsće (25.06.24)
Stup dale njepopušći
Drježdźany. Drježdźanske towarstwo Stup dale chce z nowymi wobsahami dotalnych a dalšich čłonow do dźěła wabić.
Mjez druhim chcedźa škotowy turněr přewjesć. Dale móhli sej přirodny camp za serbske swójby w lětnich prózdninach předstajić a mejlowy rozdźělak ma so ponowić. Dźěćacy kruh porno tomu chcedźa dale wjesć.
Spěchuje pólsko-sakske projekty
Drježdźany. Europska unija financuje we wobłuku spěchowanskeho programa Interreg Pólska-Sakska štyri nowe mjezy přesahowace projekty z dohromady 5,5 milionami eurow. Mjez nimi je z 1,1 milionom spěchowany projekt, w kotrymž kooperuja Pólski centrum za technologiske wuwiće z Wrócławja, TU Drježdźany a Budyski centrum załožićelow tzwr na dobro wuwiwanja MINT-kompetencow młodostnych.
Hornjołužičan nowy šef
Policija (24.06.24)
Dźěćo so při wohenju zraniło
Budyšin. Wuchowansku słužbu, wohnjowu woboru a policiju wołachu sobotu wječor na Einsteinowu w Budyšinje. Tu bě krótko po 19 hodź. w dźěćacej stwě bydlenja na pjatym poschodźe wjaceswójbneho domu woheń wudyrił. Płomjenja na meble přeskočichu. Kaž w rozprawje Zhorjelskeje policajskeje direkcije rěka, móžachu wobornicy woheń spěšnje zhašeć a tak dalšemu rozšěrjenju zadźěwać. Jědnaćelětneho hólca dyrbjachu podhlada zajědojćenja z kurom dla do chorownje dowjezć. Podružnicy dom samostatnje wopušćichu a móžachu po zakónčenju zasadźenja zaso do swojich bydlenjow. Jenož w potrjechenym bydlenju najprjedy raz nichtó bydlić njemóže. Wohenja a kura dla nasta w nim něhdźe 25 000 eurow škody. Při hašenju bě 14 kameradow Budyskeje powołanskeje wohnjoweje wobory zasadźenych a dźewjeć kolegow dobrowólneje wohnjoweje wobory Budyšin-centrum z dohromady pjeć wohnjowobornymi awtami.
Pater Fabian primicu woswjećił
Public viewing w muzeju
Choćebuz. Serbski muzej w Choćebuzu přeprošuje fanow Serbskeho mustwa na Europeadźe 2024 na public viewing na dworje muzeja w Młynskej dróze 12. 30. junija móžeće sej hru wubranki serbskich muži přećiwo wubrance narodneje mjeńšiny Romow w 11 hodź. a w 14 hodź hru serbskeje žónskeje wubranki přećiwo koparkam z Južnoschleswigskeje wobhladać. Stej to prěnjej hrě Serbskeho mustwa na lětušej Europeadźe, kotraž budźe wot 28. junija do 7. julija w němsko-danskim namjeznym kraju.
Na wjesny swjedźeń
Nowa Wjeska. Na wjesny swjedźeń přeprošuja přichodny kónc tydźenja w Nowej Wjesce. Zazběh je „Malle Party“ pjatk wječor, 28. junija. Sobotu wječor přeprošuje Melodia Diskoteka z hudźbu z 80tych, 90tych a z 2000tych lět na reje. Njedźelu, 30. junija, je popołdnjo za swójby z kofejom a tykancom. Dźeń wuklinči wječor z kónčnej party z DJjom Dehn Sound.
Dźěło na čerstwym powětře
33 lět za ródnu wjes so angažował
Po 33 lětach złoži Siegbert Bogott, wjesny předstejićel a něhdyši wjesnjanosta w Zabrodźe swoje zastojnstwo. Jost Schmidtchen je so z nim rozmołwjał.
Knježe Bogotto, Wy sće rodźeny Zabrodźan a sće čas žiwjenja tu bydlił. Wróćo zhladujo, kotre dopomnjenki maće?
S. Bogott: Tu sym do pěstowarnje a do šule chodźił. 1971 su šulu zawrěli – to dyrbjach potom do Blunja a Bjezdowow chodźić. 9. a 10. lětnik sym na PWŠ w Nowej Wsy absolwował. Srjedź 1970tych lět nawuknych pola Ludoweho wozydłownistwa Čorna Pumpa powołanje zamkarja. Jako běch so ze słužby pola NLA wróćił, dźěłach jako wozydłownik pola zawoda BuS we Wjelceji. Bórze na to je murja padnyła. Zawod su potom rozpušćili. 1997 sym na twarskim dworje gmejny Halštrowska Hola dźěłać započinał. Mjeztym zawod hižo wjace hač 20 lět nawjeduju. Přichodne lěto chcu so na wuměnk podać.
Hdy sće jako wjesnjanosta skutkować započinał?
S. Bogott: 1991 su mje Zabrodźenjo za wjesnjanostu, 1995 – ze załoženjom gmejny Halštrowska Hola – za wjesneho předstejićerja wolili. Nadawki pak so z tym změnili njejsu. Dźěła w Zabrodźe běše dosć a na dosć.
Što měniće?
Wulki hołk a tołk w klóštrje
Tysacy ludźi lětsa zaso klóšterski a swójbny swjedźeń wokrjesa wopytało
Pančicy-Kukow (JŠn/SN/MiP). Lěto wob lěto přiwabi klóšterski a swójbny swjedźeń Budyskeho wokrjesa w klóštrje Marijinej hwězdźe tysacy ludźi do Pančic-Kukowa. Lětsa běše jich dohromady 4 500. Zarjadowanje steji pod patronatstwom abatisy Gabriele Hesse a Budyskeho krajneho rady Uda Wićaza (CDU).
Ze swjedźenskej Božej mšu zahaji biskop Zhorjelskeho biskopstwa Wolfgang Ipolt dźeń na swjatočne wašnje w klóšterskej cyrkwi. Njebjelčanski cyrkwinski chór pod nawodom Krystofa Mikławška je kemše hudźbnje wobrubił. Na klóšterskim dworje, w klóšterskej zahrodźe kaž tež kołowokoło njeje běchu runja zašłym lětam regionalne a přirodowe wiki, na kotrychž je wjace hač 50 wikowarjow z wokoliny swoje produkty prezentowało. Nic jenož lubowarjo regionalnych delikatesow su tu na swoje kóšty přišli, tež fanojo domoródneho rjemjesła su tón abo tamny rjany a žadny kruch nadešli. Wot připołdnja powita kapała wohnjowych wobornikow z Frankenthala hosći z wjesołej dujerskej hudźbu.
Změna wuzwoleneju
Budyšin (SN/at). Wokrjesny wólbny wuběrk je doskónčny wuslědk wólbow Budyskeho wokrjesneho sejmika z 9. junija zwěsćił. Kaž po zjawnym posedźenju minjeny štwórtk dźeń pozdźišo w medijowej informaciji zdźěla, zwěsćeny doskónčny rezultat „hladajo na rozdźělenje sydłow stronam a wólbnym zjednoćenstwam wot hižo wozjewjeneho nachwilneho wuslědka njewotchila“. Tak su mandaty znowa třoch serbskich wokrjesnych radźićelow Jana Budarja (Serbske wolerske zjednoćenstwo), Alojsa Mikławška a Dawida Statnika (wobaj CDU) wobkrućene.
Trěbne korektury na nachwilnym wuslědku zawinowachu w dwěmaj padomaj změnu wuzwoleneju a narunanskeju wosobow. We wólbnym wokrjesu 2 wobsadźi za FDP docpěty sydło nětko Sven Gabriel, porno tomu su Andreasa Pecha za narunansku wosobu pomjenowali.
Jedne sydło CDU ma so wólbnemu wokrjesej 9 přirjadować město wólbnemu wokrjesej 3. Tuž je Christoph Mehnert narunanska wosoba, za wokrjesneho radźićela wuzwoleneho je prof. dr. Peter Schierack.
