Sakska mjez hnězdomaj aziskeho šeršenja
Njeswačidło (UM/SN). W Sakskej ju hišće wuhladali resp. dopokazali njejsu, ale to drje je jenož prašenje časa: Aziski šeršeń z łaćonskim mjenom Vespa velutina, so w srjedźnej Europje rozšěrja. „Tuta družina šeršenja je 2014 z łódźu ze Chiny do Francoskeje přišła“, rozłoži Marion Loeper. Drježdźanska pčołarka mjeztym hižo 15 lět dołho wo wobchadźenju z wosami a šeršenjemi poradźuje a po potrjebje tež hnězda přesadźuje. Póndźelu, 27. januara, wona zhromadnje z Njeswačanskej přirodoškitnej staciju tajke poradźowanje wo aziskim šeršenju w Njeswačidle přewjedźe. To wukonja w nadawku Sakskeje krajneje załožby za přirodu a wobswět. Započinaja we 18.30 hodź. w Knježim hosćencu. Insekt zwěsćichu hižo we wjacorych zwjazkowych krajach. „2023 namakachu ludźo hnězdo w Berlinje, w samsnym lěće jedne blisko Plzena. Sakska leži runje mjez tutymaj hnězdomaj. Dyrbimy potajkim jara kedźbliwi być“, Marion Loeper rozłoži.
Wjace hač 120 mjenow wuslědźili
Za nowe knižne wudaće wo Chrósćicach pytamy w LND tuchwilu za mjenami zwobraznjenych na fotomaj z lěta 1937. Wutrobny dźak wšitkim, kiž su mjena a pokiwy zapodali! Aktualizowanu lisćinu dotal znatych mjenow k poslednjej kontroli a wudospołnjenju wozjewimy dźensa na internetnej stronje SN. Tohorunja předleži nam z archiwa lisćina wšitkich Hórčanskich dźěći, kiž chodźachu w aprylu 1937 do Chróšćanskeje šule kaž tež lisćina prěnjowoprawjenskich dźěći. Prawdźepodobnje běše fotowy termin za cyłu šulu w měrcu 1937, potajkim kónc šulskeho lěta. Tuž su na druhim foće (F2) tež šulerjo ródneho lětnika 1922/23 widźeć a na prěnim foće (F1) tež šulerjo ródneho lětnika 1926/27.
Link k fotam a lisćinam:
Zapósłanča na rozmołwje
Kak dale ze zbytkom pjenjez?
Róžant (JK/SN). Na list, kotryž je gmejnska rada Ralbic-Róžanta loni krótko do hód sakskemu ministerskemu prezidentej Michaelej Kretschmerej (CDU) pisała, njejsu hač do wčerawšeho hišće wotmołwu dóstali. W lisće běchu jeho na slubjenje dopominali, zo so nowotwar pěstowarnje a přetwar stareje pěstowarnje na hort na kóždy pad spěchujetej a zwoprawdźitej. To je nětko wjac hač wohrožene. Pěstowarnja drje steji, ale je telko wjac pjenjez z hornca, kotryž bě za projekt předwidźany, přetrjebała, zo njezwostanje telko, zo móhli tež hort natwarić.
Dynamiku přirody zachować
Guido Budar wot spočatka lěta rewěrowy hajnik klóšterskich lěsow
Pančicy-Kukow. Klóšter Marijina hwězda w Pančicach-Kukowje njeje w Hornjej Łužicy jenož jedyn z najwjetšich dźěłodawarjow, wón je tohorunja jedyn z najwjetšich wobsedźerjow lěsa. Dohromady něhdźe 2 500 hektarow jich je. Ležownosće sahaja Porchowa do Wojerec a wot Delan hač do Bernstadt a.d.E. Za nje ma klóšter swójskeho rewěroweho hajnika. Wjele lět bě to Ullrich Furchner, kiž je so wobhladniwje wo klóšterske lěsy starał. Po tym zo je so wón kónc minjeneho lěta na zasłuženy wuměnk podał, je jeho dźěło spočatk januara Guido Budar z Noweje Wjeski přewzał. 40lětny je w Tharandźe lěsnistwo studował a so wot oktobra z podpěru swojeho předchadnika do noweho zastojnstwa zadźěłał. Do toho staraše so jako rewěrowy hajnik wo lěsniski rewěr w Słóńcy (Großschweidnitz).
Krótkopowěsće (24.01.25)
Młodźinski kruh insolwentny
Drježdźany. Dźěćacy a młodźinski kruh Hornjeje Łužicy po 33 lětach dźěłać přestanje. Přičina toho su financielne ćeže. Tohodla žada sej institucija tež hladajo na tamne organizacije wěste financielne ramikowe wuměnjenja, dokelž je wažne młodźinske dźěło w Sakskej zaručić. Předewšěm w Zhorjelskim wokrjesu bě dźěćacy a młodźinski kruh aktiwny. Tam njebudźe hižo narěčenskich partnerow.
Jasnje wjace dušaceho kašela
Drježdźany. Zarjady w Sakskej su loni jasnje wjace padow dušaceho kašela registrowali hač lěto do toho. Tuchwilna statistika krajneho přepytowanskeho instituta wuchadźa z toho, zo bě loni 1 764 padow, štož je rekord. Cyłkownje bě w lěće 2023 jenož 116 padow. Předewšěm dźěći, młodźina a młodźi dorosćeni běchu potrjecheni.
Kandidaća za Serbski sejm online
Projektowy chór zwučuje
Rozsudźene hišće ničo njeje
Gmejna wo přichodźe Miłočanskeje skały rozmysluje
Njebjelčicy (JK/SN). Zjawny dźěl wčerawšeho posedźenja Njebjelčanskeje gmejnskeje rady bě poměrnje spěšnje nimo, hačrunjež bě dosć naročnych temow a diskusijow. Po tym zo bě planowarka z inženjerskeho běrowa Panse stejišća zastupjerjow zjawnych zajimow předstajiła, wobzamkny rada za Pěskecy, zo zhotowi wobtwarjenski plan za přichodny twarski areal „Pěskecy – wuchodnje Parkoweje dróhi“. Naćisk plana běchu hižo loni schwalili a jón zjawnje wupołožili. Nětko móže gmejna pokiwy a stejišća wobdźělnikow wobkedźbować a konkretnje planować.
W nowembrje běchu wjesne wohnjowe wobory gmejny hłowne zhromadźizny přewjedli. W Njebjelčicach a Miłoćicach wuzwolichu w tym zwisku nowe wjednistwo. Nowych nawodow woborow gmejnska rada wčera jednohłósnje wobkrući. Za Njebjelčicy staj to Michał Ričel a jeho zastupjerka Julija Wroblewscyna. W Miłoćicach nawjeduje nětko woboru Dominik Kral a jeho zastupuje Domenico Cyž.
Nowy dowolowy magacin wušoł
Policija (23.01.25)
Bjez jězbneje dowolnosće jěł
Łaz. Dwě hodźinje su zastojnicy Wojerowskeho policajskeho rewěra wutoru kontrolowali, hač šoferojo we Łazu na dróze Při parku předpisanu spěšnosć 30 km/h dodźerža. Dohromady přepruwowachu 67 jězdźidłow. Dźesać šoferow bě přespěšnych a dyrbi nětko warnowanski pjenjez zapłaćić. We wobłuku tuteje kontrole zwěsćichu zastojnicy nimo toho dalši njeskutk. Jedyn muž, kotrehož kontrolowachu, bě mjenujcy 57lětny wodźer Forda. Jako jeho zadźeržachu, njemóžeše wón jězbnu dowolnosć předpołožić. Kaž muž na naprašowanje rjekny, njeje hišće ženje jězbnu dowolnosć wobsedźał. Za to dyrbi so wón nětko na sudnistwje zamołwić.
