Gmejnscy radźićeljo wo aktualnym ­stawje twarskeju projektow rěčeli

Slepo (AK/SN). Nowotwar wohnjowo­borneje gratownje w Slepom je nimale zakónčeny. Poslednje dźěła maja po móžnosći hač do kónca januara wotzamknjene być. Tole podšmórny nawoda twarskeho zarjada Slepjanskeho zarjadniskeho zjednoćenstwa Steffen Seidlich wčera na posedźenju Slepjanskeje gmejnskeje rady.

„Nutřka je nětko wšitko hotowe“, Seidlich rozłoži. Na nuzniku su sćěny zatwarjene a tež škričkowanske městno je instalowane. Wot stareje gratownje su mjeztym sirenu wottwarili a na nowe městno přenjesli. Elektrofirma hišće někotre mjeńše změny zwoprawdźi. Mjez druhim lampje při gratowni a wěži tak přetwarja, zo so wonej wodnjo hižo njezaswěćitej. Přichodnu póndźelu chcedźa na wonkownych připrawach dale dźěłać. Hač do kónca januara ma wšitko doči­njene być, tak Steffen Seidlich.

Bukečanska biblioteka ma wotnětka tež knihi ze serbskej tematiku. Bibliotekarka Martina Schröderowa a zastupjerka Bukečanskeje Bjesady Hanaróža Šafratowa, kotraž je knihi wupytała a wobstarała, stej wčera knihi w bibliotece zarumowałoj. Knihi je gmejna ze sakskeje pawšale za dwurěčne komuny we wysokosći 400 eurow zapłaćiła. Biblioteka je přeco wutoru wot 15 do 17 hodź. wočinjena. Čłonojo Bjesady chcedźa knihi tež bórze zjawnosći předstajić. Foto: Mato Krygar

W Rakečanskej cyrkwi maja hižo wot lońšeho nowembra wosebitu instalaciju ze swěcu a hudźbu pod titulom „Dobry pastyr“. Stajnje w 20 mjeńšinskim rytmusu zaklinči hudźba wot 9 do 20 hodź. Zastup je darmotny. Hač do 2. februara hišće maja zajimcy składnosć, sej wosebiće wuswjećenu cyrkej wobhladać a sej hudźbu naposkać. Foto: SN/Bojan Benić

Pjenjezy za nowe drasty

Budyšin. Na swojim nowolětnym přijeću přepoda Dirk Hertle, předsyda Lionscluba Budyšin, wčera młodźinskej rejowanskej skupinje Serbskeho ludoweho ansambla, „Łužičanskej rapsodiji“, spěchowanski šek we wysokosći 1 500 eurow. Pjenjezy chcedźa za zhotowjenje trěbnych nowych drastow wužiwać. Za pjenjezy so intendant SLA, Tomas Kreibich-Nawka, wutrobnje podźakowa.

Policist žiwjenje přisadźił

Lauchhammer. Při slědźenju za paduchami awtow je zastojnik Drježdźanskeje policije wčera w Lauchhammeru zemrěł. 32lětny je so na mjezy přesahowacym zasadźenju wobdźělił. Jako chcyše awto kontrolować, tute do njeho zajědźe. Politikarjo z Braniborskeje a ze Sakskeje zwuraznichu swoje sobužarowanje. Dokładne přičiny nastupajo smjerć policista fachowcy nětko přepytuja.

Kriminalna policija přepytuje