Dźensa so lětuše Wjacławske wiki w Budyšinje skónča. Jutře měšćanske zarjadnistwo wozjewi, kelko ludźi je wiki wopytało. Kónc tydźenja smy so někotrych wikowarjow za jich zaćišćemi woprašeli.
Budyšin (CS/SN). Wot lěta 2007 stejitej na Budyskich Žitnych wikach w času Wjacławskich wikow dwě pyramidźe. Nimo hłowneje je to dalša, kotruž ludźo rady pyramidu horceho wina mjenuja. Wona słuša Robertej Heintze z Habrachćic. Hibićiwy muž předawa tam napoj, bjez kotrehož hodowne wiki njewuńdu. Po jeho měnjenju sej ludźo mjez druhim chwala, zo móžeš tam pod suchim stać. Lětsa wšak je so w času Wjacławskich wikow na zbožo lědma dešćowało. Ale tež před wětřikom pyramida škita. Rady wopytowarjo tam zběrku šalkow za horce wino wobdźiwaja, kotrež na wjerchu wisaja. Mjeztym je jich Robert Heintze něhdźe 200 z cyłeho swěta nazběrał. Dokelž ludźo wědźa, zo wón tajke šalki hromadźi, jemu rady dalše daruja. Lětsa je so dźesać nowych přidružiło. Pyramida dyrbi so prawidłownje trochu ponowjeć. Po Wjacławskich wikach Robert Heintze tuž lěto wob lěto tu abo tamnu reparaturu přewjeduje.
