Wojerecy (AK/SN). Město Wojerecy liči za 2026 a 2027 ze 6,344 milionami eurow spěchowanja z Europskeho fondsa za regionalne wuwiće (EFRE). Z tutymi pjenjezami chcedźa twarjenja energetisce saněrować, zadźěwki wotstronić, towarstwa podpěrać a žiwjensku kwalitu polěpšić. „Spěchowanske pjenjezy su přizwolene. Najwjace naprawow zwoprawdźimy klětu. Kónc 2027 dyrbi wšitko wotličene być“, podšmórny twarski nawoda města Dietmar Wolf. EFRE spěchuje 75 procentow. Dalšich 15 procentow financuja ze spěchowanja za přetwar města a dźesać procentow zapłaći město.

Wot februara hač do decembra 2026 chcedźa arenu VBH energetisce saněrować. „Twarska dowolnosć tu je a wupi­sanja su zahajene“, tak Dietmar Wolf. Wulke wužadanje je, zo Sportowy klub Wojerecy jako twarski knjez halu w času twarskich dźěłow wužiwać njemóže. Tuž přećahnu sportowcy nachwilnje do sportownje w bydlenskim kompleksu IX. W VBH-arenje zatwari so ćopłotna izolacija. Z fondsa EFRE dóstanu za tele předewzaće něhdźe 2,4 miliony eurow.