Budyšin. Minjenu štwórtu njedźelu adwenta­ hraješe w nowym hudźbnym rjedźe „Pišćele k non“ na Leopolda Kohlowym instrumenće w Budyskej tachantskej cyrkwi swj. Pětra přisłušny kantor Kamil Maksymilian Kulawik. Meditaciju wo wobsahu adwentnych kěrlušow poda na kóncu zajimaweho noweho seriala tachantski farar Wito Sćapan. Kaž hižo interpreća na předchadźacych třoch njedźelach staji tež kantor Kulawik tworjenje serbskich hudźbnikow do srjedźišća. Tak dožiwi wopytarstwo derje přihotowanu a z tym wuwaženu interpretaciju Feliksa Brojerowych sydom meditacijow na (adwentne) antifony pod titulom „Přińdź, přińdź, Emanuelo“. Kajkeho wumóžnika drje čłowjestwo w sčłowječenym synje Božim wočakuje – tole spyta cyrkwinski hudźbnik ze swojimi srědkami a na swójske wašnje wudodnić. Feliks Brojer złožuje so kaž často w swojim dotalnym tworjenju tež tu na gregorianiku.