Chmjelowu brěčku z Chrósćic čěskemu spisowaćelej přepodali

Budyšin (CS/SN). Jaroslav Rudiš so w Budyšinje kaž doma čuje, a to nic hakle wot časa, jako su jeho kruch „Čěski raj“ w Budyskim Němsko-Serbskim ludowym dźiwadle z wulkim wuspěchom pokazali. Spisowaćel, kotryž bě so w čěskim raju narodźił a kiž je dźensa po cyłym swěće doma, je njedźelu w Dźiwadle na hrodźe swoju najnowšu twórbu „Gebrauchsanleitung für Bier“ předstajił. Najnowše zarjadowanje w rjedźe „Łužiska literatura dopołdnja“ dyrbjachu wulkeho nawala ludźi dla z małeje do wulkeje žurle přepołožić. A tež ta bě kopaće połna. Hdyž so čitanje z piwom zaběra, słódna chmjelowa brěčka wězo pobrachować njesmě. Spisowaćel drje za čas čitanja Oppachsku mineralnu wodu piješe. Hosćićelka Eveline Günther pak bě swojemu hosćej jako dar piwo z Łužicy sobu přinjesła, mjez druhim piwo z Kulowa a tajke Chróšćanskeho bioratarja Ignaca Wjesele.