Přidatne pjenjezy za wonkowne připrawy pěstowarnje wotpokazali

Ralbicy (JK/SN). Hišće raz dyrbjachu so radźićeljo gmejny Ralbicy-Róžant wčera z nowotwarom tamnišeje pěstowarnje zaběrać. Mějachu wo tym rozsudźić, hač je dodawk za dźěła we wonkownym wobłuku woprawnjeny. Firma, kotraž je zemju zrunała a plester kładła, žada sej nětko dalše 10 900 eurow za to, zo wulku hromadu pjeršće při pěstowarni zrumuje. Tomu so radźićeljo raznje spjećowachu, dokelž bě to wobsah hižo přewjedźenych dźěłow. Hačrunjež přitomny sobudźěłaćer planowanskeho běrowa PWD z Kamjenca wobstejnosće dokładnje wopisowaše, radźićeljo přidatne wudawki wotpokazachu. Tak wostanje hromada při pěstowarni ležo, chiba zo so gmejna na to dojedna, zo zajimcam pjeršć za přijomnu płaćiznu poskićuje. Za to mějachu radźićeljo wšelake namjety.