Koncert Lipy hodownu powěsć měra a pokoja sposrědkował

Róžant (JK/SN). Njesměrne syły awtow před Róžeńčanskej swjatnicu swědčachu wčera wo wulkim zajimje a wočakowanjach na lětuši hodowny koncert chóra Lipa. Hač na poslednje městno bě cyrkej wobsadźena, kaž hižo na wšitkich dotalnych 22 koncertach. A znowa zamó chór pod nawodom Jadwigi Kaulfürstoweje z bohatym poskitkom mjezynarodnych hodownych spěwow přitomnych zahorić a sposrědkowa hišće raz na dostojne wašnje hodowne poselstwo měra a pokoja. Smyčkowy kwartet Serbskeje komorneje filharmonije SLA z huslerjomaj Jin Oa Choi a Matthiasom Reichelom, z bračistom Jong Yun Jeung a cellistom Christianom Rutenbergom spěwarki a spěwarjow jenož njepřewodźeše, ale wotměnjejo so z chórom tež hodowne spěwy w nowym šaće zahudźi, štož bě přijomne a kon­certej dospołnosć spožči. Spěwarki a spěwarjo mějachu tak móžnosć předychać, štož so na kwalitu interpretacije spěwow wuskutkowa.