Domowina namołwja wolić hić

Budyšin. Z namołwu, na komunalnych, Europskich a krajnosejmowych wólbach so wobdźělić, je so prezidij Domowiny za serbsku zjawnosć wobroćił. „W demokratiji smě kóždy sobu skutkować. Tohodla je trěbne, zo zasadźamy so ze swojim hłosom za towaršnosć, kotraž so přez tolerancu, mjezsobny respekt a mnohotnosć wuznamjenja“, rěka we wčera wozjewjenej namołwje.

Z Mytom Viadriny počesćeny

Frankfurt nad Wódru. Z 23. mytom Viadridny je Europska uniwersita Frankfurt nad Wódru wčera němskeho politologu a bywšeho direktora Němskeho historiskeho instituta we Waršawje, prof. dr. Klausa Ziemera, počesćiła. Lawreat je hižo lětdźesatki znaty jako wupokazany znajer a wuběrny analyst němsko-pólskich poćahow.

Weber nachwilny intendant

W cistercienskej cyrkwi w delnjołužiskej Nowej Cali je kantor Drježdźanskeje Cyrkwje našeje knjenje Matthias Grünert swoju njedawnu łužisku pišćelowu turu zahajił. Zakónčił pak je wón ju w klóšterskej cyrkwi cistercienskow w Pančicach-Kukowje.

Pančicy-Kukow (CRM/SN). Wot swjedźenja Božeho spěća hač do minjeneje njedźele, piskaše Matthias Grünert na dwaceći koncertach, wopřijacy sto twórbow wšelakich dobow a stilow. Po tym, zo bě wón „serbski dźeń“ w Choćebuzu wuhotował, poda so do Wětošowa, Žylowa a Bórkowow. Tura wjedźeše 50lětneho wuměłca tež do Złeho Komorowa, do Stareje Darbnje a Kóšena hač do Kamjenca a na kóncu do Pančic-Kukowa. W swojim dwurěčnym přinošku w programowym zešiwku bě předsyda spěchowanskeho towarstwa za serbsku rěč w cyrkwi dr. Hartmut S. Leipner mjez druhim na to skedźbnił, zo je interpret we Wětošowje wjacore serbske melodije zaklinčeć dał.

Kamjenc (SN). Woblubowanu šulersku protyku Sakskeho krajneho sejma za šulske lěto 2024/25 dóstanjeće wotnětka zaso w Kamjenskim wólbnym běrowje Alojsa Mikławška. Tydźenski planowar je praktiski přewodnik přez šulske lěto. Wón rozłožuje zapřijeća z krajneje politiki na zrozumliwe wašnje a informuje wo dźěławosći krajneho parlamenta kaž tež mnohe móžnosće, so sam politisce angažować. Podawaja so tež zaso wulkotne aktualne poskitki parlamenta kaž wodźenja, pokazki na wirtuelny kófer krajneho sejma, na interaktiwne displayje „Parlament Saksow“ abo na webstronu z rubriku „Krajny sejm za was“ kaž tež pokiwy wo temach kaž wuknjenske techniki, zadźerženje w socialnych syćach, škit datow a spóznawanje fakenewsow. Protyka je za šulerki a šulerjow wot 7. lětnika.

Wólbny běrow na Zapadnej dróze 4 w Kamjencu je wot póndźele do pjatka w času wot 8 do 14 hodź. za wobydlerki a wobydlerjow wotewrjeny.