Wojerecy (KD/SN). Wyši měšćanosta Torsten Ruban-Zeh, wjerchowka Katharina von Teschen a jednaćel Łužiskeje hale Dirk Rolka su pjatk nawječor Wojerowske adwentne wiki w tamnišim starym měsće oficialnje wotewrili. Tež Wojerowske dźěćatko je ze swojimaj přewodźerkomaj wiki w swojej pyšnej drasće wopytało a so hosći z pisanym prućikom dótkało. Na tute wašnje posrědkuje jim strowotu a zbožo do přichodneho lěta.
Šulerka Emma z Choćebuza je ze swojej wowku wosebje dźěćatka dla na wiki do Wojerec přijěła. Chce tute „potajnostne stworjenje“ rady jónu cyle zbliska dožiwić. Sydomlětna wuknje na zakładnej šuli serbsce a je so za wopyt prěni raz narodnu drastu přewodźerkow dźěćatka woblekła.
