Wo šulskej awli znowa wuradźuja
Nadawk planowanja w Hamoru najprjedy raz přepodać njemóža
Hamor (AK/SN). Awlu Hamorskeje šule tamniša gmejna tak saněrować a přetwarić njemóže, kaž bě sej to předstajiła. Na zašłym posedźenju gmejnskeje rady nadawk za planowanske dźěła přepodać njemóžachu. Pjeć radźićelow bě přećiwo předłoze hłosowało, štyrjo so hłosa wzdachu. Tuž su namjet wotpokazali. Poprawom dyrbješe inženjerski běrow z Krušwicy za 50 000 eurow objekt, statiku a wohnjoškit planować.
„Hižo 2019 smy saněrowanje awle přihotowali“, rozłoži twarska nawodnica gmejny Cortina Kokles. „Při tym měještej so tež dwě rjadowniskej rumnosći wutworić. Za to bychmy nimale twarsku dowolnosć dóstali.“, wona doda. 2022 pak Zhorjelski wokrjes připowědźi, zo šulskej awli status pomnikoškita skića. Z tym wšitke plany najprjedy raz wotpočowachu. Pomnikoškit płaćeše za wobraz na zadnjej sćěny, třěchu, rjadowniskej rumnosći a za mobilnu sćěnu. „Awla bě za čas NDR eksperimentelny twar. Pomnikoškitej bě wažne, zo konstrukciju zachowaja“, praji Cortina Kokles. Gmejna chcyše 1,3 miliony eurow inwestować.
Swjeći z knižnej premjeru
Nětko po planje dźěłaja
Rakecy (JK/SN). Samo na sebi chcychu Rakečanscy radźićeljo hospodarski plan 2025/26 hižo na posedźenju w februaru wobzamknyć. Formalneho zmylka při wupołoženju naćiska dla pak dyrbjachu nowy termin za to namakać. Za wupołoženy naćisk su tři znapřećiwjenja dóšli. Wo nich je gmejnska rada na swojim zašłym posedźenju wuradźowała a hospodarski plan skónčnje wobzamknyła. Nětko zapodadźa plan Budyskemu krajnoradnemu zarjadej, zo bychu jón pruwowali. Ale to je skerje formalna wěc. Rakečanska gmejna je za wobě lěće financielnje kaž tež hospodarsce derje přihotowana a móže tuž nětko hižo po planje dźěłać. Wjacore gmejny w susodstwje bychu rady pod tajkimi wuměnjenjemi dźěłali, ale bědźa so z ćežemi, kotrež Rakečenjo njeznaja.
W Ralbicach bě wčera předewšěm młodym swójbam, ale tež ...
Serbski dorost zhromadnje trenuje
Krótkopowěsće (23.04.25)
Ličba woporow wjelkow stupała
Drježdźany. W prěnim kwartalu tutoho lěta su wjelki w Sakskej wo wjele wjace domjacych skoćećow zakusali hač w samsnej dobje loni. To zdźěli fachowy wotrjad za wjelki krajneho zarjada za wobswět, ratarstwo a geologiju (LfULG). Woni zličichu lětsa 112 wot wjelkow morjenych zwěrjatow. Porno tomu běchu to loni w samsnym času jenož 40.
Rozsudźa wo imuniće ministra
Drježdźany. Zapósłancy Sakskeho krajneho sejma rozsudźa 21. meje wo tym, hač maja imunitu kultusoweho ministra Conrada Clemensa (CDU) w zwisku ze sudniskim jednanjom přećiwo njemu zběhnyć. W lěće 2023 běše Clemens blisko Krušwicy ze swojim awtom předpisanu spěšnosć 30 km/h wo 50 km/h překročił.
Wotwoženje wotpadkow zapłaća
Nošerjow pěstowarnjow wolóža
Kulow (AK/SN). Město Kulow chce nošerjow pěstowarnjow při financowanju jich podźěla zawodowych wudawkow wolóžić. Za to su so čłonojo měšćanskeje rady na swojim zašłym posedźenju wuprajili. Jednohłósnje woni wobzamknychu, podźěl nošerjow pěstowarnjow při financowanju zawodowych wudawkow wot 2,5 procentow na 1,75 procentow znižić. Na te wašnje reaguje město na pohubjeńšacu so cyłkownu situaciju nošerjow w měsće a wokolinje. Woni móža lědma hišće swójski podźěl zawodowych kóštow zapłaćić. Tohodla su so z próstwu wo pomoc na město wobroćili.
Policija (22.04.25)
Drohe koleso pokradnyli
Budyšin. Ani jutrownička njebě paducham w Budyšinje swjata. W času mjez připołdnjom a 18.00 hodź. pokradnychu woni z pincy na Tuchorskej droze koleso typa Specialized. Kaž policija zdźěli, bě jězdźidło něhdźe 8 000 eurow hódne.
Alkoholizowaneho šofera lepili
Wěteńca. Dobry čuch mějachu policisća w nocy na póndźelu blisko Wěteńcy. Krótko do połnocy kontrolowachu tam 30lětneho wodźerja VW Golfa a zwěsćichu, zo młody muž alkoholizowany za wodźidłom sedźi. Dale jěć wón wězo njesmědźeše, ale dyrbješe sobu na policajski rewěr přińć. Tam naměrichu pola njeho 0,54 promilow alkohola w kreji. Muž změje nětko pokutu płaćić, dóstanje dypki w Flensburgu a budźe so swojeho awta chwilu wzdać dyrbjeć.
Poselstwo jutrow wozjewjeli
Njebjelčicy (SN/MiR). Njebjelčanski procesion, kotryž je wosadny farar Michał Nawka wužohnował a domoj witał, měješe lětsa 101 křižerja. W jutrownej nocy prědowaše wón wo wulkim dźiwje, zo bě kamjeń před rowom Jězusa Chrystusa bjez pomocy wotwaleny. Xaver Smoła je lětsa prěni króć kantorstwo přewzał. Smoła zwurazni swoje wjeselo nad tym, zo je Bjarnat Deleńk ze swojim wnučkom Theodorom jako nowačkom a synomaj Tobiasom a Hubertusom jěchał.
Krótkopowěsće (22.04.25)
Pawk dale na čole zastupjeny
Opole. Serbske młodźinske towarstwo Pawk je dale na čole Młodźiny europskich narodnych skupinow MENS zastupjene. Na hłownej wólbnej zhromadźiznje w Opolu wuzwolichu Filipa Budarja za městopředsydu. Wón je w přichodnymaj lětomaj za nutřkowne naležnosće organizacije zamołwity. Do toho so Felica Touvenotec a Krystof Grofa po štyrjoch lětach z předsydstwa MENS rozžohnowaštaj.
Žadosć za měrom zwuraznili
Kamjenc. Pod hesłom „Wójny zakónčić – skónčnje měr“ stej wčera měrowej zwjazkarstwje z Kamjenca a Budyšina na jutrowny pochod do Kamjenca přeprosyłoj. Wjacore sta ludźi wšitkich generacijow zhromadźichu so na tamnišim torhošću a podachu so wottam k wopomnišću něhdyšeho wonkowneho koncentraciskeho lěhwa Herrental, zo bychu swoju žadosć za měrom zwuraznili a přećiwo němskemu wobrónjenju demonstrowali.
Hromak z Łužiskeje jězoriny
