Wojuja wo pokal Domowiny
Radwor. Sobotu, 29. měrca, wotměje so 40. sokołski wolejbulowy turněr wo pokal Domowiny w Radworskej sportowej hali. Wubědźowanja zahaja so w 9 hodź.
Wušiwanje křižerskich seklow
Budyšin. Spěchowanski kruh za serbsku ludowu kulturu přeprošuje wšitkich zajimcow na kurs wušiwanja křižerskich seklow pod nawodom fachowče Delije Münchoweje. Zarjadowanje wotměje so pjatk, 28. měrca, w 16 hodź. w Budyskim Serbskim domje. Dalše informacije poda nawodnica spěchowanskeho kruha Rejzka Krügerowa pod čisłom 03591 550291.
Zhromadnje wotpadki zběrać
Pančicy-Kukow. Hižo štwórty raz přeprošuje Sportowe towarstwo Marijina hwězda wšitkich małych a wulkich wjesnjanow w Pančicach-Kukowje na zběranje wotpadkow a to sobotu, 29. měrca. Start je w 10 hodź při sportnišću. Měchi a rukajcy wobdźělnicy na městnje dóstanu. Nimo toho dóstanu tež mały přikusk k wobjedu.
Lětsa liča z 250 000 wopytowarjemi
Mały Wjelkow (CS/SN). Wjace hač 200 prazwěrjatow „wobydli“ tuchwilu Małowjelkowski park sawrierow. Składnostnje zahajenja sezony 5. apryla su je zamołwići hižo wurjedźili. A tež při pućach a zelenišćach runje intensiwnje dźěłaja, wšako budu tu bórze zaso syły wopytowarjow po puću. Z něhdźe 250 000 hosćimi lětsa liča, zahoritosć za dinosawriery wočiwidnje njepopušći. Prawidłownych wopytowarjow wězo zajimuje, hač změja w parku w nowej sezonje překwapjace nowostki. Haj, tych budźe! Nowa je 100 metrow dołha šćežka zmysłow blisko hrajkanišća planetow, na kotrejž móža sej dźěći bosy swět wotkrywać. Wučomnicy zahrodo- a krajinotwarstwa su ju připrawili. Nimo hablow su mjez druhim šćerk, tačałki kaž tež 150 metrow tołsteho powjaza za to wužiwali. Brjuch wulkeho Triceratopsa, do kotrehož móža so wopytowarjo podać, su zamołwići lětsa ponowili. Tam wotnětka čłowječa postawa hosći wita a jim zajimawostki ze žiwjenja załožićela parka a „nana dinosawrierow“ Franza Grußa powěda. Nimo toho su schody w nutřkownym sawriera ponowili.
„Astronomija je motor postupa“
Astrocentrum Łužica podpěruje přichodny nowy planetarij we Wojerecach
Wojerecy (AK/SN). Planowany Wojerowski planetarij, kotryž změje w přichodnym Nowoměšćanskim forumje swoje doma, budźe zdobom centrum wědy. To su měšćanscy radźićeljo z wjetšinu 19 hłosow wutoru na swojim posedźenju wobzamknyli. Dohromady dźewjeć radźićelow bě so hłosa wzdało, přećiwo planej so nichtó wuprajił njebě.
Powučna historiska přehladka
W Njeswačanskim domizniskim muzeju wotewrja tutu njedźelu w 14 hodź. wosebitu wustajeńcu pod titulom „Njeswačidło 1945 – 80 lět kónc wójny“, kotruž je nawoda muzeja Arnd Lehmann zestajił.
Njeswačidło (ML/SN). Wobšěrna přehladka, kotruž je Njeswačanske towarstwo přećelow kultury a domizny zestajiło, wobsahuje dźesatki historiskich fotow, rozprawy časowych swědkow kaž tež tójšto zajimawych dokumentow.
Po cyłej Łužicy so wosady w tutych tydźenjach na so bližacy ...
Wo serbstwje we Łužiskej hali
Wojerecy (SN/mb). Přirada za serbske naležnosće města Wojerec je so wčera we Łužiskej hali schadźowała. Tam so z jednaćelom zarjadnišća Dirkom Rolku wo wuznamje hale, kotraž ma so saněrować, za serbstwo rozmołwjachu. Kaž regionalna rěčnica za teritorij župy „Handrij Zejler“ Wojerecy, Birgit Hančikowa, na naprašowanje našeho wječornika informowaše, dźěše nimo serbskeho popisanja na fasadźe wo móžne zaměstnjenje stajneje wustajeńcy wo serbstwje abo tajkeho poskitka kaž Serbskeje kulturneje informacije w Budyšinje. Njeje pak jasne, štó by personal za to zapłaćić móhł.
Dalša tema wuradźowanja, na kotrymž je so tež Diana Karbowa, społnomócnjena za serbske naležnosće Wojerec, wobdźěliła, běše sobuskutkowanje Serbow na krajnej domchowance srjedź septembra w měsće. Za to so wosebje Wojerowska županka Gabriela Linakowa angažuje. Anja Hillmann, zamołwita za organizowanje krajneje domchowanki, rozprawješe wo mjezystawje plana za wulkozarjadowanje. Wjele přizjewjenjow maja za swjedźenski ćah, kotryž chcedźa hač do apryla doplanować.
Krótkopowěsće (27.03.25)
Nowy koordinator w LaSuB
Budyšin. Wěteńčan Syman Pawlik budźe wot 1. apryla nowy koordinator za serbske naležnosće w Budyskej wotnožce Krajneho zarjada za šule a kubłanje LaSuB. W swojej nowej poziciji w Budyšinje budźe wón direktora Budyskeje wotnožki LaSuB strategisce kaž tež operatiwnje fachowje podpěrać. Nimo toho budźe na zjawnostnym dźěle zarjada sobu skutkować.
Nowaj zastupjerjej přirady
Drježdźany. Zastupjerjo parlamentariskeje přirady Załožby za serbski lud buchu wčera popołdnju w Drježdźanach wuzwoleni. Nowaj sakskaj zastupjerjej staj Marko Šiman za CDU a Doreen Schwietzer za AfD. Šimana zastupuje Elaine Jenčec a Timo Schreyer je zastupnik Schwietzer.
SPD z nowym předsydu
Budyšin. Na hłownej zhromadźiznje měšćanskeho zwjazka SPD w Budyšinje su zastupjerjo minjeny pjatk dr. Tobiasa Mayera-Uhma za noweho předsydu wuzwolili. Jeho zastupujetaj w přichodźe Sandra Matzke a Eckart Riechmann. Nowemu rozšěrjenemu předsydstwu, kotrež je na dźesać čłonow rozrostło, přisłuša mjez druhim zaso dr. Měrćin Krawc.
Bayerki podleželi
Policija (26.03.25)
Twarskeho dźěłaćerja ćežce zranił
Budyšin. 65lětny šofer, kotryž běše wutoru popołdnju na Budyskej Lubijskej z města won po puću, je ze swojim nakładnym awtom zběhacu dźěłowu platformu při křižowanišću Lubijska/Wósporska potorhnył. Při tym zrani so 46lětny muž, kotryž běše na platformje stejo dźěłał, ćežce. Wuchowanska słužba dowjeze jeho z helikopterom do chorownje. Wobchadna słužba je přepytowanja přewzała.
Gmejnska rada so schadźuje
Pančicy-Kukow. Wjesnjanosta gmejny Pančicy-Kukow Markus Kreuz přeprošuje wšitkich zajimowanych wobydlerjow na zjawny dźěl posedźenja gmejnskeje rady a to štwórtk, 27. měrca, w 19 hodź. do něhdyšeje Wotrowskeje šule. Na dnjowym porjedźe steji mjez druhim diskusija wo hasnjenju nadróžneho wobswětlenja we wšěch wjesnych dźěłach gmejny.
Nalětnje spěwanje
Budyšin. Někotryžkuli Budyšan znaje krasnu přehladku kamelijow Steglichec zahrodnistwa. Hač do 10. apryla móža zajimcy w tutych tydźenjach krasnje kćějace rostliny wobdźiwać. Sobotu, 29. měrca, přeprošuje Hudźbny kruh Consonare swj. Pětra w 15 hodź. do zahrodnistwa na swój wustup, na kotrymž zanjese nalětnje pěsnje, je-li słónčne wjedro wonka, je-li so dešćuje, w rostlinarni. Zastup je darmotny.
Maćica Serbska přeprošuje
