Zahaja karnewal
Serbske Pazlicy. Póndźelu, 11. nowembra, dypkownje w 11.11 hodź. zahaja karnewalisća w Njebjelčicach 53. karnewalowu sezonu a přewzaja zaso ceptar w gmejnje. Na wólby noweho princa přeprošuje princowski por Tobias I. a Lucija II. zhromadnje ze Serbskopazličanskim karnewalowym towarstwom potom sobotu, 16. nowembra, w 19.30 hodź. do Njebjelčanskeje Bjesady. Zastupne lisćiki móžeće wšědnje wot 17 hodź. pola Hübenthalec pod tel. čo. 03578 303505 skazać, zbytk předawaja při wječornej kasy.
Zakónčacy chórowy koncert
Budyšin. Budyski Rotary Club přeprošuje wšitkich zajimcow wutrobnje na zakónčacy a beneficny koncert lětušeje chóroweje akademije. Zarjadowanje wotměje so sobotu, 9. nowembra, w 17 hodź. w Budyskej Marije Marćinej cyrkwi. Zastup je darmotny, wo pjenježny dar za dobry skutk so prosy.
Na zarjadowanje do Warnoćic
Bywši sobušulerjo so zetkali
Božemje Staremu Miłorazej so bliži
Trjebin (AK/SN). Kónc lěta budźe přesydlenje Stareho Miłoraza na nowe městno sewjernje Slepoho zdokonjane. W tutym zwisku woteda tam gmejna Trjebin – ke kotrejž wjeska přisłuša – swoje prawa nad komunalnym swójstwom. Srjedu su Trjebinscy gmejnscy radźićeljo jednohłósnje wotedaće gmejnskeho swójstwa gratownje, kotraž słuša dobrowólnej wohnjowej woborje w Starym Miłorazu, hač do kónca lěta wobzamknyli.
Hobby žada sej zamołwitosć
W Koćinje mataj wjesnjanaj njewšědnych sobuwobydlerjow
Koćina (SiR/SN). Hač do hód je jenož hišće něšto tydźenjow. Nimo psow a kóčkow steja na lisćinje přećow často tež eksotiske zwěrjata. Stefanie Wenda a Christian Wersch z Koćiny radźitaj kóždemu, dokładnje rešeršować a wotwažować, prjedy hač so tajkemu hobbyjej wěnuje. Stajnje zaso dźě čitaš rozprawy, zo něchtó eksotiske zwěrjata pod njemóžnymi wuměnjenjemi dźerži. Tak namakachu hižo žiwej leguanaj we wotpadkowym sudobju abo druhe zwěrjata w ćmowej pincy.
Spušćomny partner biblioteki
Kamjenc (SN). Zarjadowanja, kotrež Spěchowanske towarstwo Lessingoweje biblioteki w Kamjencu přewjeduje, su stajnje zajimawe, wotměnjawe a pohnuwaja do rozmołwy. Zo by publikum w přichodźe tež ćiche zwuki lěpje zrozumił, je wone njedawno bibliotece 800 eurow dariło, zo by sej nowu zwukowu připrawu kupić a instalować móhła. „Smy technisku móžnosć za najwšelakorišu potrjebu pytali a namakali. Wona tež w posłužowanju překomplikowana njeje“, měni předsyda towarstwa dr. Wolfgang Melzer. Wón je tež jako awtor znaty, kotrehož knihi w polcach biblioteki namakaš.
Wyši měšćanosta města Kamjenca Roland Dantz (Swobodni wolerjo) so jara nad pjenježnej podpěru wjeseli. „Lessingowa biblioteka je wot časa swojeho wotewrjenja na nowym městnje w lěće 2022 nowe rekordy hladajo na ličby wopytowarstwa docpěła. Wona je z tym woprawdźe ‚měšćanske wukładne wokno‘. Na tutym wuwiću ma tež spěchowanske towarstwo ze swojimi mnohimi aktiwitami wulku zasłužbu.“
Krótkopowěsće (07.11.24)
Amplowe knježerstwo na kóncu
Berlin. Amplowe knježerstwo SPD, Zelenych a FDP je zwrěšćiło, po tym zo je zwjazkowy kancler Olaf Scholz (SPD) wčera wječor financneho ministra Christiana Lindnera pušćił. Mjeztym sej předsyda CDU Friedrich Merz žada, zo měł Scholz w zwjazkowym sejmje hnydom prašenje dowěry stajić a nowowólby zmóžnić. Scholz pak chce z tym hač do srjedź januara 2025 čakać. (Hlej 2. str.)
Koalicija CDU a BSW z blida
Drježdźany. Móžna koalicija CDU, SPD a Zwjazka Sahry Wagenknecht (BSW) w Sakskej je z blida. Zastupnicy BSW su sonděrowanja wčera přetorhnyli a připowědźili, zo chcył BSW wotnětka w opoziciji dźěłać. Ministerski prezident Michael Kretschmer (CDU) reagowaše přesłapjeny. Po zakonju dyrbi hač do spočatk februara nowe knježerstwo stać. (Hlej 2. str)
Požadanje wčera wotedali
Policija (06.11.24)
Wopojenaj z awtom po puću
Šiborćicy. Zastojnicy policije su minjenu njedźelu na awtodróze A 4 na směr Drježdźany šofera awta typa VW Golf spodźiwneho jězdźenja dla blisko wotjězda Šiborćicy (Nieder Seifersdorf) kontrolowali. Test pólskeho staćana na drogi dopokaza amfetaminy. Policisća zakazachu jemu dale jěć. Po zdaću běše so tež sobujěducy na drogach wuspytał – hišće w přitomnosći zastojnikow sydny so za wodźidło a wotjědźe z awtom, hačrunjež ani płaćiweje jězbneje dowolnosće njeměješe. Po tym zo běchu policisća to zwěsćili, tež jeho zadźeržachu a test na drogi přewjedźechu. Tón dopokaza substancu konop.
Wotewrja nowu knihowničku
Slepo. Juliana Kaulfürstowa, motiwatorka za serbsku rěč w projekće ZARI, přeprošuje na wotewrjenje noweje serbskeje knihownički składnostnje jubilejneho lěta 150. narodnin Jakuba Lorenca-Zalěskeho, załožerja prěnjeje serbskeje knihownički w Slepom. Zarjadowanje wotměje so jutře, 7. nowembra w 15 hodź. w gmejnskej bibliotece w Němsko-serbskim šulskim kompleksu Slepo.
Přihoty na 150. schadźowanku
Budyšin. Wšitcy, kotřiž chcedźa so z přinoškom na programje lětušeje schadźowanki wobdźělić, njech zdźěla temu nanajpozdźišo hač do njedźele Stanisławej Wowčerjej, zamołwitemu za organizaciju, tel. pod 03591 550-304 abo z mejlku na . Hladajo na 150. jubilej schadźowanki prosytaj režiseraj, zo přińdźeće w serbskej drasće abo w modernej interpretaciji serbskeje drasty.
Rozjimataj prašenja našeho časa
Wojerecy. Ludowa uniwersita we Wojerecach přeprošuje dźensa we 18 hodź. na nowu „Rozmołwu na hrodźe“ do Wojerowskeho hrodu. Něhdyšej fararjej Peter Paul Gregor a Frank Richter wěnujetaj so w dialogu aktualnym prašenjam w našej towaršnosći. Zastup je darmotny.
