Podpěruja w ćežkej financnej situaciji
Wojerecy (AK/SN). Město Wojerecy podpěruje powšitkownowužitny Kulturny zawod zwěrjenc, kultura a kubłanje w swojej tuchwilnej ćežkej hospodarskej situaciji. To su měšćanscy radźićeljo wutoru na swojim posedźenju z wjetšinu wobzamknyli. Zo by aktualny deficit w zawodowym wuslědku wurunać móhł, dóstanje lětsa hišće 500 000 eurow a přichodne lěto w januaru jónkrótnje wo 200 000 eurow wyšu přiražku za swoje zawodne kóšty přepokazane.
Přičiny njedobreje financneje situacije kulturneho zawoda su předewšěm lěto a stupace personalne kóšty kaž tež stupace płaćizny w dalšich wobłukach, na přikład za energiju. Pozitiwne wuwiće hladajo na dochody a konstantne přiražki města njejsu stupace kóšty wurunali. W lěće 2011 załoženemu kulturnemu zawodej přisłušeja dźensa ludowa uniwersita, hudźbna šula, hród, měšćanski muzej, měšćanska biblioteka Brigitte Reimann kaž tež Wojerowski zwěrjenc. Město Wojerecy je po sto procentach towaršnik zawoda.
Nowy dom za hladanja potrěbnych
Wojerecy (KD/SN). „Chorosć njeznaje staroby! Kóždy móže wot jednoho dnja na druhi tak schorjeć, zo wobstajnu hladansku słužbu trjeba“, praji Matthias Zindler, jedyn z dweju jednaćelow hladanskeje słužby Rauber we Wojerecach. 24 hodźin wob dźeń, 365 dnjow wob lěto zastaruja hladarjo słužby w dwěmaj zarjadnišćomaj mjez druhim dźěći z ćežkim diabetesom, na demencu schorjenych młódšich abo staršich dorosćenych kaž tež ludźi z psychiskimi schorjenjemi. Tuchwilu je jich dohromady 90 klientow. Z dotwarom noweho hladanskeho domu na dróze Kocora blisko Drježdźanskeje dróhi změja wjace městnow.
Dźensa zaćehnje 24 hladanja potrěbnych do bjezbarjerneho domu, za kotryž je hladanska słužba Rauber resp. maćerne předewzaće Diakonija 3,5 miliony eurow inwestowała. Pódlanski stary twar ma tuchwilu hišće dźesać wobydlerjow. Wón ma so spotorhać, ručež je prózdny. Na swobodnej płoninje nastanje potom zahroda zmysłow za wobydlerjow nowotwara.
Stare maćizny wužiwali
Přirodoškitna stacija dźěło w ponowjenym kubłanskim centrumje zahajiła
Mały Holešow (UM/SN). Kubłanske srjedźišćo za wobswět na rybarskim dworje w Małym Holešowje blisko Njeswačidła su njedawno po połdralětnym přetwarje poswjećili. Je to jedyn z prěnich projektow we wokrjesu Budyšin, kotryž je so z pomocu srědkow za změnu strukturow zrealizował.
Zazběh twarskich dźěłow běše loni, 16. měrca – „po dwěmaj lětomaj intensiwneho planowanskeho dźěła“, praji tehdy Angelika Schröter, jednaćelka Njeswačanskeje přirodoškitneje stacije, kotraž je nošer rybarskeho dwora. Ideja za projekt wšak je hišće starša. Tola hakle móžnosće spěchowanja w zwisku z kóncom wudobywanja brunicy we Łužicy běchu jón nastorčili. Spěchowanska suma wučinja něhdźe 2,5 milionow eurow. To je 90 procentow cyłkownych kóštow.
Krótkopowěsće (01.11.24)
Wuswojenje na dobro brunicy
Rowno. Wobswětowa skupina Choćebuz Zeleneje Ligi je w zdźělence Renéja Šustera informowała, zo je Sakski wyši hórnistwowy zarjad wobsedźerjow lěsa pola Rownoho wuswojił. Z tym chce zarjad koncernej LEAG pokročowanje Wochožanskeje brunicoweje jamy zmóžnić. Potrjecheni pruwuja tuchwilu 168stronske zdźělenje a přemysluja, přećiwo tomu před sudnistwom skoržić.
Jancyna na zarjedźe hižo njeje
Budyšin. Wot dźensnišeho njeje Halena Jancyna hižo społnomócnjena za serbske naležnosće wokrjesa Budyšin. Wona je krajnoradny zarjad wopušćiła. Kaž wona našemu wječornikej na naprašowanje wobkrući, přewozmje poskitk noweho dźěła. Nowowobsadźenje jeje dotalneho dźěłoweho městna je hišće wotewrjene, pytaja najprjedy w zarjedźe za naslědnicu.
Škoda Auto VW wuchowuje
Škleńca objekt wustajeńcy
Kamjenc. Na wotewrjenje pućowanskeje wustajeńcy pod hesłom „Glas – Handlungen & Resonanzen“ přeprošuja wuměłče Iona Dutz, Heidi Morgenstern a Anne Munka do Elementarija Kamjenskeho Muzeja zapadneje Łužicy a to pjatk, 1. nowembra, w 16 hodź. Wustajeńca skići dokumentariske dohlady do łužiskeje industrijneje kultury škleńčerstwa kaž tež do načasneho wuměłstwa, kotrež so ze škleńcu zaběra. Zastup je darmotny.
Hamburgčan zahudźi we Łazu
Łaz. Thomas Steinlein, spěwar, pěsnjer, pianist a hudźbny pedagoga z Hamburga, wuhotuje pjatk, 1. nowembra, w 19 hodź. koncert pod titulom „Zeitgleise“ we Łazowskej cyrkwi. Jeho wosobinske teksty swědča wo krutym zakótwjenju we wěrje. Zastup je darmotny. Wo pjenježny dar so prosy.
Wuslědki na škoće seniorow
Pančicy-Kukow. Dobyćer na wčerawšim serbskim škoće seniorow w Pančicach-Kukowje je Eckerhard Krautwurst z 2 594 dypkami před Uwe Sieglerom z 2 586 dypkami. Třeće městno docpě Józef Brězan z 2 491 dypkami. Cyłkownu tabulku nawjeduje dale Wolfgang Kühn z 24 039 dypkami.
Na rekwiem Luigija Cherubinija
Ponowja „wobličo města“
Hač do lěta 2026 Wojerowske dwórnišćo wobšěrnje přetwarja
Wojerecy (AK/SN). Spočatk nowembra zahaja na dwě lěće wobšěrne ponowjenske dźěła na Wojerowskim dwórnišću. Je to zhromadny projekt Němskeje železnicy ze Swobodnym statom Sakskej, z Wobchadnym zwjazkom Hornje Łobjo (VVO) a dalšimi partnerami.
Wčera su zastupjerjo wšitkich na projekće wobdźělenych stron kaž tež města Wojerecy twarske dźěła oficialnje zahajili. Za zwoprawdźenje projekta su woni Budyske předewzaće Hentschke Bau społnomócnili. Cyłkowne kóšty wučinjeja 21 milionow eurow. Wot tuteje sumy přewza Němska železnica 7,4 miliony, kraj Sakska 7,7 milionow a VVO 5,9 milionow eurow.
Pěstuje swójbnu tradiciju
5 555 ludźi wustajeńcu wopytało
Minjenu njedźelu wotmě so finisaža wustajeńcy „Twarski inženjer Eberhard Dučman. Mjez łužiskej drjewowej architekturu a industrielnym twarjenjom“ w Budyskim Serbskim muzeju. Dohromady běše jón 5555 zajimcow wopytało.
Budyšin (AP/SN). Njehladajo krasneho nazymskeho wjedra bě nawal na poslednim dnju wustajeńcy z wjedźenjom kuratorki Betinu Kaunowej a slědowacym přednoškom na žurli wulki. Wopyt wustajeńcy wo wodźacym twarskim inženjeru NDR a fachowcu na polu přeslědźenja a saněrowanja starych łužiskich drjewjanych twarow, njeje so jenož za twarskich insiderow wudanił.
Promowowana slědźerka na polu neurologije a stawiznow architektury dr. phil.dr.rer.nat. Betina Kaunowa, rodź. Dučmanec, je wobšěrny archiw swojeho nana přehladała a w dalšich archiwach akribisce rešeršowała. Z toho wurosće knižny a wustajenski projekt w zhromadnym dźěle ze Załožbu za serbski lud, Serbskim muzejom w Budyšinje a Energijowej fabriku Hórnikecy.
Krótkopowěsće (30.10.24)
Wjelka smědźa zatřělić
Budyšin. Po tym zo je wjelk wospjet škody zawinował a wužitne zwěrjata w Budyskim a Zhorjelskim wokrjesu nadpadnył a zakusał, nětko dowolnosć za zatřělenje rubježneho zwěrjeća předleži, zdźěli wčera krajnoradny zarjad Budyskeho wokrjesa. Krajny rada Udo Witschas (CDU) je wuwzaćnu dowolnosć mjeztym podpisał.
Podpěra za kulturny zawod
Wojerecy. Wojerowscy měšćanscy radźićeljo su wčera wobzamknyli, zo dóstanje tamniši powšitkownowužitny Kulturny zawod zwěrjenc, kultura a kubłanje, kotryž je hižo dlěje w hospodarskich wuskosćach, dohromady poł miliona eurow financneje podpěry. Zawodej přisłušeja hudźbna šula, hród, měšćanski muzej, biblioteka kaž tež zwěrjenc.
Kónc po 101 lětach
