Wjace dowolnikow při jězoru
Hamor (AK/SN). W Hamorskej gmejnje je loni telko dowolnikow přenocowało kaž hišće ženje do toho. W 13 přenocowanskich zarjadnišćach a stanowanišćach gmejny z wjace hač 400 městnami zličichu loni nimale 52 000 přenocowanjow. Tole zdźěli póndźelu zastupowacy wjesnjanosta Claudius Urban (Hamorske wolerske zjednoćenstwo) na posedźenju gmejnskeje rady. W lěće 2022 mějachu 43 000 hosći, lěto do toho 26 700. Wšitkim poskićerjam dowolowych móžnosćow so Urban za jich angažement wuraznje dźakowaše. Zdobom wón připowědźi, zo chcedźa mjez druhim internetny knihowanski system a protyčku zarjadowanjow polěpšić.
Wot 27. měrca budźe turistiska informacija na Hamorskim pobrjohu Bjerwałdskeho jězora zaso wočinjena. Wodosportowa sezona na jězoru započnje so jutrownu póndźelu, 1. apryla. Pola přistawneho mištra Gerharda Stübnera móža sej zajimcy termin dojednać, hdy chcedźa swój čołm do wody pušćić.
Namocy dla na sudnistwje
Budyšin (SN/MWj). Wulka chłostanska komora Budyskeje wonkowneje komory Zhorjelskeho krajneho sudnistwa zaběra so wot dźensnišeho z mužom, kotremuž wumjetuja wjacore namócne njeskutki. Stali su so nadpad na zastojnikow, wohroženje, strašne zranjenje ćěła a rubježne padustwo loni wot januara hač do awgusta.
Tak přebywaše 48lětny 25. januara 2023 před Budyskim jastwom. Policist jeho napominaše, zo měł městnosć wopušćić. Na to je so wobskorženy zastojnikej bližił a napodobnił, zo chcył jemu mjezwoči dyrić. Policist móžeše muža preč storčić. Hromadźe z kolegami dowjezechu jeho k hamtskemu sudnistwu. Za čas jězby wón jim hrožeše „Wy hižo dołho žiwi njebudźeće.“
Serbska rejowanska skupina Smjerdźaca wotmě minjenu sobotu druhu ...
Krótkopowěsće (12.03.24)
Wopyt z Prahi pola Domowiny
Budyšin. Prěni raz wopyta wčera nawodnica běrowa Sakskeje w Praze, Josefina Ofnerowa, Domowinu. Předsyda Domowiny Dawid Statnik a kulturny referent Clemens Škda staj ju wo projektach třěšneho zwjazka informowałoj. Ofnerowa, kotraž je z lěta 2022 nawodnica běrowa, předstaji předewzaća saksko-čěskeje kooperacije. Dźensa chce so ze zastupjerjemi Budyskeho wokrjesa rozmołwjeć.
Ministerstwo planuje KI-tool
Lipsk. Hišće do spočatka noweho šulskeho lěta planuje kultusowe ministerstwo pomocny srědk kumštneje inteligency, kotryž ma wučerki a wučerjow při nastajenju tekstow, nadawkow a pozdźišo tež wobrazow podpěrać. Z tym chcedźa přihot, přewjedźenje a wuhódnoćenje wučby wolóžić. Aktualnje maja so hišće prašenja ke konkretnemu techniskemu přesadźenju, financowanju a škitej datow rozrisać.
Češa česćuja Smetanu
Policija (11.03.24)
Wjelk při njezbožu zahinył
Protecy. Nic kaž hewak často wječor abo w nocy, ale wosrjedź swětłeho dnja bě sobotu w Protecach (Prietitz) pola Halštrowa wjelk na wobchadnym njezbožu wobdźěleny. 22lětny wodźer Audija jědźeše krótko po připołdnju na Biskopičanskej dróze do směra na Brěznju. Nadobo wjelk dróhu přeprěči. Dokelž šofer hižo zastać njemóžeše, dóńdźe k zražce. Rubježne zwěrjo wobchadne njezbožo njepřežiwi. Na awće nasta něhdźe 6 000 eurow škody. Jězdźidło dyrbjachu wotwlec. Sobudźěłaćer wjelčeho běrowa mortwe zwěrjo přewza.
Porěči wo prózdnjeńcach
Kamjenc. Na archeologiski přednošk přeprošuje Kamjenski Muzej zapadneje Łužicy jutře, wutoru, w 19 hodź. do swojeho Elementariuma. Tam přednošuje Roland H. Winkelhöfer wo prózdnjeńcach w Sakskej Šwicy. Hromadźe z Drježdźanskej skupinu slědźerjow za prózdnjeńcami je wón w zašłych lětdźesatkach stotki wjetšich a mjeńšich prózdnjeńcow wuslědźił a dokumentował. Nimo toho je přednošowar knihu wo taflowych horach Sakskeje Šwicy napisał. Zastup płaći 3,50 eurow.
Zelene stajne blido
Kamjenc. Dr. Judith Oexle budźe z hosćom přichodneho zeleneho stajneho blida jutře, wutoru, w 19 hodź. w Kamjenskim hosćencu La Piazza. Wona bě zamołwita za prěnju saksku krajnu wustajeńcu w klóštrje Marijinej hwězdźe w Pančicach-Kukowje. W Kamjencu předstaji wona jutře 3. saksku socialnu rozprawu z lěta 2023.
Dźěłowy kruh so zeńdźe
Budyšin. Přichodne wuradźowanje dźěłoweho kruha za serbske naležnosće města Budyšina wotměje so zajutřišim, srjedu, w 17 hodź. w sukelnicy. Mjez druhim zaběraja so čłonojo kruha z lěpšej widźomnosću serbskeje rěče w zjawnosći.
Kapony so wubědźuja
Starši přimaja so gratu
Jasne rozsudy trěbne
Gmejnska rada směrnicy za fotowoltaikowe připrawy wobzamknyła
Njebjelčicy (JK/SN). Mnozy priwatnicy, gmejny a předewzaća maja wotpohlad, hladajo na njewotwisne zastaranje z milinu sej natwarić fotowoltaikowu připrawu. Modality za tajke připrawy, planowanje, instalowanje a wobhospodarjenje hustodosć gmejny, kotrež maja poslednje słowo, přežadaja. Tohodla su jasne směrnicy a runje tak jasne a njekomplikowane rjadowanja trěbne.
Njebjelčanska gmejna, kotraž so sama z móžnej fotowoltaikowej připrawu zaběra, je so skontaktowała z městom Halštrowom, kotrež je za tajke pady nastajiła směrnicy. Wone rjaduja priority městnosćow, na kotrychž móža so tajke připrawy natwarić. Při planowanju připrawow měli so wobkedźbować priority nastajenja, při čimž měli so twarjenja a zatwarjene płoniny prěnjorjadnje wužiwać. Tute městnosće měli so za připrawy wužić, dokelž je wo wjele lóšo, je na hižo wotkrytych płoninach instalować hač na zelenej łuce. Tajke rozrisanje je hakle poslednja móžnosć, fotowoltaiku zwoprawdźić.
Stawizniski swjedźeń k 650. róčnicy
Hižo za někotre měsacy, a to 14. a 16. junija, planuja we Wulkich Ždźarach jubilejny swjedźenski kónc tydźenja składnostnje 650. róčnicy wjeski Łazowskeje gmejny.
Wulke Ždźary (AK/SN). Za to přihotuja tuchwilu hižo swjedźenišćo při Hórnikečanskim jězoru. Na njedawnej dźěłowej akciji wobdźěli so wjace hač 20 dobrowólnych, zo bychu hałuzy wurězali, zawěru při přijězdnym puću swjedźenišća wobarbili, wabjenskej baneraj připrawili a drjewjane ławki zwuporjedźeli.
Stegmann: „Demokratija nas trjeba“
Wojerecy (KD/SN). Mjeztym druhi raz wotmě Iniciatiwa za ciwilnu kuražu demonstraciju we Wojerecach. Tam přizamknychu so swójby z dźěćimi, młodostni a wuměnkarjo tuchwilnemu hibanju, kotrež so po cyłej Němskej wotměwa. Wobdźělnicy akcijow wustupuja přećiwo prawicarskemu zmyslenju, wotpokazanju wukrajnikow abo seksualneje orientacije dla. Drježdźanska band Skaprifischer je zarjadowanje čestnohamtsce podpěrała.
„Stejimy tu, dokelž trjebamy demokratiju. Ale nětko trjeba demokratija nas“, zwurazni direktor wobłuka astrofyziki pola DESY a nawoda slědźenskeho centruma Zeuthen prof. dr. Christian Stegmann na torhošću před něhdźe 200 připosłucharjemi. W Zhorjelcu nastawacy Astrocentrum Łužica budźe Saksku dale na technologiski kraj wuwiwać, tola při tym dyrbja wědomostnicy a technikarjo z mnohich krajow derje hromadźe dźěłać. Zakład toho pak su demokratiju lubowacy łužiscy wobydlerjo.
