Susodźa z mjenje běrokratiju
Poćahi k pólskim gmejnam z podobnymi strukturami so wupłaća
Njeswačidło (JK/SN). Njeswačanska gmejna je čłon Europskeho zwjazka łužiskich parkow. Zwjazkej přisłušeja wjacore komuny we Łužicy kaž Njeswačidło, Mužakow abo Choćebuz a w Pólskej. Tam su to přewažnje gmejny w kónčinje Jelenia Góra, hdźež su mnohe tež Serbam znate parki. Mjez čłonskimi gmejnami wobsteja wšelake zwiski. Na nimale prawidłownych schadźowanjach sej zhromadne postupowanje dorěča. Tak tež w prócowanjach wo europske spěchowanske srědki zhromadnje postupuja. Za čłonow z Łužicy so dobre poćahi do Pólskeje z tym wupłaća, zo je w Pólskej wo wjele lóšo, dóstać spěchowanske srědki. Wosebje je w Pólskej mjenje běrokratije a tuž su pjenjezy spěšnišo na městnje. Tole je tež Njeswačanska gmejna hižo nazhoniła. Hromadźe z gmejnu Kliczków, hdźež je znaty hród z parkom, su so wo spěchowanske srědki požadali a je tež dóstali. Za to móžachu flyery we wjacorych rěčach, mjez druhim tež serbsce, wo hrodźe a parku w Njeswačidle wudać.
Planowanje horta najwažniše
Połoženje horta Radworskeje pěstowarnje „Marja Kubašec“ tuchwilu runjewon najoptimalniše njeje. Zo bychu tole změnili, chcedźa na šulskim terenje nowy hort twarić. Za to pak gmejna wjele wutrajnosće trjeba – a hišće wjace pjenjez.
Radwor (UM/SN). Lěto 2024 steji w Radworskej gmejnje w znamjenju planowanja noweho hortoweho twarjenja. Gmejnska rada bě hižo w nowembru 2023 rozsudźiła, nadawk za planowanje w cyłkownym wobjimje 586 000 eurow planowanskemu běrowej z Wjazońcy přepodać. Najprjedy pak ma so planowanje hač k druhemu schodźenkej, tak mjenowanemu předplanowanju zwoprawdźić. „Za to přewostajimy 90 000 eurow ze swójskich srědkow“, praji Radworska wjesnjanostka Madeleine Rynčowa (Minakałske wolerske zjednoćenstwo).
Dwaj dnjej trajace pjerjodrěće su wčera a dźensa na Rownjanskim ...
Woprawdźita šansa Łužicy na modelowy status
Grodk/Brüssel (SN/at). Delegacija Łužiskeho kruha je so dźensa do Brüssela podała. Zastupjerjo komunalneho zwjazkarstwa za wuwiće strukturow změja tam na třoch dnjach rozmołwy, zo bychu hospodarske zajimy regiona na europskej runinje zastupowali. Hižo dźensa popołdnju chcychu so měšćanostki Christine Herntier (Grodk), Simone Taubenek (Baršć) a Birgit Zuchold (Wjelcej) kaž tež měšćanosća Fred Mahro (Gubin), Ralf Brehmer (Rěčicy) a Manfred Heine (Sprjewiny Doł) z komisarom Europskeje unije Thierryjom Bretonom zetkać a za Łužicu jako přichodny „Net Zero Valley (dolina nettoweje nule)“ wabić.
Krótkopowěsće (20.02.24)
Wjace podpěraćelow festiwala
Choćebuz. Mjeztym je 65 wosobow dźěłowu papjeru za woprawdźity Łužiski festiwal podpisało. Zajimcy móža lisćinu podpěraćelow pod www.echteslausitzfestival.de widźeć. Čłonojo iniciatiwy za woprawdźity Łužiski festiwal swoje mjeno njewozjewja, dokelž dožiwja ze lońšeje nazymy wosobinske nadběhi, wumjezowanja a difamowanja.
Wo deportaciji Słowjencow
Wien. Wustajeńca „Spuren. Sledi“ wuměłcow Karla Vouka, Vereny Gotthardt, Tanje Prušnik a Marka Lipuša budźe wot 22. małeho róžka tydźeń w awstriskim parlamenće we Wienje widźeć. Wona so wěnuje mjez druhim deportaciji 277 swójbow Korutanskich Słowjencow za čas knjejstwa nacijow. Wuměłcy ze swojimi twórbami tež na dóńt swojich potrjechenych prjedownikow dopominaja.
Wočakuja haćenja stawka dla
Kružny wobchad přewidźał
Tumory kože pola psa
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (26)
Čim starši psyk je, ćim wjetša bywa prawdźepodobnosć, zo na raka schori. Při tym jewja so wšelake formy njestrašnych a strašnych tumorow we wšelakich organach. Někotre sahaja do hłubokosće, dalše so na powjerchu puknu a zaso druhe tworja metastazy, kotrež so po cyłym ćěle rozšěrjeja. Hustohdy hrajetej genetika a družina psa rólu.
Dokelž njeje móžno wšitke družiny nadobo rozjimać, chcu so tule na wočiwidne formy raka w a na koži koncentrować, kotrež wučinjeja něhdźe 30 procentow wšěch tumorow, 20 do 40 proc. z nich su strašne (maligne).
Tumor w abo na koži nastanje přez wopačnu regulaciju rósta bańkow. Někotre bańki změnja swój program a swoje kajkosće a so njekontrolujomnje rozmnoža.
Lěkarjo zarjaduja tumor stajnje do znajmjeńša dweju skupinow: strašne/njestrašne a z kajkich družinow bańkow je nastał.
Policija (19.02.24)
W domje kable kradnyli
Miłoraz. W nocy na sobotu su so njeznaći do jednoswójbneho domu na Wochožanskim puću w Miłorazu w Trjebinskej gmejnje zadobyli. W domje wotstronichu namócnje wjacore koporowe kable kaž tež wšelake nastroje a wzachu je sobu. Rubiznu trochuje policija na něhdźe 3 000 eurow, wěcna škoda wučinja něhdźe 5 000 eurow. Hač jedna so wo twarjenje, z kotrehož su wobydlerjo přesydlenja wsy dla wućahnyli, z policajskeje rozprawy njewuchadźa.
Zhromadna rěčna hodźina
Diferencu móža wurunać
Hospodarski plan delanskeje gmejny z někotrymi ćežemi
Róžant (SN/MWj). Za lěto 2024 móže gmejna Ralbicy-Róžant hišće nahladny hospodarski plan nastajić, byrnjež jón jenož ze swojimi likwidnymi srědkami wurunać móhli. Za přichodne lěta budźe to wjele ćešo. „Potom budźemy jenož hišće to najnuzniše zwoprawdźić móc“, praji wjesnjanosta Hubertus Ryćer (njestronjan) na zašłym posedźenju gmejnskeje rady. Do toho bě komornica Franciska Čapikowa najwažniše ličby předstajiła a tohorunja k lutowanju namołwjała.
Mjez dochodami a wudawkami maja deficit 255 000 eurow. Te drje móža ze swójskimi srědkami wurunać. Pjenjezy pak na druhich městnach pobrachuja. Něhdźe 570 000 eurow dyrbi gmejna jako swójski podźěl za wobhospodarjenje Ralbičanskeje pěstowarnje wudać. To je 140 000 wjace hač loni. Na tamnym boku dyrbja lětsa z něhdźe 80 000 eurami mjenje přemysłoweho dawka ličić. Tež zarjadniskemu zwjazkej Při Klóšterskej wodźe dyrbja wjace pjenjez płaćić. Za wotpłaćowanje swojich běžnych kreditow wudadźa 30 000 eurow.
