Brězowka (AK/SN). Dźěła na narunanskim nowotwarje gratownje dobrowólneje wohnjoweje wobory w Brězowce so ke kóncej chileja. Tole podšmórny wjesnjanosta Sebastian Bertko (njestronjan) štwórtk na posedźenju radźićelow gmejny Dźěwin, kotrejž Brězowka přisłuša. „Jako gmejna chcemy gratownju ručež móžno a swjatočnje wobornikam přepodać“, wjesnjanosta wuzběhny. Dokładny termin hišće jasny njeje.

Wjele małych kročelow je hišće trjeba, znazorni Brězowski nawoda wohnjoweje wobory Olaf Hanusch w swojej rozprawje. Aktualnje maja 39 aktiwnych wobornikow, 13 staršich čestnych kameradow a 20 šulerjow w dźěćacej a młodźinskej wohnjowej woborje. Loni mějachu dwanaće zasadźenjow z dohromady něhdźe 220 hodźinami. „Znajmjeńša 100 hodźin smy do wokrjes­neho wukubłanja inwestowali. Wone drje płaći wjele mocow, je pak prawy puć“, wuzběhny Hanusch a doda: „Dźakowano wukubłanju směmy so z dru­himi woborami na přikład w Ha­morskej milinarni abo w Běłej Wodźe zasadźić“.

Před dźesać lětami je Bukečanska gmejna we wjesce Błócany (Plotzen) kruty błyskač instalowała. Mjeztym je připrawa wokrjesej nimale tři miliony eurow přidatnych dochodow „wobradźiła“.

Brigadnicy lětsa 20. probowe lěhwo w čěskich Hejnicach přewjedli

Hejnice (JP/SN). Šěsć hodźinow wob dźeń spěwać – to je 1. serbska kulturna brigada wot štwórtka hač do njedźele směła. W něhdyšim klóštrje w čěskich Hejnicach su brigadnicy lětuše probowe lěhwo přewjedli. Tutón přebytk běše zwjazany z małym jubilejom: Proby přewjedźechu so tam dwacety raz. Składnostnje jubileja wobrubichu brigadnicy pod nawodom dirigentki Judith Kubicec njedźelnišu Božu mšu.

Połnych wjesela běše dohromady 60 wobdźělnikow štwórtk popołdnju do Hejnic dojěło. Wšitcy wopytachu klóšter prěni raz. Přičiny za to su wšelakore: ­Pak njeběše w zańdźenych lětach swobodnych městnow, pak běše probowe lěhwo tam wupadnyło. Hnydom po tym zo běchu spěwarki a spěwarjo brigady z busa wulězli, napadny jim rjana, hoberska žołta klóšterska cyrkej w baroknym stilu.

Nowa redaktorka časopisa

Budyšin. Redaktorka časopisa ewangelskich Serbow Pomhaj Bóh Trudla Malinkowa swoju zamołwitosć po 25 lětach­ kónc lěta woteda. Nowa redaktorka Katja Meyerowa, ewangelska Serbowka a studowana, inženjerka pochadźa ze Sćijec a bydli hižo wjele lět ze swójbu w Münsteru. Dotal je w časopisu prawidłownje za dźěći pisała. Wona wjeseli so na nowy nadawk, kotryž budźe hłownje z Münstera wukonjeć. Jónu wob měsac přebyła wšak prawidłownje we Łužicy.

Dźewjeć koncertow planowali

Budyšin. Za komorny hudźbny swjedźeń, kotryž wotměje so lětsa wot 15. do 21. awgusta, su dźewjeć koncertow na hrodach a w cyrkwjach na wuchodźe Sakskeje planowali. Tak přijědźe mjez druhim bračist Nils Mönkemeyer, lawreat myta Grammy Bobby McFerrin abo kwartet Grundmann do Łužicy.

Widejowa hra dobywa swět