Budyšin. Skoro njebychmy ju spóznali, wšako znajemy šefowku serbskeho hosćenca „Wjelbik“ w Budyšinje Moniku Lukašowu skerje w serbskej narodnej drasće. Njedawno je wona hosćenc „skrótka“ wopušćiła, zo by „našich“ ­francošćinarjow 8. lětnika na Serbskim gymnaziju wopytała.

Najprjedy je Monika Lukašowa wo swojim wukubłanju w francoskej Elsaskej rozprawjała. Tu njeje so jeno z regionalnej a francoskej kuchnju zeznajomiła, ale je tež swoje „warjenske kumšty“ jara rozšěriła. Na spočatku wobdźěli so na mjezynarodnym wukubłanskim programje za kucharjow. W tym času nawukny tež francosku rěč. W restawranće z třomi hwězdami z mjenom „Au crocodile“ w Strasbourgu je po zakónčenju programa hišće powołanje Pâtissière nawuknyła. Jako tajki sy w francoskej kuchni za přihot słódkich pojědźow zamołwity.