Policija (06.09.24)
Policija prosy wo pokiwy
Budyšin. Hižo wot 31. awgusta sem pyta Budyska policija za 63lětnym Klausom Dieterom T. Na tutym dnju su jeho susodźa jeho bydlenja w Strowotnej studni něhdźe w 5.30 hodź. w krótkich jeansach, zelenym T-shirće a běłych sportowych črijach z ćmowozelenym nachribjetnikom wuhladali. Zasadźity muž je něhdźe 1,75 m wulki a ma šěre włosy. Pokiwy podajće prošu pod tel. čo. 03591 356 0.
Na koncert do muzeja
Budyšin. Pjatk, 13. septembra, we 18 hodź. zahraje z mytom Menuhina wuznamjenjeny pianist Helge Antoni koncert pod titulom „Nadźija 2024“ na swjedźenskej žurli Serbskeho muzeja w Budyšinje. Zajimowanym poskićuja muzejownicy hižo w 16.30 hodź. wodźenje po wustajeńcy muzeja.
Wodźenje po sotrowni
Mały Wjelkow. Na dnju wotewrjeneho pomnika njedźelu, 8. septembra, přeprosy tež towarstwo Małowjelkowska sotrownja wšitkich zajimcow na serbske wodźenje. Tute započnje so w 14 hodź. před sotrownju na Naměsće Zinzendorfa w Małym Wjelkowje a chce wosebje serbske aspekty kołowokoło zhromadneho žiwjenja žonow a sotrow předstajić.
Přednošuje wo Bukecach
Popołdnjo za swójby w Radworju
„Z wodźikom k wowce na wopyt ...“
Hamor (AK/SN). Techniska uniwersita Drježdźany wupruwuje wot tutoho tydźenja mjez dwórnišćom w Klětnom a Bjerwałdskim jězorom awtonomnje jězdźacy, z wodźikom ćěrjeny bus. Cyłe lěto chcedźa jón fachowcy wupruwować a wuslědki dokumentować. Partnerojo projekta su Zaměrowy zwjazk Hornja Łužica a Delnja Šleska (ZVON), Institut Fraunhofera ze Žitawy, gmejna Hamor a lokalne předewzaća.
Cyłkowna suma kóštow za projekt z mjenom „Awtomatizowane jězdźidła z wodźikom we wjesnych kónčinach“ je 5,5 milionow eurow. Swobodny stat Sakska a zwjazkowy minister za hospodarstwo a škit klimy projekt spěchujetej. „Naša wizija je, zo změje wobydler móžnosć, sej bus z pomocu smartfona skazać“, to podšmórny póndźelu na posedźenju Hamorskeje gmejnskeje rady inženjer dr. Ronny Werner. Wón je docent w fachowym wobłuku za spalowanske motory a ćěridłowe systemy na Drježdźanskej Techniskej uniwersiće. „Ideja do přichoda je: Z wodźikom k wowce na wopyt jěć móc“, wón doda.
Són młodosće sej spjelnił
Chróšćanski bio-bur Ignac Wjesela poskićuje lětsa tež zeleninu
Chrósćicy (SN/lmc). „Sony wostanu sony, doniž sej je njespjelniš!“ Jako běše 16 lět, je tež Ignac Wjesela wulki són měł: Samostatnje ratarski zawod wobhospodarić. „Swoje předstawy zwoprawdźić a wěcki sam do horšće wzać“, to běše wizija młodeho Chróšćana. Produkować chcyše wón wot spočatka sem ekologisce a naslědnje, w harmoniji z přirodu.
Krótkopowěsće (06.09.24)
Partiturje serbskeje spěwohry
Budyšin. Po prěni raz dospołnje wozjewjenej partiturje spěwohry „Smjertnica – serbska ludowa opereta w jednym jednanju“ Jurja Pilka předleži wotnětka tež klawěrny wućah krucha. Wudawaćel wobeju publikacijow je nakładnistwo Lumir. Wčera je nakładnik Měrko Šołta noty nawodźe Serbskeje centralneje bibliotece Witej Bejmakej přepodał, hdźež su zajimcam přistupne.
Młodźi ludźo su nětko prašani
Lipsk/Berlin. Němski čerwjeny křiž pyta nuznje nowych zwólniwych darićelow kreje. Krok po kroku přestawaja mjenujcy ludźo z tak mjenowaneje generacije „baby-boomerow“ krej darować. Młodźi ludźo, kiž su so po lěće 1990 narodźili, su tuž „nětko esencielni, zo by so poskitk krejnych konserwow tež w přichodźe na wysokim niwowje zdźeržał“.
Napoje wobmjezować
Hwězdne stawizny Heraklesa
Budyšin. Towarstwo Ad astra Budyšin přeprošuje sobotu, 7. septembra do Budyskeje šulskeje hwězdarnje na nowe wudaće swojeje serije přednoškow wo grjekskej mytologiji „Hwězdne stawizny Heraklesa“. Hwězdarnja wotewri so wot 19 hodź. Zarjadowanje same započina so w 19.30 hodź. a traje hač do 22 hodź. Po přednošku móžeće z teleskopom tež „realne“ objekty hwězdnišća wobkedźbować. Napoje a přikuski so poskićuja. Zastup płaći 10, za dźěći 5 eurow.
Na serbskeho pčołarja spominać
Budyšink. Składnostnje jeho dźensnišich 300. narodnin přeprošuje Towarstwo pčołarjow Šěrachoweje towaršnosće hromadźe z wosadu a gmejnu Malešecy sobotu, dnja 7. septembra, na wopomnjenske zarjadowanje do Budyšinka, zo bychu najsławnišeho pčołarja 18. lětstotka Hadama Bohuchwała Šěracha počesćili. Dźeń zahaja w 10 hodź. w domje Šěracha z přednoškami wo jeho žiwjenju a skutkowanju. W 13 hodź. su wopomnjenske kemše w tamnišej cyrkwi, po tym poswjeći so pomnik Šěracha na cyrkwinskim dworje.
Dźeń wotewrjeneho pomnika
Etat přizwolenja kmany
Gmejna Slepo dale konsekwentnje swój dołh pomjeńšuje
Slepo (AK/SN). „Dźěła na narunanskim nowotwarje Rownjanskeje pěstowarnje ‚Milenka‘, kotraž je w nošerstwje našeje gmejny, dale zaměrnje postupuja“. Tole podšmórny Steffen Seidlich, nawoda zarjada za planowanje, twarstwo a hórnistwo w zarjadniskim zwjazku Slepo, wutoru na posedźenju tamnišeje gmejnskeje rady. Dźěła na třěše hišće dokónčene njejsu. „Tež na wonkownym arealu so hižo dźěła“, rozprawja Steffen Seidlich. „Kopanišćo a wobdawacy płót stej nimale dotwarjenej“, wón doda. Hrajkanišćo ma hišće nastać. Kónc lěta/spočatk noweho lěta ma pěstowarnja dotwarjena być. Po tuchwilnych planach přećehnje kubłanišćo w februaru 2025. Při tym chce twarski zawod gmejny pěstowarnju skutkownje podpěrać.
„Pjenježk, najgroš, nórt a hriwna...“
Budyšin. Wo pjenjezach so poprawom njerěči, ale runje z tutej temu je so wčera Alexander Pólk w swojim přednošku pod titulom „Pjenježk, najgroš, nórt (štwórćina tolerja) a hriwna – wo stawiznach pjenjez“ na zarjadowanju „Kofej w třoch“ w Budyskim Serbskim muzeju rozestajał.
