Wojerecy. Sakska krajna centrala za politiske kubłanje přeprošuje dźensa, pjatk, 23. awgusta, wot 17 do 19 hodź do Łu­žiskeho centruma na diskusiju ze šěsć ­direktnymi kandidatami wólbneho wo­krjesa 55. Tematizuja so njedostatk fachowcow, kubłanje a nutřkowna wěstota. Wobydlerjo su na rozmołwu přeprošeni. Zastup je darmotny.

Spominaja rjekowku

Dobruša. Na česć Marje Simonoweje, załožerki dźěła Čerwjeneho křiža w Sakskej, wotkryje Rada žonow na wsy Sakska z. t. sobotu, 24. awgusta, w 16 hodź. při jeje ródnym domje w Dobruši taflu k wopominanju na tam před 200 lětami narodźenu Serbowku. Tomu sćěhuje poswjećenje pomnika na Starym torhošću wsy. Njedźelu, 25. awgusta čita so na kěrchowje Trinitatis w Drježdźanach w 14 hodź. z noweje biografije wo njej kaž tež z jeje dopomnjenkow.

Chór Budyšin zaspěwa

Čornobóh. Chór Budyšin zaspěwa tutu njedźelu, 25. awgusta, w 14.30 hodź na Čornoboze. Kóždolětny koncert w lěću přiwabi do hosćenca na Čornoboze pućowarjow a lubowarjow serbskeje, němskeje, słowjanskeje a mjezynarodneje chóroweje hudźby. Zastup na koncert je darmotny. Spěwarjo pak pjenježne dary witaja.

We wobchodźe kradnyli

Ćisk. Dotal njeznaći su so wot wutory wječora w 19.30 hodź. hač do srjedy ranja w 5.45 hodź. do wobchoda w Ćisku za­dobyli. Woni přepytachu rumy a pokradnychu wjacore sta eurow. Wěcna škoda wučinja něhdźe 1 000 eurow. Kriminalni technikarjo zwěsćichu na městnje njeskutka slědy. Wo dalše přepytowanja staraja so kriminalisća.

Wotrow (SN/MiR). Rejza Čornakowa je wčera we Wotrowje swoje 90ćiny woswjećiła. Poslednja nošerka serbskeje narodneje drasty we wsy, je so nad wopytom swojich dźěći a jich swójbow, wosebje pak wnučkow a prawnučkow, jara zwjeseliła. Najmjeńši běchu sej pyšnu serbsku katolsku drastu zwoblěkali a prawowce zarejowali. Wosebje wulke wjeselo běše, jako so na swójbnym statoku, tam hdźež jubilarka wot časa zmandźelenja blisko wosadneje cyrkwje bydli, k reji „Takle wjerćimy“ zestupachu. Zdobom su jej wnučki zaspěwali.

Před dźesać lětami, jako bě Rejza Čornakowa swoje 80ćiny woswjećiła, pisaše Wotrowčan Jan Wjenk w Serbskich Nowinach přinošk z mnohimi zajimawostkami, mjez druhim tole: „Hišće dźensa spominaja na přichad fararja Salowskeho 18. apryla 1972 do Wotrowa.“ Jemu a tež jeho hospozy skićachu Čornakecy na dlěši čas kwartěr. „Dokelž tehdy k 200lětnemu wobstaću Wotrowskeje wosady cyrkej a potom faru přetwarichu, běštaj farar a jeho hospoza Hilža Wjeselic naraz bjezdomnaj.“

Gmejna Ralbicy-Róžant ma efektiwnje hospodarić

Róžant (JK/SN). Na wšěch 18 dypkow měješe dnjowy porjad prěnjeho posedźenja noweje gmejnskeje rady gmejny Ralbicy-Róžant wčera wječor. Tak móžachu třo nowi radźićeljo, Halena Jancyna, ­Tomaš Glawš a Matthias Möller hnydom, takrjec „do zymneje wody skočić“ a wužadaće dźěło radźićela zeznać. Po tym zo běchu, kóždy jednotliwje, swój slub ­wotpołožili -– hač na radźićela Eduarda Luhmanna wšitcy serbsce –, započinachu z dźěłom.

Radźićeljo přepodachu wšelake nadawki za kónčny dźěła nowotwara Ralbičanskeje pěstowarnje. Tak dósta nadawk za wuhotowanje pěstowarnje z meblemi, we wysokosći 303 060 eurow, přede­wzaće HABA Sales we Bad Rodach. Z teje sumy přewozmje nošer pěstowarnje, Serbske šulske towarstwo z. t., dźesać procentow. Kaž sobudźěłaćerka planowanskeho běrowa rozłožowaše, leži poskitk pod kalkulowanej sumu, štož gmejnje tyje. Dalši nadawk přepodachu radźićeljo za něšto wyšu sumu, hač běchu to předwidźeli. Zatwar kuchnje za spřihotowanje a wudawanje jědźe we wysokosći 41 600 eurow přewozmje firma z Hnašec.