Motorski smjertnje znjezbožił
Lětsa zaso přizwoleny etat
Zwyša dawki a přiměrja je z tym zakonskim žadanjam
Slepo (AK/SN). Slepjanska gmejna ma lětsa zaso schwaleny etat. Ćeže předchadźaceju lětow su přewinjene. To je dopóznaće komornicy Dany Piehl w aktualnym hamtskim łopjenu gmejny.
Lětuši etat je gmejnska rada hižo 14. měrca wobzamknyła.
Mnohe překwapjenki dožiwili
Prěni hońtwjerski a ratarski swjedźeń w Terpju (Terpe) njedaloko města Grodk je zańdźeny kónc tydźenja wulku syłu ludźi na składowanišćo drjewa tamnišeho wobydlerskeho drustwa TBG přiwabił.
Terpje (JoS/SN). Předsydstwo drustwa TBG kaž tež tamniše hońtwjerjo zrodźištej ideju za swjedźeń. Loni hižo su započeli swjedźeń pod nawodom Paula Meußlera a z čłonami hońtwjerskich dujerjow z Grodka „Łužiski kraj“, přihotować. Přez cyły dźeń knježeše minjenu sobotu na swjedźenišću čiłe žiwjenje, wšako atrakcije njepobrachowachu. Wjesny předstejićer Detlef Langer witaše wopytowarjow kaž tež wuhotowarjow programow. Dujerske skupiny, mějićeljo sokołow a hońtwjerskich psow a lubowarjo historiskich ratarskich mašinow so ze zajimcami rozmołwjachu. Přećeljo wlečakow ze susodneje wsy Zabrod su tohorunja zahorili. Dźěći zabawjachu so z kołojězbami po polach, łukach a lěsach. Dale so wothorjeka, ze zběhanskeho jewišća po krajinje rozhladowachu.
Róžeńčansku Šołćic pjekarnju tele dny dospołnje ponowja. ...
Krótkopowěsće (31.07.24)
Kónc wukubłanja so wuskutkuje
Budyšin. Wo snadnuškim přirosće bjezdźěłnosće we wuchodnej Sakskej je Budyska wotnožka Zwjazkoweje agentury za dźěło dźensa rozprawjała. Kónc wukubłanja a słabu konjunkturu mjenowaše za hłownej přičinje. Ličba bjezdźěłnych je so w juliju wo 567 na 20 469 wosobow zwyšiła, to wučinja kwotu 7,4 procentow. Porno lońšemu pražnikej je 984 ludźi wjace bjez přistajenja było.
Škody žadaja sej wuporjedźenje
Budyšin. Wliwy wjedra a zdźěla tež poćeženje přez wobchad su na Budyskim Mosće měra přez lěta škody zawostajili. Planowanja za wuporjedźenje su w twarskim zarjedźe města zahajili, rjekny Peter Stange, nowinski rěčnik měšćanskeho zarjadnistwa, našemu wječornikej. Tuchwilu z toho wuchadźeja, zo měła so měšćanska rada na prozy do noweho lěta z tematiku zaběrać. Poslednje wulke wobnowjenje mosta bě kónc 1990tych lět.
Mjenje ćěkancow přišło
Check wólbnych programow
Budyšin. Sakskaj zamołwitaj ewangelskeje a katolskeje cyrkwje přeprošujetaj wšitkich zajimowanych wutoru, 6. awgusta, w 19 hodź. do wosadneho domu ewangelskeje tachantskeje wosady (Při měšćanskim nasypje 12). Na zarjadowanju so hladajo na wólby do Sakskeho krajneho sejma wólbne programy šěsć najsylnišich stronow rozjimaja. Zastup je darmotny.
Bernd Pittkunings koncertuje
Stróža. Domizniske towarstwo Radiška a Biosferowy rezerwat UNESCO Hornjołužiska hola a haty (OHTL) přeprošujetej na koncert serbskeho pěsnjerja Bernda Pittkuningsa do centruma OHTL w Stróži, a to wutoru, 6. awgusta, w 19 hodź.
Nic jenož psam na wužitk
Na sewjerowuchodźe Budyšina maja psy nowe hrajkanišćo
Budyšin (UM/SN). W měšćanskej štwórći Strowotna studnja je město Budyšin njedawno psyču łuku wotewrěło. Runje za wobsedźerjow psow w měsće njeje winowatosć wodźenja z powjazom husto lochke, hdyž chcedźa, zo bychu domjace zwěrjata po swojich zwěrjećich instinktach žiwe być móhli. Tajka specifisce za psy koncipowana připrawa je nětko wulke wolóženje. Tež Budyski twarski měšćanosta Heiko Nowack so nad inwesticiju wjeseli: „Budyšenjo su sej hižo dołho tajku łuku přeli. Přeco zaso pak je ideja na njedobrej situaciji měšćanskeho etata zwrěšćiła“. Měšćanscy radźićeljo CDU su loni iniciatiwu realizowanja tajkeje psyčeje łuki zahibnyli a we wotpowědnej próstwje frakciskeje předsydki Katje Gerhardi mjez druhim sformulowali, zo ma tajka městnosć tež wysoku socialnu komponentu, wšako maja ludźo tam składnosć so rozmołwjeć. „To běše lětsa w februaru – nětko, jenož pjeć měsacow pozdźišo, hižo tak daloko je“, so Heiko Nowack wjeseli. Kóšty za projekt wučinjeja 15 000 eurow.
Staršik z bliskeje perspektiwy
Šula je kowarnju wužiwała
We łužiskich wsach běchu stajnje hižo najwšelakoriše rjemjesła zakótwjene a su so zdźěla lětstotki zachowali. Dźensa je so wulki dźěl z tychle rjemjesłow bohužel pozhubił. W našej lětnjej seriji chcemy wobswětlić, hdźe běchu kotre rjemjesła doma a kotre wosebitosće su so při tym wobkedźbowali. (15)
Lětsa před 760 lětami so Ralbicy prěni raz pisomnje naspomnichu. W znatej delanskej wsy bydli dźensa něhdźe 330 ludźi. Nimale wšitcy su Serbja. Wjesny chronikar Stanisław Statnik je wědu wo stawiznach wsy přichodnym generacijam wobchował.
Nimo dalšich rjemjeslnikow sy tam před połdra lětstotkom měł třoch kowarjow. Najstaršu kowarnju nańdźechmy tehdy na róžku dźensnišeho Radlubinoweho a Šulskeho puća. Znate je, zo tam hižo 1843 Jakub Rachel kowaše. W kowarni pak njebě naslědnika, kiž by rjemjesło dale wjedł. Tuž tam kowarstwo zańdźe. W lěće 1906 so domske wotpali, tola masiwnje twarjena kowarnja so wobchowa. Dalši Jakub Rachel woženi so z Marju Wjacławkec z Hórkow. Jeju dźěći předachu po smjerći staršeju zbytki kowarskeho grata do Hórčanskich skałow.
Krótkopowěsće (30.07.24)
Rěčne certifikaty kursantam
Budyšin. Lětuši Mjezynarodny lětni kurs za serbsku rěč a kulturu bu minjenu sobotu zakónčeny. Po zdźělence jón zarjadowaceho Serbskeho instituta je sej z dohromady „32 wobdźělnikow 18 znajomosće po europskim referencnym ramiku za rěče na pjeć niwowach wot A1 do C1 certifikować dało“. Pruwowanja spřihotowali, přewjedli a wuhódnoćili běchu sobudźěłaćerki Rěčneho centruma WITAJ.
Jězdźenki podróša
Budyšin. Kaž kóžde lěto zwyši Wobchadny zwjazk Hornja Łužica-Delnja Šleska (ZVON) tež lětsa zaso płaćizny jězdźenkow. Přerěznje podróša so tikety wot 1. awgusta wo 7,3 procenty. Wuwzate su jězdźenki za šulerjow a šulerske skupiny. Wo zwyšenju je ZVON wčera online informował. Hłowna zhromadźizna zwjazka bě podróšenje hižo kónc junija přizwoliła.
Natwarja fabriku za municiju
