Policija (24.07.24)
Spěšnosć kontrolowali
Zhorjelc. Na awtodróze A4 na směr Zhorjelc je wobchadna policija při parkowanišću Lubata póndźelu popołdnju předpisanu spěšnosć 80 km/h kontrolowała. W běhu šěsć hodźin je dohromady 4 068 jězdźidłow přepruwowała. 519 z nich běše jasnje přespěšnje po puću. 153 skućićelow je pjenježnu pokutnu na městnje zapłaćiło, 366 šoferow dóstanje bórze póštu wot zarjada za pokutne pjenjezy. Negatiwny rekord je wodźer Mercedesa ze spěšnosću 159 km/h docpěł. Wón dyrbi nětko ze 700 eurami pokuty, z dwěmaj dypkomaj w Flensburgu a z třomi měsacami zakazom jězdźenja ličić. Nimo toho lepichu zastojnicy jědnaće šoferow, kotřiž njeběchu zakaz přesćehnjenja wobkedźbowali.
Terminy rěčneje motiwatorki
Slepo. Motiwatorka za spěchowanje serbskeje rěče w Slepjanskim regionje přeprošuje wšitkich zajimcow zbliska a zdaloka na slědowace zarjadowanja: Štwórtk, 25. julija, w 20 hodź. na Serbske blido w Slepjanskim hosćencu a piwowarje „Brauwerk Schleife“; pjatk, 2. awgusta, w 15.30 hodź. do bróžnje Bogumiła Šwjele we Wochozach na přednošk wo serbskich wjedrowych a burskich kaznjach kaž tež na zhromadnu bjesadu při kofeju; sobotu, 10. awgusta, w 10 hodź. na Serbske lěćne pućowanje z Hyncom Rychtarjom. Start pućowanja je parkowanišćo před pjekarnju Dreißig w Běłej Wodźe.
Dróha dospołnje zawrjena
Wuměłske ambicije wuwiwać
Lětsa wosebje wulki zajim za lěćny camp w Kamjentnym domje
Budyšin (SN/MiR). Na lětuši lěćny camp projekta „Pop2Go – Po puću w žiwjenju“ je so wjace hač dwójce telko zajimcow přizjewiło, hač maja městna. Kaž zamołwity Andre Toth z Budyskeho Kamjentneho doma powěda, su 26 wobdźělnikow wuzwolili. „Pola nas dźe po rjedźe přizjewjenja, druhdy pak tež los rozsudźi.“ Lětsa su, kaž hižo zašłe lěta tež, mjez wobdźělnikami wšelake narody zastupjene. Tež Serbow wospjet mjez nimi je. Za organizatorow pak wažne njeje, z kotrych krajow zajimcy pochadźeja. Jim dźe wo to, zo jako zarjadnišćo Budyskeho wokrjesa za dźěći a młodostnych, poskitki z regionalnymi akterami přihotuja. Mjez spěchowarjemi projekta je Němsko-Serbske ludowe dźiwadło kaž tež Domowina. „Z dorozumjenjom nimamy scyła problemy“, Andre Toth wuzběhnje, „wužiwamy digitalne komunikaciske programy. Z tym natwarimy konwersaciju z kóždym wobdźělnikom a kóždej wobdźělnicu.“
Přichod kupanišća je njejasny
Kupanišćo w Nowym Miłorazu je skerje swimmingpool. Hač do kónca julija ma narunanski twar poprawom hotowy być. Hač pak so to poradźi, je prašliwe. Twarske dźěła so tuchwilu dokónčić njehodźa.
Slepo/Nowy Miłoraz (CK/SN). Tuchwilu je situacija slědowaca: Trjeba hišće trochu časa, prjedy hač móža so ludźo w Nowym Miłorazu kupać. Po tym zo běchu sobudźěłaćerjo předewzaća Kupsch basenk z módrej foliju wukładli, su ze zatwarom filtroweje techniki zaběrani byli. Někotre metry dale je bager twarskeje towaršnosće TSL Grodk po kładźenju rołow wšelake hrjebje zasypał.
Cyle skedźbnje, na njewěstych packach, wotkrywataj sej młodej ...
Jónkrótne hrajkanišćo přepodali
Prózdninska rozmołwa z wuměłcom
Telemedicina garant zastaranja
W Braniborskej maja nowy koncept mediciniskeho zastaranja ludźi. Tak mjenowana telemedicina ma tam falowacym lěkarjam wotpomhać. Je to model přichoda?
Choćebuz (SN/MG). Zwjazkowe strowotniske ministerstwo ma telemedicinu jako přichod lěkarskeho zastaranja we wjesnych kónčinach. Z pomocu digitalnych nastrojow a komunikaciskich srědkow móža lěkarjo tak, byrnjež při pacientach njebyli, diagnozy stajić, rozmołwy wjesć a pacientow w nuzowych padach zastarać. Za to dadźa lěkarjo potom nuzowym sanitetarjam instrukcije.
We Łužicy spěchuje so tajki wutwar telemediciny nětko w štyrjoch wokrjesach: Dubja-Błóta, Łobjo-Halštrow, Hornje Błóta-Łužica a Sprjewja-Nysa. Tež město Choćebuz profituje wot pjenjez. Cyłkownje 650 000 eurow wučinja cyłkowny financielny ramik. Z pjenjezami chcedźa wšitke nuzowe jězdźidła z tabletami a wotpowědnej software wuhotować.
Njejasny status Ralbičanskeho teritorija wjelkow
Wuchodna Sakska wostanje kónčina, w kotrejž sydli wjetšina wjelkow w Swobodnym staće Sakskej (Serbske Nowiny informowachu). Dotal su 41 wjelčich teritorijow w Sakskej wobkrućili, kaž Krajny wobswětowy zarjad w Drježdźanach na zakładźe nachwilnych wuslědkow lětušeho monitoringa wjelkow zdźěli.
Drježdźany (SN/at). We wuchodnej Sakskej su najwjetšu dynamiku nastupajo wutworjenje, přesunjenje a zhubjenje wjelčich teritorijow zwěsćili. Nowej stadle stej so w južnym dźělu Zhorjelskeho wokrjesa, w Kotmarskim a Knježnjacym lěsu, wutworiłoj. Na sewjeru wokrjesa je so kónčina Rychwałd přidružiła. Runočasnje njejsu wjelče teritorije Minakał, Tautewalde a Linz blisko Kinsporka w Budyskim wokrjesu kaž tež Trjebuz (Trebus) sewjernje Niskeje znowa dopokazać móhli. Dokelž su so stadła zhubili, dóńdźe k tomu, zo so druhe, hižo wobstejace teritorije přesunychu. K tajkim słušatej teritorijej Dubc II a Nowowjesčanska (Noeser) hola pola Rózborka, kotrejž stej w monitoringowym lěće 2023/ 2024 hromadźe rostłoj. Njejasne je tuchwilu hišće status Ralbičanskeho teritorija.
Krótkopowěsće (24.07.24)
Dźeń industrijneje kultury
Zły Komorow. Druhi dźeń industrijneje kultury swjećitej Turistiska syć industrijna kultura Braniborskeje a zwjazk muzejow kraja 10. awgusta. Wotewrjenske zarjadowanje budźe w historiskej zběharni łódźow w Niederfinowje składnostnje jeje 90lětneho wobstaća. 29 městnosćow w Braniborskej a Sakskej na wopyt přeprošuje. Mjez nimi su Picnjanski muzej hětnistwa a rybarstwa, Elektroporclinowy muzej Wulka Dubrawa a Wojerowski Zusowy kompjuterowy muzej.
Wuslědki wostanu stabilne
Drježdźany. 95 procentow wšěch šulerkow a šulerjow w Sakskej je lětsa swoje zakónčace pruwowanja wuspěšnje zmištrowało. Loni bě jich 96 procentow. Přerězna abiturna znamka je lětsa 2,18. Znamki wostanu tak w cyłku stabilne. Wjetšich dalšich chabłanjow hladajo na wolene pruwowanja a wuslědki tež njeje.
Korejčenjo natwarja milinarnju
