Inwestuje do wodočisćernjow
Kamjenc (AK/SN). Zaměrowy zwjazk za wodu a wopłóčki Łužica (WAZV-Łužica) je na swojim posedźenju tydźenja srjedu etat a hospodarski plan za lěće 2025/2026 předstajił. Jednohłósnje su jón radźićeljo zwjazka wobzamknyli. „Hladajo na připrawy a twarjenja bywšeho Zaměroweho zwjazka za wopłóčki ‚Při Klóšterskej wodźe‘ budu wjetše inwesticije trěbne“, tole podšmórny Carola Sende, nawodnica financneho wotrjada w Kamjenskim zawodźe za wodu a energiju EWAG. W planje su inwesticije we wobjimje 835 000 eurow klětu a 80 000 eurow w zapřichodnym lěće na teritoriju Zarjadniskeho zwjazka „Při Klóšterskej wodźe“ zapřijate. Konkretnu potrjebu maja wodočisćernje w Porchowje, Wudworju, Ralbicach a w Šunowje. Tute su wjace hač 20 lět stare a trjebaja nuznje modernizowanje.
Prěnju adwentnu njedźelu dožiwichu we Wotrowje premjeru wosebiteho ...
Krótkopowěsće (03.12.24)
Dohodowna překwapjenka
Budyšin. Čitarjo Płomjenja dóstachu minjene lěta z decemberskim wudaćom zdobom tež wosebitu dohodownu překwapjenku. Lětsa je to něšto wosebite: prěni serbski Micky-Maus-zešiwk! Comicsy z Donaldom, Mickyjom, Goofyjom a dalšimi wobydlerjemi městačka Entenhausen drje kóžde dźěćo znaje. Přiłoha Płomjenja wobsahuje tři comicsy, žortny hodowny kwis a poprjancowy recept.
Wobaraja so wotbagrowanju
Rowno/Budyšin. Wobsedźerjo ležownosće w lěsu pola Rownoho su na wyšim zarjadniskim sudnistwje skóržbu přećiwo wuswojenju za rozšěrjenje Wochožanskeje wuhloweje jamy zapodali. Zelena liga, kotrejež wobswětowa skupina Choćebuz jako wotnajer poł hektara płoniny wužiwa, skóržbu podpěruje. Planowane wotbagrowanje so přećiwo škitej klimy přeńdźe, kritizuje prawiznik.
Dóstanu pjenjezy za přetwar
Hdyž so wšitko wjerći (1. dźěl)
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (59).
Hłowywjerćenje je symptom, kotryž so často jewi. Definujemy jón jako mylenje rumnostneho začuća. Z toho rezultuje njewěsta runowaha, kotruž posudźujemy jako trašacu abo znajmjeńša mylacu. Riziko padnjenja so tak powjetša. Přičin hłowywjerćenja je dosć a nadosć. Na fetach na přikład tukamy na přewrótne reje abo přewulke mnóstwo słódnych napojow. Hdyž so z infektom bědźiš, so ći hłowa husto wjerći. To je cyle normalne a žana přičina so starosćić. Hdyž pak so někomu wšědny dźeń, hač doma hač na dźěle, přeco zaso wjerći, měł to znajmjeńša raz lěkarsce přepytować dać. Hdys a hdys dźě tča za tajkimi symptomami tež schorjenja runowahoweho system. Hłowny organ tohole systema nadeńdźemy w nutřkownym wuchu. Móžemy sej jón předstajić jako z kapalinu pjelnjeny labyrint, wobstejacy z třoch zawjerćanych chódbow a dweju dworow.
Na medijo-pedagogiski wječor
Radwor. Medijowa syć Łužica přeprošuje dźensa wječor we 18 hodź. na medijo-pedagogiski staršiski wječor pod titulom „Staršich sylnić. Dźěći škitać!“ do Radworskeho dwórnišća inkluzije. Fachowcy, mjez nimi medijowy pedagoga Michał Cyž z Budyskeho studija LUCIJA, informuja wo strategijach a metodach, kak móža so starši a dźěći najwěsćišo w digitalnym swěće pohibować. Wobdźělenje je darmotne.
Zhromadnje spěwać
Budyšin. Zwjazk serbskich spěwarskich towarstwow přeprošuje na dalše zhromadne spěwanje. Wone wotměje so jutře, 3. decembra, we 18 hodź. w chórowej rumnosći Serbskeho ludoweho ansambla. Wšitcy zajimcy su wutrobnje witani!
Porěči wo kurwjerchu
Prominentni wino předawaja
Wjele ludźi prěni adwentny kónc tydźenja na Wjacławskich wikach
Budyšin (CS/SN). Po tym zo wulka jědla na Budyskim Hłownym torhošću hižo wot 16. nowembra steji, wuhladaš ju nětko wot minjeneho pjatka rjenje wupyšenu z Ochranowskimi hwězdami. Zmóžnił je to tak mjenowany hwězdowy muž. Na štamboromaj chodźo wón najprjedy po Hłownym torhošću běhaše a potom kaž kuzłar swěcy na hodownym štomje zaswěći. Na to běchu wopytowarjo Wjacławskich wikow hižo žadosćiwje čakali. Swěcy zaswěćić bě wjeršk swjatočneho wotewrjenja 641. Wjacławskich wikow. Zahajiła je wiki dźěćaca spěwna skupina ewangelskeje wosady swj. Pětra pod nawodom Michaela Vettera. Přitomny bě na jewišću před radnicu tohorunja kral Wjacław. Wón mjez druhim rjekny, zo bě jeho dohodowna wóń do sprjewineho města přićahnyła. Wopyt w Budyšinje pak so hewak cyłe lěto zadani, kaž wón wuzběhny.
Serbske kule adwent porjeńšeja
Wojerecy (KD/SN). Ideju wo samopaslenym hodownym dariku móža sej zajimcy na Wojerowskej ludowej uniwersiće zwoprawdźić. Tam rozłožuje Lisa Müller z Njedźichowa wóskowansku a bosěrowansku techniku, z kotrejž so po starodawnym wašnju jutrowne jejka debja. Wona a jeje mać stej před 24 lětami prěnje tajke jejka debiłoj a tele wuměłstwo wot nazhonitych debjerjow nawuknyłoj. Z toho časa stej swoje kmanosće wudospołniłoj. Mjeztym wonej jenož jejka njedebitej, ale tež hodowne kule. Z jehličkami Lisa Müller a jeje mać dypki a smužki na so błyšćace abo mutne kule ze škleńcy abo plastiki namolujetej. Za druhe formy wonej tohorunja přitřihane pjerka wužiwatej.
Wobdźělnicy kursa mjez druhim nawuknu, zo wužiwaš najlěpje łžicu z aluminiuma, dokelž wona tak jara njesazuje. Wósk móže swětły być, ale tež kóždu druhu barbu měć. Wažne je, zo ma kóžda barba swójsku łžicu. Wósk dyrbiš ze spěšnym pohibom na kulu přinjesć, hewak móže wón wotkapnyć a slědy zawostajić. Do toho měło městno za jednotliwe formy na kuli rozrjadowane być.
Něhdźe 200 Chróšćanow a jich hosćo su na předwječoru prěnjeho ...
Krótkopowěsće (02.12.24)
Woprašowanje wo Europeadźe
Budyšin. Šuler Budyskeho serbskeho gymnazija Milan Jurk w zwisku z fachowym dźěłom woprašowanje wo Europeadźe přewjeduje. Tak chce mjez druhim wuslědźić, hač ludźo wočakuja, zo koparjo serbskeje wubranki serbuja abo znajmjeńša serbsce rozumja. Formular z dźesać prašenjemi je w interneće přistupny pod: https://forms.gle/RC9737 A1wKy8a fgd7
Florian Oest nominowany
Zhorjelc. Šef CDU Zhorjelskeho wokrjesa Florian Oest jako direktny kandidat za wólby zwjazkoweho sejma 23. februara nastupi. Čłonojo CDU su nana dweju dźěsći minjeny pjatk nominowali. Oest chce so předewšěm wo spěšny železniski zwisk wot Berlina do Zhorjelca prócować. Tež hospodarskej a socialnej politice chce so wón wěnować.
Młodostneho ćežko zraniłoj
Zaswěća adwentnu pychu
Chrósćicy. Runja zašłym lětam chce Chróšćanske wjesne towarstwo Domizna hromadźe z Chróšćanami a hosćimi na předwječoru prěnjeho adwenta adwentnu pychu na nawsy zaswěćić. Tak to jutře, sobotu, wot 17 hodź. při dujerskej adwentnej hudźbje, horcym winje a přikusku zhromadnje činja. Zo njebychu přewjele wotpadkow nadźěłali, njech sej kóždy swójsku šalku za horce wino sobu přinjese. Na zwučene wašnje zahaji so jutře wječor tež kulturna zyma w Chróšćanskej putniskej oazy. Wot 19.45 hodź. porěči Beno Šołta ze Sernjan wo swojich dožiwjenjach w Nowoseelandskej. Dalše temy a terminy nadeńdu zajimcy na internetnej stronje pod adresu . Hižo wot 18 hodź. putniska mać Monika Gerdesowa dźěćom serbsku bajku baje.
Dźěćetko wužohnuja
Slepo. Po wsach Slepjanskeje wosady budźe lětsa znowa dźěćetko ze swojimaj přewodźerkomaj po puću. Wužohnować budźe je na Božej słužbje zajutřišim, njedźelu, w 9.30 hodź. superintendent na wuměnku Jan Malink. Prěnja stacija dźěćetka budźe samsny dźeń serbske wosadne popołdnjo na Slepjanskej farje.
Adwentne wiki w Njebjelčicach
