Krótkopowěsće (09.12.24)
Woheń w milinarni wudyrił
Hamor. W Hamorskej milinarni je so zawčerawšim rano paliło. Po informacijach energijoweho koncerna LEAG bě woheń krótko po połnocy wudyrił. Potrjechena bě připrawa, kotraž zawod z brunicu zastaruje. W zwisku z wohenjom dyrbjachu zamołwići dwaj blokaj milinarnje wotšaltować. Zastaranje z ćopłotu města Běłeje Wody je dale zaručene.
Serbja w SPD koaliciju chwalili
Drježdźany. Krajne dźěłowe koło „Serbja“ sakskeje SPD je z koaliciskim zrěčenjom CDU/SPD spokojom, wšako su jich žadanja kaž reformu Serbskeho zakonja wobkedźbowali. Kaž ko-rěčnik koła Měrćin Krawc připowědźi, chcedźa nětko na konkretnym zwoprawdźenju postajenja sobu skutkować, za ma serbowanje požadarja w přichodźe plusdypk na wupisanjach w zjawnej słužbje być.
Němčina jako hamtska rěč?
Přednošuje wo Sawdi-Arabskej
Chrósćicach. We wobłuku 13. kulturneje zymy putniskeje hospody Chrósćicy přednošuje tam jutře, sobotu, wot 19.45 hodź. Beno Bělk wo Sawdi-Arabskej. Hač do 2019 bě Sawdi-Arabska za wukrajnych wopytowarjow kruće zawrjeny kraj. Po koronje tam hakle w lońšej nazymje zaso prěni cuzy do kraja přijědźechu. Beno Bělk je tam lětsa w januaru měsac dołho po cyłym kraju jěł. Wosebje jeho zajimowaše, kak so žonam w kraju wjedźe. Dale je wopytał Medinu a Mekku – za muslimow swjatej měsće, za njewěriwych pak wostanjetej zawrjenej. Kak je so jemu poradźiło měsće tola wopytać a što je tam dožiwił, budźe dźěl rozprawy. Hižo w 16 hodź. pokazuja za najmjeńšich dźěćace kino.
Wječork na nowym městnje
Energijowe zastaranje přichoda
Kulow (AK/SN). W swojim projekće „ZellSys“ zestajeja wědomostnicy Drježdźanskeje Techniskeje uniwersity (TU) tuchwilu studiju, w kotrejž přepruwuja móžnosće a šansy změny energijoweho zastaranja w Kulowje na t. mj. celularne energijowe systemy. Fokusěruja so při tym na wobnowjomne energije we wobłukach ćopłota, milina a płun.
Do projekta słuša zestajenje energijoweho atlasa hladajo na potrjebu ćopłoty a miliny wobydlerjow. Hač do měrca 2025 maja wuslědki předležeć. „W lěće 2023 smy w tutym zwisku prěnje wobydlerske naprašowanje přewjedli“, pisaja wědomostnicy TU w zdźělence. Hač do 6. decembra naprašuja so druhi raz. „Centralna tema za nas je, zo nazhonjenja z regiona derje ze scenarijemi přichoda zwjazamy“, wědomostnicy wuzběhnu. Woni proša wobydlerjow wo čiłe wobdźělenje na tuchwilnym druhim naprašowanju.
Lěto wulce wužadace było
Spočatk 2025 zahaja horcu fazu přetwara Worklečanskeje šule
Worklecy (JK/SN). Wolóženi, ale nic cyle spokojom su Worklečanscy gmejnscy radźićeljo srjedu swoje lětuše poslednje posedźenje zmištrowali. Lětsa mějachu dosć wužadanjow, wosebje dla přetwara wobeju šulow a z tym zwisowacych organizatoriskich a financnych prašenjow. Z pomocu mnohich podpěraćelow a fachowcow pak wšo derje zmištrowachu, tež hdyž zwostanje jěry přisłód, kaž wjesnjanosta Clemens Poldrack (njestronjan) zwurazni. „Smy našim wobydlerjam wjele přicpěli a woni to nažel w swojich móšničkach pytnu. Tola nam ničo druhe njezwosta, jeli mamy nadawk so konsolidować.“ Poldrack pak tež mnoho dobrotow naspomni, kaž nowe hrajkanišća we Worklecach, Smječkecach, Nowej Wjesce a Wudworju. Na Worklečanskej kupje je rjane zetkanišćo nastało, na kotrež móža Worklečenjo hordźi być. We Wudworju je wjesna zhromadnosć natwariła rjany dožiwjenski areal z hrajkanišćom a móžnosću zetkawanja. Mjenowany areal „Wudworska kobłarnja“ je w hrubym dotwarjeny a so klětu nalěto z dodatnymi dźěłami wudospołni.
Serbskeho lěkarja rozžohnowali
Budyšin (CS/SN). 40 lět je dr. René Lešawa jako urologa dźěłał. Nětko je so 67lětny na zasłuženy wuměnk podał. Za jeho njewšědny žiwjenski wukon jemu kolegojo Hornjołužiskich klinikow (OLK) srjedu njezapomnite rozžohnowanje wobradźichu.
Jednaćel OLK Jörg Scharfenberg rjekny, zo so z dr. Renéjom Lešawu wosebita doba skónči. Po jeho słowach je urologa „medicinska legenda“. Wuznamjeniło je jeho humanistiske nastajenje k žiwjenju. Pacientam dawaše wón nadźiju a bě jim swětło w ćmowych hodźinach. „Budźemy was njeskónčnje parować“, praji Scharfenberg. Tež lěkarski direktor dr. Frank Weder fachowu ekspertisu swojeho kolegi chwaleše a wuzběhny, zo je dr. Lešawa mnohich dorostowych lěkarjow wukubłał. Krajny rada Udo Wićaz, kiž jako předsyda dohladowanskeje rady OLK porěča, je wuličił, zo je dr. Lešawa za čas swojeho 40lětneho powołanskeho skutkowanja něhdźe 40 000 pacientow stacionarnje zastarał.
Adwentnička w Carstenowej piwowej stwičce bě wčera poslednje ...
Krótkopowěsće (06.12.24)
Klětu zahaja nowy projekt
Dźěwin. Z projektom „SorbIT – serbska inowacija z tradiciju“ chcedźa gmejny Slepo, Trjebin a Dźěwin rěč, kulturu, tradiciju a turizm w Slepjanskim regionje polěpšić. Po Slepjanskej a Trjebinskej je wčera Dźěwinska gmejna kooperaciskemu zrěčenju přihłosowała. Spěchowane wot Załožby za serbski lud maja so štyri dźěłowe městna wutworić. Projekt traje wot měrca 2025 hač do kónca 2029.
Změnu strukturow bilancowali
Wuskidź. Komunalni politikarjo, kotřiž zhromadnje w zwjazku Łužiske koło agěruja, su wčera we Wuskidźi změnu strukturow bilancowali. Woni kritizuja so dlijace zwoprawdźenje projektow. Tohorunja njemóža špatneho financneho połoženja w komunach dla často ćežko swójske srědki zwjesć. Tež wobšěrna běrokratija potrjechenych haći.
Žiwe karpy wjace njepředawać?
Rubježnistwa dla před sudnistwom
Budyšin (SN). Zhromadneho ćežkeho rubježnistwa dla dyrbja so wot 16. decembra třo wobskorženi na Budyskim krajnym sudnistwje zamołwić. Kaž nowinske zdźělenje sudnistwa wozjewi, wumjetuje statne rěčnistwo třom mužam, zo su 28. februara 2024 muža wurubili. Tutón bě we Wojerowskej lutowarni runje 400 eurow z awtomata wotzběhnył. Jedyn z třoch wobskorženych je jeho wotzady kruće dźeržał, mjeztym zo je jemu dalši 170 eurow ze zaka wućahnył. Wokoło sebje machajo chcyše škodowany dale tomu zadźěwać, zo jemu rubježnicy tež hišće 280 eurow drohi naručny časnik njepokradnu. Wobskorženi pak do škodowaneho bijachu a časnik tola dosahnychu. Swojich zranjenjow dla dyrbješe muž wjacore dny do chorownje a bu lěkarsce zastarany.
Jednomu z wobskorženych wumjetuja nimo toho wjacore namócne delikty, kotrež je wón wot silwestra 2023 hač do 15. januara 2024 skućił. Mjez druhim je so w Kamjencu do bydlenja zadobył a sej wot wobydlerjow pjenjezy a drogi žadał. Při tym hrožeše jim z nožom. Dale je lětsa w januaru w Kamjencu pjenjezy wudrěwał a žonu z namocu zranił.
Předsydstwo z nowym čłonom
Worklecy (AM/SN). 25 čłonow Worklečanskeho gmejnskeho zwjazka CDU je tele dny nowe předsydstwo wuzwoliło. Předsydu Andréja Handrika wolachu jednohłósnje znowa, runje tak kaž pokładnicu Claudiu Bjaršowu. Nowy w nawjedowacym teamje je Bosćij Knop, kotrehož za zastupjerja wuzwolichu. Wón chce so w přichodźe wosebje z atraktiwnymi wobdźělenskimi formatami na młódšu generaciju wusměrić. Robert Šołta, Pětr Brězan, dr. Beno Wałda, Alojs Mikławšk a Leńka Bjaršowa předsydstwo wudospołnjeja.
Město njech je kreatiwny centrum
Budyšin (CS/SN). W měsće Budyšinje je wjace hač 200 aktiwnych towarstwow. Jich zastupjerjo běchu tele dny do Króny na dźakne zarjadowanje přeprošeli. Přetož, tak rjekny wyši měšćanosta Karsten Vogt, čestnohamtske dźěło samozrozumliwe njeje. Byrnjež towarstwa rozdźělne politiske nastajenja wotbłyšćowali, tak wšitkich tola jich angažement za město Budyšin zjednoća.
Wo třoch aspektach tohole prócowanja zastupjerjo towarstwow porěčachu. Tak Lars Bauer z wokrjesneho sportoweho zwjazka wuzběhny, zo so w měsće 7 000 ludźi dohromady 52 sportowym družinam wěnuje. Bauer přeje sej dosć modernych sportowych připrawow. Anke Knaak a Tobias Meyer-Uhma rozprawještaj wo wozelenjenju města. Cil sadźenja tysac štomikow a kerkow drje hišće docpěli njejsu. Wo to pak so klětu dale prócuja.
