Spočatk 2025 zahaja horcu fazu přetwara Worklečanskeje šule

Worklecy (JK/SN). Wolóženi, ale nic cyle spokojom su Worklečanscy gmejnscy radźićeljo srjedu swoje lětuše poslednje posedźenje zmištrowali. Lětsa mějachu dosć wužadanjow, wosebje dla přetwara wobeju šulow a z tym zwisowacych or­ganizatoriskich a financnych prašenjow. Z pomocu mnohich podpěraćelow a fachowcow pak wšo derje zmištrowachu, tež hdyž zwostanje jěry přisłód, kaž wjesnjanosta Clemens Poldrack (njestronjan) zwurazni. „Smy našim wobydlerjam wjele přicpěli a woni to nažel w swojich móšničkach pytnu. Tola nam ničo druhe njezwosta, jeli mamy nadawk so konso­lidować.“ Poldrack pak tež mnoho do­brotow naspomni, kaž nowe hrajkanišća we Worklecach, Smječkecach, Nowej Wjesce a Wudworju. Na Worklečanskej kupje je rjane zetkanišćo nastało, na kotrež móža Worklečenjo hordźi być. We Wudworju je wjesna zhromadnosć natwariła rjany ­dožiwjenski areal z hrajkanišćom a móžnosću zetkawanja. Mjenowany areal „Wudworska kobłarnja“ je w hrubym dotwarjeny a so klětu nalěto z dodat­nymi dźěłami wudospołni.