Adwentne spěwy dwurěčnje klinčeli
Adwentne wiki w klóštrje
Pančicy-Kukow. Adwentne wiki klóšterskeho wobchoda w klóštrje Marijinej hwězdźe w Pančicach-Kukowje wotměja so sobotu, 16. decembra, wot 10 do 18 hodź. Nimo horceho wina a praženych kołbaskow změja w poskitku Ochranowske hwězdy, wot sotrow zhotowjene likery, wolije a sele kaž tež jabłukowy punš z klóštra w Oseku a wjele dalšeho. Wot 8 do 13 hodź. předawaja čerstwe hodowne štomy.
Adwentna hudźba w cyrkwi
Chróstawa. Třeću adwentnu njedźelu wot 17 hodź. zaklinči tradicionelna adwentna hudźba w cyrkwi w Chróstawje (Crostau) pola Korzymja. Pod nawodom kantora Hansa Christiana Martina zaspěwa Chróstawski chór. Pozawnowy chór nawjeduje Volkhart Häntsch. Nimo toho zaklinča Silbermannowe pišćele. Na programje steja mjez druhim kantata Telemann a adwentne kěrluše za spěwanje. Zastup je darmotny.
Adwentne woknješko
Policija (13.12.23)
Zakazane praskotaki zwěsćili
Mužakow. W Hornjej Łužicy so něchtóžkuli hižo nětko na silwesterske praskotanje přihotuje. Při hraničnym přechodźe do Pólskeje zwěsćichu policisća minjene dny nimale tysac praskotakow, za kotrychž jich wobsedźerjo žanu dowolnosć abo hišće prawu starobu njemějachu. Za někotre praskotaki dyrbiš znajmjeńša 21 lět być, za pyrotechniku kategorije 3 trjebaš wosebitu dowolnosć.
Wo cyrkwinskej hudźbje porěčał
Budyšin (TN/SN). Maćicar a předsyda sekcije hudźba Maćicy Serbskeje Měrko Šołta je tele dny we wobłuku rjada Archiwneho zwjazka Budyšin přednošował. Kaž hižo minjene lěta zakónči wón tež lětuši rjad přednoškow z hudźbnej temu: Chór gymnazija a ewangelska cyrkwinska hudźba při ewangelskej farskej cyrkwi swj. Pětra mjez 1800 a 1860.
Žro přednoška bě wuwiće chóra Noweje radneje šule/měšćanskeho gymnazija jako hłowne hudźbne ćěleso ewangelskeje cyrkwinskeje hudźby w Budyšinje a jeho spad w druhej třećinje 19. lětstotka. Skónčnje zwosta za cyrkwinsku słužbu jeničce skupina 12 spěwarjow, tak mjenowanych „inquilinow“ – spěchowanych hłownje přez załožbu Gregoriusa Mättiga, Budyskeho lěkarja a dobroćela serbskeho pochada. Tuta skupinka gymnaziastow wobsteješe jako spěwne ćěleso ewangelskeje wosady swj. Pětra tež přez čas inflacije hač do spočatka Druheje swětoweje wójny, a to na zakładźe wosebiteho zrěčenja. Přednošk skulojći so z wotpowědnymi hudźbnymi přikładami, kotrež poskići dujerski kwartet pod nawodom Evelyn Fiebiger.
Při wotpočnišću sej pomhać
Bjez swójskeho gratu móžeš we Łupoji koleso porjedźeć
Łupoj (UM/SN). Tutu situaciju drje kóždy znaje, kiž je hdys a hdys z kolesom po puću. Najprjedy so dźiwaš, čehodla groćany konik někak spodźiwnje jědźe, doniž njezwěsćiš, zo w hadźicy hižo žadyn powětr njeje. Štóž je sewjernje Radworja po puću, móže we Łupoj při wotpočnišću za kolesowarjow panu bjez swójskeho gratu sam porjedźeć a sej na te wašnje njekomplikowanje pomhać.
Wolfgang Kühn najlěpši škotowar
Wot lěta 1995 přewjeduja serbscy seniorojo swoje měsačne kartyplacanje. Wčera wotmě so posledni lětuši turněr w Budyšinje, hdźež najlěpšich hrajerjow 2023 mytowachu.
Budyšin (SN/MWj). W rezidency seniorow na Budyskej Löhrowej su škotowarka a 26 škotowarjow wčera sezonu lětušich škotowych turněrow serbskich seniorow zakónčili. Najwuspěšniši hrajer dwanateho hrajneho dnja tohole lěta bě Měrko Šmit z 2 866 dypkami před Jurjom Žurom (2 822) a Wernerom Richterom (2 770). Kaž hłowny organizator Měrćin Nowak z Lubija zdźěli, počesćichu jich z pjenježnymi a wěcnymi mytami.
Błótowska železnica powabliwa
Šansy zaměrnišo wužiwać
Łužiske wokrjesy a města w změnje strukturow z jednym hłosom
Budyšin (SN/at). „Wokrjesy a města we Łužicy chcedźa w přichodźe přez krajnu mjezu ,zhromadnje postupować‘ wšelake wobłuki jednanja nastupajo.“ To rjekny našemu wječornikej dr. Romy Reinisch, přirjadnica krajneho rady, kotraž bě Budyski wokrjes na zetkanju spočatk měsaca w Běłej Wodźe zastupowała. Na to přeprosył bě Zhorjelski krajny rada dr. Stephan Meyer (CDU), za blidom sedźachu dale kolegaj w zastojnstwje z braniborskeju wokrjesow Sprjewja-Nysa a Hornje Błóta-Łužica, wyši měšćanosta Choćebuza kaž tež wyši měšćanosća Budyšina, Zhorjelca, Kamjenca, Lubija, Žitawy a pólskeho Lubanja.
Krótkopowěsće (13.12.23)
Kubłanska infrastruktura wažna
Berlin. Na namjet frakcije CDU/CSU je hospodarski wuběrk zwjazkoweho sejma dźensa w zjawnym słyšenju změnu strukturow we Łužicy rozjimał. Jako wěcywustojna přeprošena braniborska rěčnica Łužiskeho kruha, Grodkowska měšćanostka Christine Herntier, wupraji so wuraznje za to, ze srědkami změny strukturow tež kubłansku infrastrukturu spěchować móc.
Wo wědomosći w Chrósćicach
Drježdźany. Z nowej kampanju SPIN2030 spřistupni ministerstwo za wědomosć, kulturu a turizm wot klětušeho januara ludnosći Saksku jako kraj wědomosće. Tak prezentuja we wšelakich regionach mjez druhim wuznam kumštneje inteligency za wšědny dźeń, přichodneje chemijoweje industrije abo slědźenjow w centrumje astrofyziki. Jedna z prěnich stacijow budu Chrósćicy.
Symbol njeswobody přesadźili
