Wěriwi sej wopomnišćo „darili“
Wulka Dubrawa ma nětko zaso swědk wěry na zjawnym městnje
Wulka Dubrawa (UM/SN). W kónčinach sewjernje Budyšina namakaš tójšto swědkow křesćanskeje wěry. Jenož we Wulkej Dubrawje sy dotal podarmo za tajkimi pytał. „Hač před krótkim njebě – nimo na kěrchowje – ani jeničkeho křiža na zjawnych městnach w našej wjesce“, wobkrući Gernot Walter. Čłon předsydstwa Chwačanskeje wosady je jedyn z małeje skupinki ludźi, kotřiž so na křižnu kapałku we Wulkej Dubrawje dopominaja.
Krótkopowěsće (13.06.24)
Wićaz nikoho njewumjezuje
Budyšin. Budyski krajny rada Udo Wićaz (CDU) chce ze wšěmi „legitimnje wolenymi wokrjesnymi radźićelemi“ kooperować, tež z tymi, kotřiž su z mandatom AfD abo „Swobodnych Saksow“ woleni. To zdźěli Wićaz w interviewje ze Sakskimi Nowinami. Wuslědki wólbow je wočakował, ludźo so tomu wobaraja, zo spytaja strony a medije jim nanuzować, kak dyrbiš myslić a z kim směš rěčeć.
Prezident wopyta Łužicu
Choćebuz/ Lubnjow. Zwjazkowy prezident Frank-Walter Steinmeier (SPD) wopyta dźensa, štwórtk, Łužicu. Na zetkanju na BTU w Choćebuzu chce so mjezynarodna delegacija, kotraž Steinmeiera přewodźa, wo změnje strukturow we Łužicy informować. Dale stej jězba z čołmikom a přijeće ministerskeho prezidenta Dietmara Woidke planowanej.
Projekty w regionje spěchuja
Rakecy. 15 projektow w regionje dóstanje lětsa spěchowanje přez tak mjenowany LEADER-rum Hornjołužiska hola a haty. Na swojim posedźenju 10. junija je wotpowědny gremij tole rozsudźił, pisa OHTL na swojej internetnej stronje. Dohromady 14 500 eurow woni za projekty nětko nałožuja.
To su woleni gmejnscy a měšćanscy radźićeljo
Wólbne wuslědki komunow, kotrychž daty smy hač do dźensnišeho dopołdnja dóstali:
Chrósćicy
Swobodni wolerjo gmejny Chrósćicy: Jan Wjesela (178 hłosow), Katharina Jurkowa (146), Benedikt Wjenk (133), Christian Zahrodnik (107), Uwe Macka (74)
CDU: Roman Nuk (156), Beno Hojer (78), Tadej Cyž (76), Mario Beuttenmüller (74)
Chrósćicy doprědka!: David Robel (296)
Zhromadnje wudźeržliwje pohibować: Jurij Bulank (70)
Njebjelčicy
CDU: Handrij Krawčik (139), Silvio Reinecke (134), Tomaš Klar (117), Tomaš Kral (106)
Swobodne wolerske zjednoćenstwo: Oliver Loch (80)
Přećeljo sporta: Frank Domš (115)
Naše wsy: Tomaš Šwejda (145), Christoph Bětnar (116), Claudia Liznarjowa (107), Tobias Domš (105), Daniel Schubert (83), Christina Wušansscyna (80)
Pančicy-Kukow
CDU: Robert Paška (323), Peter Rietscher (283), Bosćij Marian Schurk (251), Philipp Knopp (243), Jan Ješka (221), Michał-Tomaš Krawc (129), Matthias Kubaš (120)
Serbske wolerske zjednoćenstwo: Joachim Kokla (227), Anton Petaš (177), Clemens Škoda (163), Grit Hawšowa (146), Stefan Cyž (142)
Ralbicy-Róžant
Swobodne wolerske zjednoćenstwo „Delany“: Rene Wjacławk (364), Detlef Šuster (251), Jan Rjehor (247), Matthias Möller (190), Józef Woko (184), Křesćan Gruhn (157), Tomaš Glawš (125)
Herpes konjow
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (34)
Dopominam so hišće na jutry, hdy bě so tójšto wobsedźerjow koni přećiwo transportej swojich lubuškow na křižerske procesiony rozsudźiło. Wina bě wudyrjenje herpesoweho wirusa mjez konjemi.
Herpes koni je po wšěm swěće rozšěrjeny wirus, wuwabjacy wšelke wobrazy schorjenja. Pola čłowjeka znaty je herpes simplex, mjez druhim pokazuje so jeho aktiwita přez wuwiće čerwjeneho blečka při hubomaj abo wokoło nosa, zwjetša hdyž je čłowjek nazymnjeny.
W swójbje herpeswirow koni su najznaćiše equine herpeswiry 1-5 (EHV 1-5). Kóždy wirus, je-li so jónu do ćěła konja zadobył, zasydla so we wšelakich włokninach (Gewebe) zwěrjeća.
Zbožo w njezbožu
Zhorjelc. Póndźelu připołdnju je w Zhorjelcu k njezbožu mjez Mercedesom a kolesowarku dóšło. 47lětny šofer awta chcyše při lětanišću naprawo na Girbigsdorfersku dróhu wotbočić a zrazy do kolesowarki, kotraž měješe předjězbu. Nazbožo so žona njezrani. Wěcny škoda wučinja 200 eurow. Koleso pak hižo jězbykmane njeje.
Po njezbožu so wotsaliła
Wojerecy. 62lětna wodźerka Opela je póndźelu we Wojerecach při wuparkowanju na dróze Liselotty Herrmann dróze do płotu zrazyła a jón masiwnje skóncowała. Wona pak městnosć njezboža po tym wopušći. Někotre hodźiny pozdźišo so pola policije přizjewi, zo by njezbožo zdźěliła. Wěcna škoda wučinja dohromady něhdźe 5 000 eurow. Wojerowski policajski rewěr pak pad njedowoleneho wotsalenja wot městnosće njezboža dla přepytuje.
Žiwjenju šansu dać
Kamjenc. Hornjołužiske telefoniske dušepastyrstwo přeprošuje na přednošk na temu „Suicid wotwobarać – žiwjenju šansu dać“. Uta Lewitzka, fachowa lěkarka za psychiatriju a psychoterapiju přednošuje, mjez druhim wo tym, kak móžemy suicidam zadźěwać. Zarjadowanje wotměje so štwórtk, 13. junija, wot 18.30 do 21 hodź. w Kamjenskej cyrkwi swj. Justusa, při kěrchowje na Kinsporkskej dróze 19. Přeprošena je tež mać, kotraž rozprawja wo swojich nazhonjenjach w zwisku ze suicidom swojeho syna.
Bórze je Knižne lěćo
Wojerecy. Bórze su prózdniny a nimaš hižo čerstwu literaturu we domje? Biblioteka ći w tutej situaciji pomha! „Do čitanja so zanurić“ je hesło lětušeho Knižneho lěća, na kotrymž so tež knihownja Brigitty Reimann zaso wobdźěli. Start akcije je 14. junija! Wjace hač 150 nowych dźěćacych a młodźinskich knihow maja w poskitku. Wupožčowansku dobu podlěšimy a cyły prózdninski čas. 9. awgusta woswjećimy kónc Knižneho lěća z wulkej kónčnej party, na kotruž was wutrobnje přeprošujemy. Wot 14 do 18 hodź. wočakuja was pola nas paslenske poskitki, lód, knižne čaporowe wiki a hišće wo wjele wjace!
Strowotniski centrum schwalili
W Hamorje nadźijeja so na wulke spěchowanje z fondsa za změnu strukturow
Hamor (AK/SN). Nimale jednohłósnje su so gmejnscy radźićeljo na póndźelnišim posedźenju za to wuprajili, zo ma hač do kónca lěta 2026 w Hamorje moderny strowotniski centrum nastać. Nimo rumnosćow za fachowych a domjacych lěkarjow kaž tež apoteku su tajke za mediciniske kursy a fyzioterapiju planowane.
Pólny dźeń kołowokoło Radworja
Wot lěta 2020 hižo zarjaduje Sakski krajny zarjad za wobswět, ratarstwo a geologiju (LfULG) pólne dny. Tež priwatne předewzaća tajke dny poskićuja, zo bychu ratarjam najnowše wuslědki w plahowanju rostlinskich družin prezentowali.
Radwor (SN/MiP). Jedne tajke předewzaće je firma Stroetmann ze sydłom w Münsteru, kotraž ma tež mjez Radworjom a Miłočicami swoje plahowanske pola. Na tute su zamołwići předewzaća, kotrež eksistuje hižo cyłych 230 lět, minjeny pjatk łužiskich ratarjow přeprosyli, zo bychu jim konkretne wuslědki plahowanja družin na městnje předstajili.
Minjeny pjatk stej Corina Rönschowa a Bernada Bulankowa na Budyskich ...
Krótkopowěsće (12.06.24)
Z wěstotu so zaběrali
Choćebuz. W Choćebuzu wotměwaše so dźensa 20. Łužiska konferenca dźěłarniskeho zwjazka DGB Berlin-Braniborska a Sakska. Pod hesłom „Wjace wěstoty w změnje“ diskutowachu něhdźe 150 wobdźělnikow z dźěłarnistwow, zawodow, politiki a wědomosće wo změnje strukturow. Přitomnaj běštaj předsydka DGB Yasmin Fahimi a Choćebuski wyši měšćanosta Tobias Schick (SPD).
Pjenjezy za projekt dóstali
Wojerecy. Němski dźěćacy pomocny skutk spěchuje projekt „Informacije – inscenacija swěta“ ZCOM Konrad Zusoweho muzeja we Wojerecach z 5 000 eurami. Šulerjo 7. lětnika wuwichu w běhu lěta wuměłske instalacije, kotrež so ze zaznawanjom swěta w zwisku z dale a wjac informacijemi zaběraja. Mjez druhim so woni z temami Fake News abo teorijemi zapřisahańcow rozestajachu.
Najwjetši awtowy salon
