W Budyskim centeru na Žitnych wikach wustajeja tuchwilu wosebite ...
Njejsu přezjedni
Wojerecy (SN/mb). Serbska přirada města nochce so z njedawnym rozsudom měšćanskeho zarjada wotnamakać, planowanu šćežku na slědach serbskich stawiznow Wojerec („Via Sorabica Hoywoj“) pjenježnje njepodpěrać. To je předsydka přirady Evelin Graf našemu wječornikej na naprašowanje po wčerawšim posedźenju gremija zdźěliła. „Město drje měni, zo to njeje měšćanski projekt. To hinak widźimy“, wobkrući mnohostronsce angažowana předewzaćelka. Tohodla chcedźa, tak su jednohłósnje rozsudźili, wyšeho měšćanostu Torstena Rubana-Zeha (SPD) namołwić, projekt měšćanskej radźe předstajić. Potom njech zhromadnje puć za zrealizowanje pytaja.
Dźeń wšelakorosće družin bě čłonam Budyskeho towarstwa ...
Krótkopowěsće (23.05.24)
Kalender znowa wušoł
Budyšin. W Ludowym nakładnistwje Domowina je wušoł nowy nakład kalendra „Łužica – Łužyca – Lausitz“ za lěto 2025. Znowa wabja fotografije Maćija Bulanka za najrjeńše blečki Łužicy kaž tež za tradicije a wašnja Serbow. Nimo toho skići kalender městno za noticy a zapiski. Produkt je po cyłym hornjo- a delnjoserbsce kaž tež němsce popisany a je wot nětka na předań.
Personal stawkuje
Wojerecy. W klinikumje Łužiskeje jězoriny stawkuja dźensa přistajeni, kotřiž su w dźěłarnistwje Verdi organizowani. Přičina su trajace tarifowe jednanja. Poslednje wuradźowanje 29. apryla wuslědka njeměješe. Verdi žada sebi wyše mzdy, kaž tež płaćenje inflaciskeho pjenjeza a wjace swobodnych dnjow.
Woidke a Kretschmer pola LEAG
Wopalenja wšelkich stopjenjow
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (45).
Po znowa pryzlojtej haperleji nas wot spočatka meje nimale kóžde ranje krasne słónčko wita. Žiwe slěbro stupa a stupa a něchtóžkuli z nas je so mjeztym hižo w mjezwoču abo druhdźe spalił. Wot słónca zawinowane wopalenje je problem, kotryž so změny klimy dla dźeń a husćišo pola nas jewi. Na zbožo jedna so tu jenož wo wopalenje prěnjeho stopjenja. To rěka, zo je jenož woršta kože, kotruž mjenujemy epidermis, potrjechena. Symptomy su lokalne bolosće, čerwjenjenje a zapuchłosć. Tajke wopalenja so samostatnje zaso zhubja, a błuzny njezawostanu. Přiwšěm dyrbimy so škitać, wšako zwyša prawidłowne wopalenja riziko, na rak kože schorjeć. Wopalenja stopjenja dwaj A njepotrjechja jeničce epidermis, ale tež zwjeršne podźěle přichodneje woršty kože, tak mjenowanu dermis. Bolosće su jara sylne, tworja so wopalenske pucherje, po wuhojenju pak znowa błuzny njezawostanu.
Mały, ale wažny puć přepodaty
Plany za wutwar dróhi w Delnim Wujězdźe po dźesać lětach zwoprawdźene
Delni Wujězd (CK/SN). Po wjacorych měsacach twarskeho časa móža wobydlerjo na Šulskej dróze w Delnim Wujězdźe wodychnyć. Krótko do swjatkow su puć w Hamorskim wjesnym dźělu zjawnosći přepodali. Na dołhosći 516 metrow su jězdnju ponowili a při tej składnosći kanal za dešćikowu wodu kładli. Dohromady inwestowachu 610 000 eurow. Prěnje plany za to mějachu po słowach wjesnjanosty Hendryka Balka (Hamorske wolerske zjednoćenstwo) hižo lěta 2014. Kaž wjesny předstejićer Frank Knobloch doda, je tema wjele starša. „Šulska dróha bě hižo 2007 wobstatk zrěčenja wo zagmejnowanju Delnjeho Wujězda do Hamorskeje gmejny. Tehdy bě to jedyn z projektow, kotrež mějachu w zwisku ze zagmejnowanjom zwoprawdźić.“
Policija (22.05.24)
Dwójce bjez dowolnosće
Wojerecy. 32lětnu wodźerku VWja su póndźelu wječor we Wojerecach kontrolowali. Při tym so wukopa, zo wona scyła žanu jězbnu dowolnosć njeměješe. Nimo toho steješe žona pod wliwom drogow. Zo wona dale jěć njesmědźeše, pak ju smorže staraše. Tři hodźiny pozdźišo ju policisća znowa za wodźidłom jeje awta lepichu.
Štyri mejske kralowske pory
Do hwězdarnje
Budyšin. „Wotkryj sej swětnišćo“ – tak rěka dalše wudaće dźěćaceje serije „Što je što junior“ za słuchopisak BOOKii. Ludowe nakładnistwo Domowina a Radworska staršiska iniciatiwa přeprosytej pěstowarske a šulske dźěći kaž tež hobbyjowych hwězdarjow na knižnu premjeru 23. meje w 16.30 hodź. do Budyskeje hwězdarnje. Hwězdar rozkładźe z pomocu teleskopa, kak wosebite hwězdy na njebju nadeńdźeš. Zdobom póńdźe wo styki k astrofyzice.
Na koncert z Lipu
Pančicy-Kukow. Chór Lipa hotuje so pod nawodom Jadwigi Kaulfürstoweje njedźelu, 26. meje, w 15.30 hodź. na nalětni koncert w klóšterskej zahrodźe w Pančicach-Kukowje. Lětuši hosćo su Njebjelčanski cyrkwinski chór kaž tež Lipki, dźěćacy dorostowy chór Lipy. Sobuzarjadowar koncerta je Křesćansko-socialny kubłanski skutk Miłoćicy (CSB).
Wulka šansa za hród so skići
Njeswačidło (JK/SN). W swojich informacijach na minjenym posedźenju Njeswačanskeje gmejnskeje rady naspomni wjesnjanosta Gerd Schuster (CDU) tež wuslědk njedawneho zetkanja ze zastupjerjemi partnerskeje gmejny Żary w susodnej Pólskej. Wobě gmejnje stej čłon Europskeho zwjazka łužiskich parkow.
W běhu zetkanje wujasni so, zo móhła gmejna Njeswačidło z pomocu partnerskeje gmejny dóstać spěchowanje za wobšěrne wobnowjenje hrodu w Njeswačidle. Kaž SN hižo w měrcu rozprawjachu, je zapodaće a přizwolenje próstwow wo spěchowanje w Pólskej z mjenje běrokratiju zwjazane hač w Němskej a tak poskićuje gmejna Żary gmejnje Njeswačidło njesebičnu pomoc, kotruž tuta rady přiwza. Kaž Schuster praji, je wobnowjenje hrodu z 2,3 milionami eurow kalkulowane. Tuta suma by so z 80 procentami spěchowała. Tak by zwostał swójski podźěl gmejny we wobjimje 460 000 eurow, kotryž pak by so z mnohimi dalšimi spěchowanskimi kombinacijemi zniži na doskónčne 80 400 eurow. Zahajić móhli wobnowjenske dźěła po lěće 2026, dokelž by potom wšo tak daloko zrjadowane było, pjenjezy schwalene a nadawki wupisane.
