„Heja ze zornowca“ rěka tema, z kotrejž so Corinna Seiler w ...
Krótkopowěsće (07.06.24)
Pytaja stipendiata
Choćebuz. Město Choćebuz chce w přichodnym semestrje studentow wučerstwa serbšćiny podpěrać a je za to stipendij iniciěrowało. Stipendij we wobjimje 500 eurow chcedźa zajimcej 60 měsacow dołho zapłaćić. Po wuspěšnym zakónčenju studija pak měł so stipendiat zawjazać a pjeć lět šulsku słužbu na dobro serbskeje rěče w Choćebuzu wukonjeć.
Nastaće zakonja tema zetkanja
Budyšin. Wčera, štwórtk, zetkachu so na žurli Serbskeho muzeja šulerki a šulerjo 9. lětnika Serbskeho gymnazija Budyšin ze časowymi swědkami nastaća serbskeho zakonja před 25 lětami. Nimo tehdyšich serbskich zapósłancow w sakskim krajnym sejmje bě tež bywši jednaćel Domowiny Bjarnat Cyž přitomny. Na zarjadowanje běštej Domowina a muzej přeprosyłoj.
Wjele zajimcow za ferialny kurs
Dźěło w zahrodce a rostlinarni w juniju (8)
Mokry měsac meja leži za nami a tak startujemy hladajo na zastaranje z wodu z dobrym zakładom do horceho časa, kotrež nas wot junija prawdźepodobnje wočakuje. Přemało słónčka, přeniskeje temperatury abo přemało wody dla njemóžemy poslednje tydźenje poprawom skiwlić, ale njewitani hosćo – armady mjechkušow (Weichtiere) – włóžno-ćopłeje klimy dla, najskerje kóždeho zahrodkarja abo zahrodkarku tróšku mjerzaja. Woprawdźe efektiwny škit přećiwo šlinkam za młode rostlinki stej tak mjenowany šlinkacy kornar (Schneckenkragen) z metala abo jednora drjewjana deska, kotraž połoži so mjez hrjadki. Na jeje spódnju stronu přilěpja so šlinki tak zo móžeš je, znajmjeńša zdźěla, ze zahrodki wotstronić. Štóž ma kokoše abo běhate kački, ma přidatneho přirodneho pomocnika, zo je wotbudźeš.
Připosłuchać a sobu spěwać
Pančicy-Kukow. Chór Šnajdrec wnučkow přeprošuje 7. junija w 20.15 hodź. na koncert a spěwny wječor. Zarjadowanje wotměwa so w Pančicach-Kukowje na Kaulfürstec dworje na Róžeńčanskej dróze.
„W swětle 1000 swěčkow“
Pančicy-Kukow. Wot wčerawšeho móžeće zastupne lisćiki za „nóc na zahrodźe“ klóštra Marijina hwězda pod hesłom „W swětle 1 000 swěčkow“ w předpředani kupić. Zarjadowanje Křesćansko-socialneho kubłanskeho skutka (CSB) wotměwa so 20. julija wot 19.00 hodź. Skazać móžeće tikety online pod www.csb-miltitz.de a wězo tež na městnje w klóšterskim wobchodźe. Zastup za dorosćenych płaći 10 eurow, za dźěći hač do staroby 16 lět 2 euraj.
Gmejnska rada přeprošuje
Kolesowarku přewidźał
Žitawa. Ze swojim nakładnym awtom je póndźelu wječor 73lětny muž do kolesowarki w Žitawje zrazył. 13lětna holca běše na kolesowanskim pućiku na Měrowej do směra naměsta Ottoka po puću jako awto typa Unimog z wujězda ležownosće na dróhu wujědźe. Winik zawostaji swoje personalije, po tym pak městno njezboža spěšnje wopušći. Swědk zawoła policiju, dokelž spózna, zo holca zranjena běše. Chorobne awto dowjeze škodowanu do chorownje k přepytowanju. Zastojnicy policije su jězdźerja mjeztym doma wopytali a jemu skóržbu dla njedowoleneho wotsalenja wot městna njezboža přepodali.
Trójny njeskutk
Budyšin. Hnydom trójce je 44lětny muž póndźelu popołdnju w Budyšinje skućićelstwo „zworał“. Najebać zakaza domu zastupi do předawanišća na Hošic hasy. Tam namóra špundowanje z permanentnym pisakom. Naposledk wołaše parole, kotrež po wustawje zakazane su. Sobudźěłaćerjo filiale jeho namołwjachu, twarjenje wopušćić. Nětko dyrbi so skućićel trójneho přeńdźenja dla před sudnistwom zamołwić.
Pod wliwom drogow znjezbožił
Čerstwu trawu za Hrańčan dejki
Nětko zaso Serb w předsydstwje
Njebjelčicy (SN/MiR). Njebjelčanske towarstwo Kamjenjak ma nowe předsydstwo. Po wjacorych lětach chce w nim tež zaso Serb skutkować. Lukaš Deleńk běše před štyrjomi lětami zamołwitosć jako financnik swojej naslědnicy přepodał. Wotnětka je wón z najwyšej ličbu hłosow 15 přitomnych čłonow towarstwa zastupowacy předsyda, byrnjež so w kandidaturje jako přisydnik předstajił. Jako předsyda skutkuje w přichodnymaj lětomaj Hubert Lange.
Zahajene projekty dale wjesć
Łaz (AK/SN). Łazowska gmejna chce loni zahajene twarske naprawy zaměrnje dale wjesć. Gmejnska rada je z dwěmaj napřećiwnymaj hłosomaj a jednym hłosa wzdaćom njetrjebane zbytki etata za społnomócnjenje (Haushaltsermächtigungen) ze zašłych lět do etata 2024 přewzała. Za inwesticije su dochody we wysokosći 1,6 milionow eurow a za wudawki 2,5 milionow eurow zwěsćili. Za běžne wěcne nadawki a posłužby so z społnomócnjenjow 551 000 eurow přenjesu. „To potrjechi započane naprawy“, rjekny komornica Mandy Liepert. Wona mjenowaše polěpšenje wody we bydlenjach Šćeńcy 32 000 euro, hladanje hydrantow 8 000 eurow, kóšty za plan wužiwanja płoninow gmejny kaž tež za plan wobtwarjenja 82 000 eurow, za prawniske poradźowanje koncesiskeho dorěčenja miliny dla 25 000 eurow, hladanje centralneho wotstronjenja mazaneje wody we Łazu a Běłym Chołmcu 7 000 eurow, hladanje gmejnskich dróhow, pućow a naměstow, 252 000 eurow kaž tež za wobstajne hladanje wodźiznow druheho rjada 144 000 eurow.
Dobra akcija konjam na wužitk
Chwačan jěchanske towarstwo ma nowu připrawu za napojenje koni
Chwaćicy (UM/SN). Woltižěrowanske a jěchanske towarstwo Chwaćicy je sej dawne přeće spjelniło: awtomatiske napojišćo za swoje konje. Dotalny wodowy system běše jara stary a je w zymje prawidłownje zamjerznył. Nětko dóstawaja konje swoju wodu po potrjebje, awtomatisce, ručež z klamu na knefl stłóča.
