Fortuna kartki rozdźěliła
Wot ćaha do busa nětko jednorišo
Slepo (AK/SN). Štóž chce w Slepom wot ćaha do busa abo nawopak přestupić, móže to nětko wěsćišo a njekomplikowanišo činić. Minjeny štwórtk přepodachu tam małe nowe busowe dwórnišćo při přichodnym lěkarskim domje. Krajny zarjad za dróhotwar a wobchad, ZVON a Slepjanska gmejna inwestowachu dohromady 620 000 eurow.
Nimo městnow za busy nasta 16 parkowanskich městnow za awta, dwě dalšej za awta zbrašenych, stejaki za kolesa kaž tež ławki. Z busoweho dwórnišća wotjědu tři busowe čary. Při nabiwanskej staciji móžetej dwě elektroawće naraz milinu tankować. „Z busowym dwórnišćom mamy nětko porjadne a přewidne wobchadne wjedźenje“, praji Slepjanski wjesnjanosta Jörg Funda (CDU). Bjez zadźěwkow móža tež ći do busa zalězć, kotřiž maja dźěćacy wozyčk abo kotřiž su na chorobny stoł pokazani. Šoferojo busow móža swoje jězdźidło wěsće parkować a nuzniki w přichodnym lěkarskim domje wužiwać. „Poradźiło so je, městno žiwe a přewidne wuhotować“, rjekny jednaćel ZVON Christoph Mehnert.
Wulki wokomik bě pjatk popołdnju we Łusču w Bóšičanskej ...
Krótkopowěsće (03.06.24)
Dalši zajimc so přizjewił
Wětošow. Za wobhospodarjenje Radušanskeho słowjanskeho hrodźišća staj nětko dwaj zajimcaj. Nimo Załožbje Slavonic Europe je to Choćebuske předewzaće JES tzwr, kotraž je znate pod mjenom „Die Bademeusel“, wobkrući nětko měšćanski zarjad we Wětošowje. Předewzaće z Łužicy chce so předewšěm poskitkam za dźěći wěnować.
Błysk na swjedźenju zadyrił
Liberec. 18 ludźi, mjez nimi dźewjeć dźěći, přebywaše na dźěćacym swjedźenju w parku, jako błysk zadyri. Wjetšina z nich běše nachwilnje bjez wědomja, nichtó pak njeměješe wopalenja – to zdźěli rěčnik chorownje w Liberecu. Jedne dźěćo wuleća helikopter do uniwersitneje kliniki w Praze.
Čěsku Šwicu spřistupnić
Wšitko kołowokoło Krabata
Wojerecy. Z wulkim swjedźenjom we Wojerowskim Łužiskim centeru zahaja tam jutře jubilejne tydźenje k 400. narodninam Janka Šajatovića alias Krabata. Po zahajenju w 11 hodź. Gabriela Linakowa jako připołdnica serbske baje powěda. W samsnym času započnje so dožiwjenska tura z Krabatom a jeho pisarjom. W 14 hodź. powjedu po historiskej rjadowniskej rumnosći, kotruž maja tam natwarjenu. Hač do 25. junija čakaja na wopytowarjow najwšelakoriše poskitki.
Pytaja hodowny štom
Budyšin. Hač do adwenta drje je hišće dołha noha, přiwšěm pyta Budyski krajnoradny zarjad hižo nětko hodowny štom, kiž ma w adwenće před krajnoradnym zarjadom na Dwórnišćowej stać a so swěćić. Štóž maksimalnje dźesać metrow wulki jehlinowc we wobkruhu 15 kilometrow wokoło Budyšina ma a chce jón darmotnje wotbyć, njech přizjewi so e-mailnje hač do kónca julija pod adresu .
Meju mjetali a zhromadnje swjećili
Policija (31.05.24)
Rentnarku do rozmołwy zapletli
Budyšin. Jako chcyše wuměnkarka srjedu w pjenježnym instituće na Weinertowej w Budyšinje z awtomata pjenjezy wotzběhnyć, zaplećechu ju njeznaći do rozmołwy. Při tym wuskušichu mužej a žona tajne čisło 86lětneje a samo jeje kartku z awtomata wzachu. Na to wotzběhny wobšudniska trójka wjace hač tysac eurow z konta staruški. Policija před tymle trikom warnuje a prosy, staršich swójbnych na to skedźbnić.
Wot septembra hród ponowja
Tež Rakečanska gmejna swój podźěl k poradźenju projekta přinošuje
Rakecy (UM/SN). W Rakecach saněrowanje tamnišeho hrodu z połnej paru přihotuja. Kaž nowinski rěčnik statneho zawoda Sakske imobilije a twarski management (SIB) Alwin-Rainer Zipfl zdźěli, planuja zahajenje twarskich dźěłow na twarjenjach krajneje rybarskeje šule w septembru 2024. „Při tym ma so na hrodźe, internaće, na tak mjenowanej picowanskej bróžni a oranžeriji w dalokej měrje runočasnje dźěłać. Hač dosrjedź lěta 2026 ma wšitko hotowe być“, praji Zipfl. Hižo w lětomaj 2022/2023 běchu dodźeržanu murju wokoło parka saněrowali. Do zahajenja twarskich dźěłow přewjedu tohorunja točenja za přichodne zastaranje z ćopłotu.
Naslědnistwo firmy zaručene
W 1990tych lětach je so w Hornjej Łužicy wjele rjemjeslnikow zesamostatniło. Mjeztym zo su někotři ze swojim předewzaćom zwrěšćili, su druzy wuspěšnje dźěłali a zhladuja mjeztym na tři lětdźesatki skutkowanja. Tež w Konjecach serbski rjemjeslnik jutře tónle jubilej woswjeći.
Ze Šćěpanom Čornakom sej termin dorěčeć scyła tak jednore njeje. 55lětny ma ruce połnej dźěła, dom a zahrodu a z pčołkami hobby, kotryž sej tohorunja čas žada. Jutře wot 11 hodź. pak budźe wón z wěstosću w swojim zawodźe w Konjecach pódla towarstwoweho domu. Jeho firma za kładźenje kachlicow a twar kachlow swjeći 30lětne wobstaće. K tomu wočakuje wón swojich sobudźěłaćerjow, přećelow, wobchodnych partnerow a wjesnjanow, zo móhł z nimi swjećić a na minjene tři lětdźesatki zhladować.
