Třeći raz stej Trjebinska Domowinska skupina a towarstwo žonow ...
Nad dešćom so wjesela
Dalewuwiwanje pobrjoha schwalili
Na swojim wčerawšim posedźenju je wjetšina Wojerowskich měšćanskich radźićelow za dalši wutwar zapadneho pobrjoha při Šibojskim jězoru hłosowała.
Wojerecy (AK/SN). K wutwarej a dalewuwiwanju słušatej dwaj dźělnej projektaj. Sprěnja: wotkryće medijow na pobrjohu a zdruha: planowanje a natwar krajneje marki (Landmarke). Wobě matej so ze spěchowanskimi srědkami Zwjazka a kraja zrealizować. Suma cyłkownych kóštow je 29,3 milionow eurow. 95 procentow financuje město Wojerecy ze spěchowanskimi srědkami po zakonju Zwjazka wo sylnjenju strukturow. Pjeć procentow kóštow dyrbi same nałožować.
Krótkopowěsće (29.05.24)
Dale a mjenje apotekow
Budyšin. Po cyłej Sakskej je dale a mjenje apotekow. W někotrych kónčinach mjez druhim w Budyskim a Zhorjelskim wokrjesu dyrbja ludźo dlěše puće na so brać, zo móhli do apoteki, zdźěli wčera prezident sakskeje komory apotekow Göran Donner. Předewšěm za staršich wobydlerjow a starši z mjeńšimi dźěćimi je situacija wobćežna.
Piwarz maturantow přewodźa
Budyšin. Abiturienća Budyskeho Serbskeho gymnazija zhonja dźensa wuslědki maturitnych pruwowanjow. Rano su při zachodźe přichadźacym šulerjam a wučerjam na swojim poslednim šulskim dnju z Abi 2024 čoło popisali. 10. a 11. lětnik kubłanišća přebywatej dźensa na planowej hrě POL&IS zwjazkoweje wobory. Tam jich sakski minister kubłanja Christian Piwarz (CDU) přewodźa.
Pytaja rjekow turizma
Brigada přeprošuje na program k 75. narodninam
Lěpše wuměnjenja wobornikam
Gmejny zhromadnje nowe wohnjowoborne awta kupili
Bukecy (SN/MWj). W štyrjoch gmejnach Budyskeho wokrjesa – w Malešanskej, Kubšiskej, Rakečanskej a Bukečanskej – smědźa so wot njedawna nad nowym wohnjowobornym hašenskim awtom wjeselić. Ze zhromadnej skazanku su štyri komuny dohromady pjeć hašenskich jězdźidłow kupili. Organizaciju a wobstaranje měješe Bukečanska gmejna na starosći. Tohodla su tam minjeny pjatk nowe jězdźidła zjawnosći předstajili a wobornikam přepodali. Nimo wobstajneho spěchowanja za nakup nowych jězdźidłow podpěruje Swobodny stat Sakska tajku zhromadnu skazanku z dalšimi 20 procentami. Tak móžachu kónc lěta 2021 nowe jězdźidła wupisać. W měrcu 2022 dósta firma Magirus z Ulma nadawk, je twarić. Při planowanju su rozdźělne naroki wobdźělenych wohnjowych woborow wothłosowali. Kónc apryla móžachu wobornicy w Malešecach, Budyšinku, Kubšicach, Rakecach a Bukecach swoju nowu techniku přijimać. Cyłkownje inwestowachu za nju 1,8 milionow eurow. Z toho je 810 000 eurow spěchowanja. „Z tym přinošuja wšitcy wobdźěleni k wjetšej wěstoće wobydlerjow.
Policija (28.05.24)
Žiwe płoty zapalili
Kamjenc. Zapalerjo běchu w nocy na póndźelu w Kamjencu po puću a su wjacore žiwe płoty zapalili. Stało je so to na Njeswačanskej dróze, blisko Marijneje cyrkwje a na Dittrichowej. Dwójce su wobydlerjo płomjenja hašeli, jónu wohnjowi wobornicy. Nětko pyta policija swědkow, kotřiž su něšto wobkedźbowali.
Serbja budu nadal zastupjeni
9. junija budu nimo wólbow do Europskeho parlamenta tež wólby gmejnskich a měšćanskich radow. Smy so w někotrych gmejnach wobhonili, što su tam w minjenych pjeć lětach docpěli.
Bóšicy (SN/MiR). Drje najsylniša dopomnjenka Bjarnata Cyža jako naměstny wjesnjanosta w Bóšicach stej pomocnej akciji za Pólsku a Čěsku. Spočatk 2000tych lět je wón zhromadnje z wjesnjanostu Stanijom Ryćerjom pomocne srědki do susodneju krajow wozył. Wšako běše tam woda wulku škodu načiniła. Ze słowjanskim duchom, wutrobitosću a bjez wulkich rozmyslowanjow staj sej wonaj tam přećelow zdobyłoj. „Mi je stajnje wažne, zo tež w Bóšičanskej gmejnje serbske žiwjenje knježi“, Cyž rjekny, „wšako mamy w našich dźewjeć wjesnych dźělach hišće něhdźe połojcu wobydlerjow, kotřiž serbsce rěča abo so k serbskemu žiwjenju wuznawaja.“ W nadawku wjesnjanosty pěstuje wón mjeztym dlěje hač dźesać lěta styki do čěskeje partnerskeje gmejny Srbsko njedaloko Prahi. W awgusće přijědźe składnostnje 650. róčnicy prěnjeho naspomnjenja Wětrowa wolejbulowe mustwo wot tam na wopyt do Łužicy.
Při rjanym wjedrje je njedźelu tójšto přihladowarjow na ...
Přidatne wudawki
Budyšin (SN/at). Budyski wokrjesny sejmik je so wčera posledni raz we wólbnej dobje 2019–2024 zešoł. Radźićelki a radźićeljo wobzamknychu wudawki wyše plana za jobowy center Budyšin we wobjimje 4,061 mio. eurow. We wobłuku kubłanja a wobdźělenja trjebaja 1,550 milionow eurow wjace za přizwolenje wukonow ukrainskim dźěćom a młodostnym. Jich ličba je so porno planowanjam wo tójšto zwyšiła. Wjace kóštow njezawinuja nimo zwyšeneje wosobinskeje šulskeje potrjeby tež wudawki za wobjed, transport šulerjow a spěchowane wuknjenje. Sylnje stupali su kóšty za zaměstnjenje (KdU), předewšěm za tepjenje a ćopłu wodu. Wočakowane přidatne wudawki je tu 1,971 mio. eurow. Kalkulowali su z woteběracej ličbu padow. Suma za prěnje wuhotowanje bydlenjow je wot 2021 na 2023 wo 205 procentow přiběrała. Tež tohodla su přidatne pjenjezy 270 000 eurow za druhe wukony za kwartěr a tepjenje kaž tež za jonkrótne wukony trěbne.
Wobzamknjene přidatne kóšty wokrjes jeno zdźěla sam kryje. 1,611 mio. eurow Zwjazk přewostaji a 800 000 eurow je z přidatnych dochodow z narunanja socialnych wukonow KdU.
